مموش ربيان طري كويتي
طريقة عمل مموش ربيان طري كويتي بالصور من مطبخ يوميات فرفر
وصفة مموش ربيان طري على طريقة الوالده دعواتكم الطيبه لها 🥰
لذيذ وسهل وسريع من المطبخ الكويتي الشعبي القديم
how to make mumawwash rubyan kuwait recipe in arabic
مكونات و مقادير وطريقة عمل وتحضير مموش ربيان طري كويتي :
ربيان طري نتبله بليمون وملح وكركم
وننقعه ربع ساعه
وبعدين نغسله بماي
ونخليه ينشف
ونبهره بكركم وفلفل اسود وبهارات ربيان ومعجون الثوم وزنجبيل وزيت طبخ شويه ودراسين وملح
ونخليه بالثلاجة او تسونه بنفس الوقت عادي
الان
نحمس بصل مع زيت
ولما يتغير لونه نضيف له معجون الثوم
وبهارات صحيحه
(دارسين، ورق غار ، لومي، هيل، مسمار، فلفل اسود وفلفل حار ناشف)
ونحمس البصل والثوم والبهارات عدل
ونضيف الربيان
ونحمسه جم دقيقه بس
ونضيف قفشه كبيرة معجون طماط
ونحمسه عدل مع الربيان
ونضيف شبنت وكزبره فرش
ونحمس ونخليه ١٠ دقايق يطبخ
ونحط عليه نص كوب ماش مغسول ومنقوع ساعتين
ونحمسه مع الربيان
ونحط عليه طماطه وحده مقصصينها اربع اجزاء وفلفل حار اخضر للي يحب
ونضيف الماي المغلي
ونخليه حوالي ٥ دقايق يطبخ
ونكت عليه العيش – الرز
واخر شي نحط الملح حسب ذوقكم
وبس خلوه يطبخ ٢٠ دقيقه
ولما يستوي يصبح المموش جاهز
وعليكم بالعافية 🥰
صحة وعافية ♥️
