كوارع باجه
وصفة طريقة عمل اكلة كوارع باجه العراقية سهله ولذيذه بالصور trotters recipe من وصفات وعمل مطبخ الشيف لولو العراقية
كوارع ( باجه ) 🐄
منو من محبيها💙 ومنو لا 😷
طبعاً جبنا الكوارع نضيفة من القصاب
بس لازم نغسلها عدل حتى نتخلص من الزفاره واي شوائب ملتصقه فيها
مكونات ومقادير وطريقة عمل كوارع باجه :
اولاً غسلت الكوارع بمي وخل ابيض وبواسطة سكين اتخلصت من اي شي عالق فيهم ونقعتهم تقريباً 25 الى 30 دقيقة
بعدها اتخلصت من مي الخل وشطفت الكوارع وضفت مي جديد ودعكتهم بالليمون الحامض من كل الجهات
وبعدها ضفت كمية من الملح و طحين ودعكتهم زين وتركتهم 30 دقيقة
وبعدها غسلت الكوارع وصارو جاهزين للطبخ
شوحتهم بشوي زيت وضفت بصل صغير الحجم ( الكمية حسب الرغبة ) وثوم ( الكمية حسب الرغبة)
توابل حبوب ( هيل ، قرنفل ، فلفل اسود ، قرفه ، ورق غار ، نومي بصرة ) وضفت بهار لحم وزنجبيل وكمون قليل
( إضافة التوابل حسب الرغبة )
نحمسهم عدل
ونضيف مي حار نغمرهم ونتركهم على نار هادئة واي زفاره تصعد نشيلها
نتركها تقريباً 3 ساعات ( نراقبها كل ساعة )
وبعد ماتنضج نضيف ملح وتكون جاهزة
ملاحظة /
للي يحب يضيف لحم معاه عادي
والي يحب يضيف طماطم وحده مقطعه للمرق اثناء الحمس تعطي نكهة جميلة
وممكن جزر حسب الرغبة
بما انها اكله دسمة الي يحب يتخلص من الدسم الي بيها يخليها بالبراد ح يجمد الدسم ونكدر نتخلص منه
تقدم كوارع باجه مع الخبز 🙂 والبصل والحامض
صحتين 💙🇮🇶
