جريش اهل سدير

طريقة عمل جريش اهل سدير بالصور من مطبخ ديني كياني

وصفة جريش جدتي وأمي بطريقة اهل سدير لذيذ جدا وسهل

بأعلمكم طريقة الجريش اللي توارثتها عن امي اللي توارثتها عن جدتي .. وبمآ أن أمي سديراويه فجريشهم هو أحلى جريش .. مو لأنه جريش أمي .. بس لأنهم يستخدمون الحليب مو زي الأغلبيه يستخدمون لبن .. والحليب يعطي الجريش طعم كريمي واللبن طعم حآمض ..وراح نستخدم في وصفتنا مكونين بتخلي جريشك لذيذ وصدقيني الكل بيحبه << الحين كل عماتي صارو يسوون نفس طريقة مآمآ ومآمآ صآرت مشهوره بجريشها اللذيذ
المهم أن الشي السري اللي بنحطه هو القشطة .. ومره مآمآ حطت كم حبة جبن كيري طلع الطعم قاتل باللذه

طبعاً القشطه مستحدثه ولكن الحليب وصفة أهل سدير تقول كذا .. وجدتي أغلب الأحيان تسويه بحليب الغنم طآزج من مزرعة جدي

المهم أني مآ أحب ألآ جريش جدتي + مآمآ + أنآ وجريش المطآعم مآ أحبه منوب منوب

وأحب آكل الجريش وهو توه مخلص مو مسخن ..

how to make jareesh saudi arabia in arabic

مكونات عمل الجريش :

– صدر دجاجه ..
– 3 كاسات جريش منقوعه ..
– نص كآس رز مصري << يعطي لون أبيض وإذا حآبه تستغنين عنه بدليه بـ ربع كاس جريش ..
– مكعبين مآجي ..
– حبة كبيره أو حبتين وسط بصل
– كمون ..
– علبة قشطه فمآ فوق
– 3 لتر حليب ..
– كآس من مرقة الدجاج ..

طريقة عمل الجريش :

أول شي أنقعي الجريش ..

طبعاً نقع الجريش يختلف حسب الحبه ،، الحبه الصغيره تحتاج وقت أقل والحبه العآديه وقت أكثر ..

أحنا حبيتنا وش زينها حجمها وسسط فأخذت ساعتين ونص وهو وقت كافي ..

وكل مابغيتي الجريش يكون أنعم أكثر ومهروس أو مدري وش يسمى طولي بنقعه ..

هنآ جريشي منقع ووش زينه والرز الحين منقوع وجآهز

الان نسلق صدور الدجاج والكميه على حسب رغبتك

يعني نسبة الدجاج بالجريش تحبينها كثيره كثري ..

أنآ كنت مسويه دجاج محمر لأن أهلي يحبونه فحطيت بس صدر ممكن تحطين لحم وممكن بدون ششي وتستغنين عن مرقة الدجاج بمويه عاديه ..

بعد ماتسلقين الدجاجه وتكونين مملحتها طبعاً تآخذين كاس من مرقتها وتضيفينه في القدر اللي بتطبخين فيه الجريش

والباقي خليه على جنب << بعدين أقولكم وش بنسوي فيه ..

ونضيف الحليب للقدر

ونضيف البصل المفروم .. والملح ،، والماجي ..

ولما يغلي الخليط الميلكي

نضيف حبات الجريش ونحرك عشان يتداخل الخليط الميلكي مع الجريش ..

واللي تحب نكهة وريحة الفلفل تضيفه ..

ولا تخافون حركو وانتم مغمضين لأن الجريش مو مثل الرز مانبيه يعجن ..

ونضيف معه الدجاج أو اللحم واذا ماحبيتي مب لازم ..

ومجرد ما يرتفع الجريش نخفض النار ونحط تحت القدر حديده

عشان تخفف النار وتوزع الجراره بشكل متساوي ..

وأثناء الاستواء اختلفت الروايات

جدتي تخليه وما تفتحه وماما بين وقت وثاني تحركه

عاد انتي وراحتك لكن اذا اول مره بتسوين جريش ممكن بين وقت وثاني تطلين عليه ..

ولما تحسين الجريش بدا يثقل ولكنه فيه سيلان

يعني لاهو شوربه ولا جريش عادي ممكن تخلينه يكمل استواءه على النار ..

أو ممكن زي ما جدتي وامي يسوون يدخلونها الفرن ..

شفتو الحديده السودا اللي هي طاوه .. هذي اللي قلت لكم عليها ..

وترى وجوده بالفرن مو ذاك الشي الأساسي مره يعني يمكن الاستغناء عنه ..

وفيما أن الجريش يطبخ خنروح نجهز الكشنه ..

طريقة كشنة الجريش الابيض

مقادير الكشنه :

بصل ..
حبات من الليمون الأسود المجفف
بودرة الليمون المجفف ..
مقدار من مرقة الدجاج اللي رفعناها أول .. وممكن مويه عاديه اللي يريحك ..
قلييل من الزيت ..

طريقة الكشنة :

تحمسين البصل بالزيت وبعدين تضيفين المويه

وأضيفي الليمون الناشف وبودرته

ولو تبين كم حبة فلفل مافيه مانع ..

وتخلينهم ينطبخون لمآ تحسين أن البصل ذآآب من قلب ..

<< هنا ممكن تحطين مكعب ماجي ..

وتخلطيهم دقيقتين وتكون حشوة كشنة الجريش جاهزة

ونرجع لقدر الجريش نكمل

بآقي أحلى مرحله بالنسبه لي اللي هي اضافة القشطه

أفضل شي تكون قبل التقديم ..

نضيف القشطه والكمون

ونطلع الدجاجه من الجريش ونفتتها

ونبدآ نخلط أو بالأصح نعصد ..

تعرفون المعصد الخشب هذا أقدره وأحسه أساسي بطبخ الجريش ..

حنا حقنا توه منكسر .. فعصدت بمغرفه ولا صورت لكم هالمرحله الجميله

المهم الحين صار عندك ألذ و أحلى جريش ..

وأحس لو كنتي فنانه ممكن تحطينه بالعشا مع اطباق مو شرط تكون شعبيه لأني أحسه بالحليب يكون لذيذ ورآآيق ..

تحطين الجريش بطبق التقديم وفوقه الكشنه

صور الجريش المملوح .. << معجبه بجريشها ..

أيضاً الجريش لو نظرتي له بمنظور صحي وحبيتي تطبخينه بصحيه أكثر بيكون الموضوع جداً سسهل ..

وكون الجريش يحتوي على الكثير من الألياف هذا بيخليه يمنع امتصاص الدهون ،،

وغير أنه ملييئ بالكالسيوم بسبب وجود مشتقات الحليب والبروتين ايضاَ ..

ولو كنتي ماتحبين كل انواع اللحوم ممكن تحبينه بالراحه ..

أغلب السعوديين والخليجيين تقريباً يعرفون طريقة الجريش لكن فيه عرايس وفيه بنات حلوات مايعرفون الطريقه والبعض مآ قد جربه .. والوصفة إهدآء لكم ولأغلى ثنين بآبآ ومآمآ الله لايحرمني منهم .

وصحة وعافية