طريقة صنع قراصة سودانية بالصور خطوة بخطوة
طريقة عمل وصنع قراصة سودانية بالصور خطوة بخطوة في المنزل من مطبخ مريم الحسين للاكلات السودانية
وصفة القراصة السودانية للمبتدئات من المطبخ السوداني التقليدي و الحديث والمعاصر
الطريقة دي والحجم بتاع القراصة ده بتاع اهلنا في الشمالية.. ما بحبوا القراصة الصغار
how to make sudanese gurasa bread recipe homemade
مكونات ومقادير وطريقة اعداد وتحضير وعمل القراصة السودانية :
نتفق من البداية.. دي الخطوات البتبعها
غالبا حيكون في كتار عندهم طرقهم مختلفه
ده ما بعني انه طريقتي صح ولا طريقتهم غلط
بعني انه كل الطرق تؤدي الى القراصة
دي اهداء لكل واحده لسه بتطاقش في المطبخ..
نبدأ اول شي بالدقيق
دقيق القراصة البستخدمه ناس البلد دي بسمّوه دبي
بنجيبه من المطحنه.. هو دقيق قمح ما مقشور
لونه بيج لكن في نفس الوقت مطحون ناعم جدا عشان كده ما بغلّب
لاحظوا لي لونه مقارنه بي الدقيق متعدد الاستعمالات
طيب لو ما عندك دبي!
جيبي دقيق القمح الأسمر (البر)
ولخبطيه مع دقيق متعدد الاستعمالات (ابيض) بنسبة واحد بر مقابل تلاته ابيض
كده حتحصلي على الطعامه الجايه من البر واللزوجة بتاعت الأبيض..
انا بكب كمية الدقيق العايزه اعملها
وباستخدام مضرب الشبك قبل ما اعمل اي شي
حطيت كوبين دقيق
بديه تحريكه عشان يدخله الهوا ولو في كراضم بتاعت دقيق تتفرتق
بعداك بضيف بي طرف الملعقة الصغيرة باكينج باودر
الهدف من الحركة دي انه القراصة تطلع ليك هشّه
بعداك نجي لمعضلة التخمير
في ناس بقولوا اعملوا خميره .. وناس بقولوا ما تعملوا
وانا بصراحة ما عجبت جماعتي الا لمن عملته خميره
لكن بحذر.. وبوريكم الفكرة كيف بعد شويه
بس حبيت اثبت اني بستخدم خميرة
الخميرة العندي الايام دي غايظاني
النوع الحبوبه كبار
النوع ده لازم قبل تضيفيه للعجين تذوبيه في حبة مويه دافيه (يدك تستحملها) مع حبة سكر
للكوبين دقيق عملته ملعقة صغيرة خميرة
لو عندك نوع الخميرة الحبوبها صغار
كبيها طوالي في الدقيق
ما بتحتاجي خطوة التذويب في المويه دي
بعد تذويبها في المويه
حيكون شكلها زي العصير البيج..
خليها زي عشرة دقايق كده
لو خميرتك سمحة حتعمل رغوة كده
ولو هبشتي الكباية حتلقيها حرارتها زادت شويه كده
لو خميرتك كعبه ما حيحصل شي
كعبة معناها صلاحيتها انتهت او نوعها كعب.. وحتتعبك لقدام
ممكن تصبري تاني عشرة دقايق احتمال مع البرد تحتاج زمن اكتر
بعداك كبي الخميرة بي مويتها في الدقيق وكبي معاها ملح
صحي الملح ببطء التخمير.. لكن احنا ما عايزنها تبقى خميرة
الملح خليك كريمة فيه عشان طعمها بطلع ما حلو لو كانت مسيخة..
نجي لكمية الموية
واصلي بي مضرب الشبك
بخليك تعرفي تقدّري كمية الموية
وبشيل ليك اي كراضم وبدخّل ليك هوا في العجين
كبي مويه ما تكون بارده لو الجو بارد.. يعني تكون دافيه
مصمصي كبايتك الكان فيها الخميره.. وكبي.. وحرّكي بالمضرب
في البداية بتكون الحركة تقيله
لكن وانت بتكبي الموية بتصلي مرحلة بتحرك ليك العجين بسهوله
ما تكتري المويه شديد.. بس اول ما تحسي الحركة بقت ساهله، وقّفي المويه
وواصلي قلّبي.. لحدي ما تصلي للقوام
خلي العجين يقعد فترة في حتة دافيه
لو الواطه حاره ما بتحتاج وقت كتير
يلا دي الحته القرار فيها بعتمد على ملاحك شنو
لو ملاحك مفروك (بامية، سلج، خضرة..) بقولوا خلي القراصة تتخمر لمن تبدي تشمي ريحة الخميره
بس ما تخليها تخمر شديد لمن تتضاعف
كده لو جيتي رميتيها بتطلع ليك مفتفته
لو ملاحك دمعة، ويكة، تقلية…او اي ملاح تاني، ما تخليها تتخمر
انا عادة براقبها، اول ما تظهر تلاته اربعة فقاعات في العجين، برميها واخبزها
لاحظوا في الصورة عدد بسيط من الفقاعات
نجي للرمي
جرّبته حاجات كتيره
لحدي ما هدتني عمّة اولادي الصاج ده
ريّحني راحه شديده
وده نفس الصاج البعوس فيه الكسره.. وبعمل فيه المُطَبّق
ومرات بنجّض فيه البيتزا لمن اكون محتاره!
حطي صاجك على نار متوسطة
وختي جنبي العجين
وكوره فيها مويه تمصمصي فيها يدّك
وفوطه تنشّفي بيها يدك عشان ما تنقطي المويه تملي مطبخك
الكمية العملتها بتاعت العجين دي بتعمل ليها تلاته قراصات XXL
ده الحجم البحبوه ناس الشمالية
كبي العجين
وحرّكي بي يدّك لحدي ما تغطي الصاج كلّه تقريبا
نارك هادية، لكن مفروض الصاج يكون سخّن تسمعي تششش لما تكبي العجين
بعد تفردي عجينتك عايني بعيونك بس
حتلاحظي انه شويه شويه بدا العجين ينشف من فوق
لكن لانه حجم القراصة كبير وتخينه ما تنتظري العجين كله ينشف تماما
ارفعي طرف القراصة شوفيها من تحت
لاحظوا في الصورة.. الحفر الظهرت من فوق دي معناها قراصتك دخلها هوا
ودي حاجه كويسه
عايزنها تكون اتحمّرت من تحت قبل نقلبها
عشان لما نقبلها يكون شكلها كده
شدّي عضلاتك وامسكي القراصة كويسه، وهوبااااا، اقلبيها
كده قراصتك جاهزه
ختيها في صحن مناسب
قراصتنا دي عملتها ليهم بي ملاح ويكة محمّرة
الشعب عندي عجبته شديد ..
صحة وعافية♥️
