خبز الخمير الاماراتي بالدبس
طريقة عمل خبز الخمير بالدبس بالصور من مطبخ وردة دبي
وصفة خبز خمير بالدبس خبز إماراتي شعبي قديم
باعطيكم طريقة لذيذه جداً و خفيفة لعمل خبز الخمير
مكونات ومقادير عجينة خبز الخمير بالدبس :
لعمل العجينة نحتاج الى
3 اكواب و نصف طحين رقم واحد
3 ملاعق اكل دبس التمر
ذرة ملح
كوب شاي حليب مبخر
كوب ونصف ماي دافي
ملعقة اكل خميرة فورية
ملح ذرة خفيفه جدا
قطعة زبدة صغيرة
طريقة التحضير لعمل خبز خمير بالدبس :
نخلط جميع المقادير مع بعض
الى ان نحصل على عجينة لينة و خفيفة و ماتلصق باليد
نشيل العجينة و نحطها في اي وعاء
نحط عليها شوية زيت او زبدة
و نغطيها
هنيه تلاحظون حطيتها في هالطاسة ام غطاء ويتغطى زين و بسرعه يتخمر
لاحظوا لون العجين موب ابيض صاير عسلي نوعا ما
لاني استخدمت الدبس بدل عن السكر
بعد ساعه نفتح الطاسة
و نكور العجين في صينية
بعدها نفرد كرة العجين
و ندهنها بصفار البيض
و نرش عليها السمسم
بعد مانخلص الكمية كلها
البسوا قفازات الفرن ان كنتوا تخافون تحترق ايدكم وابدؤوا الشغل
نجيب جدر الخمير و نتركه 4 دقايق
لين ما اسلاك الحديد من داخل تحمر بهالصورة
الجدر طبعا يكون مسكر
ناخذ العجين المفرود
و نحطه على راس الجدر
عقب الخمير من تحت ينضج بعد 20 ثانيه
ناخذ الملاس و نحط العجين داخل الجدر ونسكر عليه
بالضبط 30 ثانيه مب اكثر
وافتحي الجدر و طلعي الخمير
ان تاخرتي اكثر عادي الخبز بيحترق
لان الجدر سريع جدا
لاحظوا الصورة كيف من تحت و فوق العجين نضج و انتفخ
ونرجع نحط كمية جديده على راس الجدر مثل هالصورة ونكرر اللي سويناه
النتيجة بتكون جي خبز خمير بالدبس شهي
وهاي كل الكمية من خبز الخمير بالدبس
وبالعافية
