المضروبة الإماراتية
وصفة طريقة طبخ وعمل اكلة المضروبة الإماراتية madrouba recipe من وصفات مطبخ الشيف الاماراتية البنت السنعة
المضروبه💛 بالطريقة الإماراتية بالدجاج
مكونات ومقادير عمل المضروبة الإماراتية بالدجاج :
دجاجه كامله
كوب أرز مصري منقع بمويه ( يمكن استبداله بالارز البسمتي) وممكن نخلط نص كوب من كل نوع
كوب أرز بسمتي
حبتين بصل
حبتين طماط
حبة فليفله
٣ فصوص ثوم
زنجبيل مبشور بنفس مقدار الثوم
نصف كوب كزبره خضراء
فلفل هندي( الكميه المرغوبه)
٢ م.ك من صلصة الطماطم
حبتين لومي
القليل من التمر الهندي منقوع بكوب ماء ساخن( يمكن الاستغناء عنه) إضافة من عندي
٢ م.ص من بزار البرياني
١ و نصف م.ص من ( الفلفل الأسود، كزبره)
١ م.ص من ( كركم، فلفل أحمر حار)
نصف م.ص ( هيل، قرفه)
ربع م.ص لومي مطحون
ملح حسب الرغبه
القليل من سمن البلاد
طريقة اعداد وتحضير وعمل وطبخ المضروبة الإماراتية بالدجاج :
⠀
نحمس البصل مع قليل من السمن
لما يذبل شوي نحط الثوم المفروم والفلفل الهندي المقطع ( اختياري ) ثم نضع الفلفل الرومي البارد والكزبرة الخضراء
ثم نضيف معجون الطماط ونحمسه مع المكونات.ولازم نقلبها ونحمرها
نضيف الطماط ونقلب ونغطيه لما يذبل.
نضيف الدجاج ونقلبه لما يتغير لونه
( ملاحظه الدجاج بالعظام افضل من الفيليه لان العظم يعطي الطعم صح للمضروبة وقبل ما نحط الرز نشيل العظم )
نضيف البهارات ونغطيه حوالي ١٠ دقايق ياخذ لون وطعم البهارات.
الان نصفي التمر الهندي المنقوع
بعد ما تسبك الدجاج الان نضيف الماء المغلي
ونتركه يغلي ونخلي الدجاج يطبخ يطبخ عدل لين يذوب
بعدها نطلع الدجاج ونشيل العظم منه
ونرجع الدجاج الصافي للقدر ونحط الملح
ومنقوع التمر الهندي
نضيف العيش ( الرز )
ونحرك المكونات
ولازم ننتبه هالاكله تحتاج ماء كثير ونتركه على نار عاليه لين نشوف الرز امتص الماء كلها من السطح
ونرجع نحط ماء ونقصر النار عليها
كيف نعرف ان الماء كافي ؟ لما نشوف ان الماء ثابت موراضي ينشف وقتها اعرفي ان كمية الماء مناسبة
نغطي القدر ونتركه على نار هادئة لمدة ساعة ونص وتقدرون تخلونه ساعتين بعد
وبعدها نبدأ نضرب المضروبة
اللي ما عنده مضرب ممكن بالملعقة الخشب الكبيرة كذا بطهرها على جدار القدر ولازم احد يساعدك اليد الوحدة بتتعب
كيف تعرفون ان المضروبة اصبحت جاهزة وتمام لما نشوفها تتمغط وتمتط معاك مثل الجبن المطبوخ
هالحين نحطها بالحافظه
ونحط حفرة بواسطة فنجان ونحط فيها سمن
ولا تنسون تقدمون البصل واللومي مع المضروبة
وبالعافية جداً جداً مضروبة لذيذة وخفيفة وطعم البهارات موزون مع الكمية جربوووها
وصحتين وعافية
