طبيخة قلاية اللحم الليبية

طريقة عمل طبيخة قلاية اللحم الليبية بالصور من اكلات مطبخ الشيف الليبية نادره

وصفة طبيخة القلاية باللحم من المطبخ الليبي ويسمى في السعودية والخليج المقلقل او حميس اللحم

العيد حلو باللمة وبأكلاتنا الليبية التقليدية وتختلف هذه الأكلات بإختلاف المدن في كل ليبيا الحبيبة

واليوم قلاية العيد سبحان الله ليها نكهة خاصة وأكيد كل واحد وطريقته اللي متعود عليها والاختلاف بسيط مثلا في اللي يدير بزار وفلفل احمر ورشة حرارات او قرفة وفي اللي يدير شوية من الدوابه وفي اللي يدير شويه سمن في الاخير

بس مؤخرا شبه معاش يديروا في الدوابة والسمن ويكتفو بالزيت اللي بيطيب القلاية 👌

وهذه قلاية العيد نموت فيها وياسلام لما معاها فطيرة وفيها هديكا النقط المحروقات ولا طريف خبزة مقرمشة ونفطروا منها تاني يوم في حوشنا وناكل منها لين نشبع 😋

ونخليكم مع طبيخة القلاية باللحم

طريقة اعداد وتحضير وعمل طبيخة قلاية اللحم الليبية :

احسن قلاية ناكلوها من لحم الفخدة

يبدا رطب زي الزبدة ويدوب في الفم مع شوية الشحم اللي يهبل ياسلام

قطّعي اللحم إلى قطع صغيرة

في مقلاة

احمسي قطع اللحم بدون ما تضيفي معها اي شي

وقلبيه فيه راح يتغير لون اللحم ويطلع اللحم مويته

غطّي المقلاة

وواصلي التقليب كل ثلاث دقايق مع التغطيه

اضيفي قليل من السمن

وكملي التقليب كل فترة حتى تجف كثير من الميه

وحطي الملح والكمون والفلفل الاسود وقليل من الكركم

غطّي المقلاة

واتركي اللحم على نار هادئة إلى أن ينضج اللحم تماماً

وتقدم قلاية اللحم بالعافية

صحة وعافية❤️♥️