مضروبة الجريش باللحم

مضروبة الجريش باللحم

طريقة عمل مضروبة الجريش باللحم بالصور من مطبخ زهراء

مضروبة الجريش طبق مشهور عندنا .. وموجود في بعض دول الخليج بعد

يتميز بطريقة طبخه .. لين ومهروس وبهاراته اللذيذة غالبة عالطعم

واجد أنواع للمضروبة وأكثر من طريقة بعد لمضروبة الجريش وحتى ممكن يختلف عنصر البروتين

ممكن تكون بلحم وممكن بدجاج والله يرحمها أمي كانت تسويها لينا بسمك وبربيان ❤❤❤

بس دائما أحب أقول .. مو مهم الاسم مو مهم الطريقة مو مهم التفاصيل .. المهم انه من القلب وكل شي بالنهاية يصير تمام 👌🏻😋

ميزة وصفتي لهذا اليوم انها ببقايا لحم موجود عندي مسبقا من طبخة ثانية 😊👌🏻 ويصير تسوونها ببقايا الدجاج بعد

مقادير وطريقة عمل مضروبة الجريش باللحم :

غسلت ٣أكواب جريش ونقعتهم طول الليل

لازم النقع وصدقوني يفرق في وقت الطبخ

وحطيتهم عالنار بشوي ماي ارتفاع فصين إصبع السبابة

بعد الغليان أخفف النار وأغطيه

شوي كرملت بصلتين وسط مفرومين مع ٣فصوص ثوم بالماء

وبعدين أضفت زبدة

ممكن بدال الزبدة تحطون سمنة 🤩 وممكن زيت زيتون😍 أو حتى زيت نباتي عادي 👍🏻

وعليهم ٣حبات طماطم وسط مفرومين

وملعقة طعام معجون طماطم وضيفو أكثر اذا تحبونه أغمق

وملح وفلفل أسود وبهارات مشكلة حسب الرغبة

الخيارات في البهارات مفتوحة لكم 👍🏻🌹

واذا تحبون الليمون الأسود ضيفو بعد

أضفت خضار ورقية وهذا حسب الرغبة .. وقلبته وأضفت شوي ماي وخليته يتسبك وبعدين أضفته على الجريش ..

ممكن قبل اضافة الخليط تضيفون اللحم المفلل أو الدجاج وبعدين تحطونه عالجريش

أنا أضفت لحم بعد ما أضفت الخليط عالجريش .. وهذا شي ما يفرق

اللحم مطبوخ مسبقا في طبق آخر وسويت له إعادة تدوير

غطوه على نار هادية يكمل سواه ويتسبك ويتمخمخ عدل عدل..

و بس

وتصير المضروبة جاهزة

مضروبة الجريش باللحم من المطبخ البحريني
وبالعافية

وصفات أكلات شعبية

وصفات أكلات شعبية

وصفات الأكلات الشعبية القديمة والتراثية والتقليدية من المطبخ الخليجي والعربي حسب موروث المطبخ الشعبي لكل دولة ومنطقة

اترك تعليقاً

لن يتم نشر عنوان بريدك الإلكتروني.