خبز مراصيع امي

وصفة طريقة طبخ وعمل خبز مراصيع امي لذيذه وسهله بالصور marasie recipe من وصفات مطبخ منى الحمد

مراصيع او مراصيع امي .. هالوصفه تذكرني باايام الطيبين ياهي لذيذه مع جبن او فول او لحاله ساده 🤤
كانت امي تسويه لنا وحنا صغار 😍 والان بسويه لعيالي
الله يطول بعمرها على طاعته ورضاه وللمسلمين 💙

مكونات ومقادير وطريقة عمل المراصيع :

مقادير العجينة على جسب الكميه
انا سويت كاسين دقيق بر اسمر ( ضروري من المطاحن اطعم والذ ) وكاس ماء وممكن تحتاجين زياده
الملح اذا الدقيق من المطاحن مايحتاج لانهم يضيفون معه اذا الجاهز اضيفي شوي ..

اعجن المكونات

واترك العجينة ترتاح وكل ماطولت تطلع الذ

اكور حجم التفاحه وافردها عشوائي بيدي وعالصاج او الطاوه او المقلى فيه زيت شوي ..

افردها عليه

واقلبها واضغط عالملعقه عشان تستوي من الداخل ..

تاكلين المراصيع مع جبن 😍 او ساده او مع فول او نواشف

واذا حابه طريقة لذيذه

تقطعين المراصيع عشوائي ومع بصل مقطع صغير مكشنته يعني محموس مع زيت وذبلان مع اضافة شوي ماء وملح وبزار( مسمنه ) الدي هي كمون وليمون اسود مطحون وقرفه ..

وبالعافيه