لهوم النفاس العشرين الاولى والاخيرة

طريقة عمل لهوم النفاس العشرين الاولى والاخيرة من بسمه

وصفة لهوم او سفوف النفاس موضوع مهم ومفيد لكل امرأة والد او على وشك ولادة 💕

وهذي طريقة اهل القصيم – عنيزة ❤️ انا شخصيا استخدمت بولادتي واستفدت منهم كثير الحمدلله

لهوم النفاس على قسمين :

( اول ٢٠ يوم نفاس – العشرين الاولى )

– كوبين حلبه حبوب مش مطحونه
– كوب حبة سوداء مش مطحونه
– ٣ ملاعق مره مكسره صغار صغار

تخلط كل هالمقادير وتنحط في مرطبان زجاج

وتاخذين ملعقة كبيرة مرتين باليوم

ملعقة قبل الفطور و ملعقة قبل العشاء بنص ساعه او ربع ساعه عالاقل

( ثاني ٢٠ يوم نفاس – العشرين الاخيرة )

– كوبين رشاد حبوب مو مطحون ولازم يكون لون الرشاد اشقر مايل للصفرة اما اذا كان لونه غامق مايل على سواد فهذا مو زين تراه يكون قديم بالمحل وما له فايده ابد
– كوب حبه سوداء مو مطحونة
– ٣ ملاعق مستكه مطحونه نص نص وترى حتى المستكه مثل الرشاد لازم يكون لونها اشقر مايل للصفرة او للبياض
– ٤ ملاعق فلفل اسود مطحون

تخلط كل هالمقادير وتنحط في مرطبان زجاج

وتاخذين ملعقة كبيرة لمده ٢٠ يوم

قبل الاكل مرتين باليوم

قبل الفطور وقبل العشاء بنص ساعه او ربع ساعة عالاقل .

ايضا هالوصفه للنفاس ممتازة

(تمرة النفاس)

التمرة اشيل النوى واعجزنها بيديي مع مرة مطحونه وحبة سوداء

واكورها مع بعض

وتاكل منها الوالدة النفاس

تمرة او تمرتين قبل الاكل اول ما تولد لمدة ثلاث او اربع ايام طول فترة جلوسها بالمستشفى وبعد ماترجع البيت

وبالعافية 😘💚

صحة وعافية ♥️