المضروبة القطرية
طريقة عمل المضروبة القطرية بالصور من وصفات مطبخ الشيف Bake my day
how to make madrouba qatar traditional food recipes in arabic
وصفة مضروبة امي بالعيش 🥣👌🏻😻
المضروبه القطرية سهله سريعه ولذيذه 🧡
مكونات ومقادير المضروبة القطرية :
دجاجتين
كوبين من العيش ( رز )
مقادير الحمسه:
فنجال زيت تقريبا
٤ بصلات متوسطه
٤ فصوص ثوم مع زنجبيل
٣ اعواد دارسين
٥ ورق غار
طماطتين مقشرين و مقطعين صغار
جلجلان فريش (كزبره) مقطع
شبت مقطع
البهارات:
فلفل اسود حب
فلفل اسود مطحون
ملعقتين كركم
ملعقة و نص بزار
نص ملعقه دارسين
٣/٤ ملعقه كمون
٣/٤ ملعقه كزبره
ملعقه و نص هيل
علبة طماطم صلصه ( تقريبا ملعقتين مليانيين)
ليمون اسود مفلوق ٣ حبات
طريقة عمل وتحضير المضروبة القطرية :
اولا الدجاج اغسله بالطحين و بعد ربع ساعه اغسلها بالماء
ثم اسلق الدجاج و اول ما يطلع الزباد اشيله (الزفره)
ثم اضع البهارات
( ملعقة و نص كبيره ملح ، عودين دارسين ، ٥ مسمار ، ملعقه و نص صغيره كركم ، ٤ حبات هيل مفلوقين ، ملعقة هيل ناعم ، و ملعقة دارسين ناعم )
و اخليها لين تستوي الدجاج
ثم افتتها واطلع العظم
و احتفظ بماء الدجاج ( اصفيه بمشخاله)
اما العيش ( الرز ) اغسله و انقعه تقريبا ٢٠ دقيقه و عقب اشخله من الماي
ونسوي الحمسه
احط الزيت و اخليه يسخن
ثم اضيف البصل و احمسه لين يذبل
و بعدها اضيف الليمون الاسود و الدارسين الاعواد و الثوم مع الزنجبيل و الفلفل الاسود الحب
واحمس احمس احمس
عقبها اضيف الطماط
و عقب اضيف البهارات كلها
واللي يحب يضيف مكعب ماجي الخيار لك
و اخر شي اضيف الشبت و الجلجلان
و احمس احمس احمس
واذا تأكدت ان الحمسة استوت وذبلت
اضيف الدجاج المفتت
و احمس احمس احمس
اجيب ماء الدجاج المصفى و احطه على الحمسه
و اتاكد ان الماء زياده
لان المضروبه تحتاج ماء عشان تلين
اذا ما كفى اضيف ماء عادي
واضيف الملح للماء
وبعد ما يفوح الماء
احط العيش عقب ما اشخله من الماء
وبعد ما يستوي العيش
اضربها واستخدم مضرب الكهرباء لانه اسرع من القفشه القديمه
انتبهي لا تطحنين الليمون الاسود
و اهرس و اهرس لين يختفي العيش
بعدها احط المضروبة في جدر التقديم
و اضيف عليه دهن قطري
و تقدم المضروبة القطرية بالعافيه💕
و صحة و هنا ❤️
