ايدام مرق لحم لذيذ

طريقة طبخ وعمل ايدام مرق لحم لذيذ بالصور من مطبخ شهزلان

وصفة اكلة ايدام مرق لحم وخضار مع رز ابيض لذيذ وسهل

مكونات ومقادير وطريقة عمل ايدام مرق لحم لذيذ :

اول شي قطعي اللحم

واسلقيه بالماي

عشان تكون قيمة اللحم الغذائيه بماي السلق ونستخدمه للرز ..

في قدر آخر

قطعي بصل وفليفله قطع كبيرة

واحمسيها بشوي زبدة

وأضيفي البهارات والملح ..

واخلطي البصل بالبهارات على النار شوي

وخلي الريحة تطلع وتسمعين صوت تكتكة الحمسه ,,

بعدين اضيفي الجزر والبطاطس

ومعجون الصلصة للبصل ,,

بعدين اضيقي الطماط

انا احب الطماط اللي يجي صغار مرة

احطه كامل بدون تقطيع بس اغسله واحطه ,,

بعدين شيلي اللحم من ماي السلق

وأضيفيه للمرق

وما تكبين الماي لا خليه بنسوي الرز فيه ,,

اضيفي ملح وحركي شوي الخضار باللحم والملح حتى يمتزج الطعم

وغطي القدر وخليهم يطبخون على نار هادية جداً

لان ما اضفنا ماي اعتمدنا على ماي الخضار اللي بيطلع منهم

فانتبهي نقطة مهمة جداً توطين النار لا يحترق عليك ,,

وخليها تتسبك حوالي الساعة

وافتحي القدر بعدها

واضيفي زهرة خضراء ( بروكلي )

واذا مو حابتها ما لازم ,,

وخليها تتسبك مع المرق نص ساعة ,,

وخلاص استوت

وبتكونين سويتي الرز الابيض في ماي سلق اللحم ,,

انجبي الغدا في صحن التقديم ,,

وقدمي ايدام مرق لحم مع الرز

وصورة من زاوية اخرى ,,

وصورة اقرب ,,

وبالعافية علينا وعليكم ,,