طريقة عمل القبوط للنفاس
طريقة عمل القبوط للنفاس بالصور من مطبخ رمانة الكويت
محتويات
1- قبوط نفاس
2- ميني قبوط بحشوة اللحم المفروم
3- ميني قبوط بحشوة البصل .
4- قبوط مع خضار وفقع
5- قبوط النفاس بحشوة البصل
6- قبوط محشي باللحم
7- القبوط المحشي
8- قبوط باللحم
وصفة القبوط الكويتي اكلة شعبية كويتية مشهورة وتعتبر من الطبخات والوصفات الكويتية المشهورة للنفاس ومن وصفات الأكلات الشعبية للمرأة النفاس بعد الولادة في المطبخ الكويتي الشعبي القديم
ملاحظه
القبوط نفس المطازيز ولكن الفرق ان القبوط عجينة محشية
الوصفة الاولى
قبوط نفاس
هالقبوط بالحلبه وحبه البركه = السويده= حبه سمره
وبتلاحظون ان القبوط مافيه طماط مهروس لانهم يقولون مو زين للحامل بس عادي نستخدم المعجون
عاده القبوط يكون دسم… والهدف منه انه يثقل الرحم بعد الولاده.. الحلبه وحبه البركه عشان تقويه الظهر وحليب الام
المقدار حسب الكميه:
ثوم مهروس
معجون
زيت
قبوط مثلج
حلبه
حبه البركه
الطريقة:
ننقع الحلبه طول الليل عشان نتخلص من المروره
نحمس الثوم وبعدين نضيف المعجون والماي الساخن
واول ما يغلي نسقط القبوط ونضيف الحلبه والبركه
ونتركه لين ينضج
====
الوصفة الثانية
ميني قبوط بحشوة اللحم المفروم ..
العجينة عبارة عن كمية من الطحين ورشة ملح وكمية ماي للعجن .. وكركم اختياري ..
الطحين حسب الرغبة .. ابيض او اسمر او الاثنين مع بعض ..
انا استخدمت الابيض في هالوصفة …
نعجن المقادير لما تصير عندنا العجينة مثل عجينة الفطاير
نغطيها ونخليها ترتاح ..على الاقل ربع ساعه ..
في مرة من المرات خليتها ساعه ما تغير عليها شي ..
نجهز الحشوة
وهي حمسه لحم مفروم اللي تعرفونها بس بدون معجون طماط ولا ماي .. نبيها ناشفة ..
واذا تبين تحطين ادوية نفاس كيفج ..
نفرد العجينة الى ان تصير طبقة رقيقة شوي ..
ونقطعها دوائر صغار انا استخدمت الاستكانة ” بياله الشاي ” ..
نحط الحشوة على جهة ونسكرها عدل ..
هاذي كمية حشيتها ..
نحطهم بصينية ونحطهم بالفريزر مدة عشر دقايق ..
نقسمهم ونحطهم باكياس او علب
ونحتفظ فيهم الى وقت الحاجة ..
الطريقة ..
نطبخ مرق عادي سواء لحم او خضار .. بس انا افضل خضار لان الحشوة فيها لحم مفروم ..
وقبل ما يستوي نسقطهم وحدة وحدة ونحرك ونخليها تطبخ الى ان تنضج
وبالعافية ..
====
الوصفة الثالثة
ميني قبوط بحشوة البصل ..
نفس طريقة القبوط اللي باللحم المفروم .. بس الاختلاف بالحشوة ..
الحشوة عبارة عن ..
بصل مقصص صغار _بهارات_ملح_فلفل اسود_رشة دارسين_لومي اسود مطحون _كركم_ حلبة وحبة سودة حسب الرغبة ..
في الطريقة هاذي استخدمت الطحين الاسمر ..
وطبخها مثل القبوط اللي باللحم المفروم .. بس هني افضل مرق لحم او دجاج ..
ملاحظة .. انطلعها من الفريزر ونسقطها على طوول ما يحتاج ننطرها تلين ..
====
الوصفة الرابعة
قبوط مع خضار وفقع …
المقادير:
قبوط مثلج 10 حبات تقريبا
حبتين كوسا مقطعه دوائر متينه
بطاط حسب الرغبه ( انا استخدمت بيبي بوتايتو اللي يسمونه نيوبوتيتو)
فقع معلب .. مو كل العلبه شوي بس
طماط مهروس بالخلاط تقريبا 4
ثوم 1/2قفشه صغيره
بصله صغيره مفرومه
نص علبه معجون طماط
1/2حبه فلفل حار
م ص بزار
م ص لومي واذا ماتبونه حامض ققلو المقدار
م ص بهار
ربع كوب صبار
شوي قمردين تقريبا قد قفشه
وملح طبعا
زيت نباتي او سمنه
الطريقه:
نحمس البصل والثوم مع البهارات
وبعدين نضيف المعجون والطماط والفقع
ونحمسهم شوي قبل لا نضيف الماي والفلفل الحار
وننطره يغلي ونضيف الصبار والقمردين
وبعدين نسقط القبوط والبطاط ونتركه على على نار واطيه
وبنص السوا نحط الكوسا ونخليهم لين ينضى القبوط والخضره
وبالعافيه
====
====
الوصفة الخامسة
قبوط النفاس بحشوة البصل
العجينه:
كوبين طحين ابيض وكوبين طحين اسمر – ملعقه صغيره فلفل اسود مع ملح وملعقه صغيره بهارات مشكله -وملعقة زيت
تعجن وتترك لترتاح
الحشوه:
بصله كبيره مفرومه ناعم-ملعقه متوسطه فالفل اسود-ومثلها ليمون اسود وفصين ثوم-وبهارات مشكله ملعقه متوسطه
وحسب الرغبه كشمش منقوع بماء يصفي ويوضع علي الحشوه
الطريقه:
نحشي القبوط ونتركه جانبا واذا بتسوينه قبل يوم أحسن بعد.
نحمس البصل لما يذبل
نحط اللحم المغسول وتكونين مطلعه الزفر غاليته شويه
بعدين حطي الثوم المفروم والبهارات المشكله والكمون والكركرم
وقعدي حمسي لما تطلع الريحه الحلوه
عندج طماطتين فرميهم وحطيهم علي اللحم مع معجون واحد طماط ونص كوب ماء حار
وخليهم ينحمسون عدل حوالي عشر دقايق
حطي الماء الحار وخليي اللحمه تطبخ مثل المرق ساعه
قطي القبوط بالمرق
وخلي الماء يغلي اثناء تسقيطج للقبوط
وخليه علي نار هادئه نص ساعه
الحين حطي اذا تبين فلفل بارد حبتين وباذنجان حبتين مقصصين
وتركيه يطبخ نص ساعه أخري طبعا علي نار هادئه
وكل شوي قلبيه عشان ما يلصق بالقاع
حطي ملح وملعقه كبير عدس مغسول تري يعطيه طعم ونكهه حلوه
خليه ربع ساعه ونكون خلصنا القبوط.
*جربوه تري وايد حلو *
====
الوصفة السادسة
قبوط محشي باللحم
عجينة القبوط:
طحين أسمر حسب الكمية
ماء فاتر حسب الحاجة
حشوة القبوط:
لحم مفروم حسب الكمية
بصل مقطع خشن
ملح فلفل أسود وقليل من بهارات اللحم
كشمش (زبيب) مغسول ومنقوع
الطريقة :
يوضع مقدار طحين بالوعاء بحسب كميه المرق ..
ويصب فوقه ماء فاتر شوي شوي حتى يصبح متماسك ويعجين باليد
تصير عندك مثل عجينه الفطائر و طبعا اذا كان العجينه لينه زيديها طحين ..
نحمس البصل مع اللحم المفروم والبهارات
وعند الاستواء نضيف الكشمش المغسول والمنقوع لمدة نص ساعه الى خليط اللحم المفروم .
تبل راحه ايدك بشويه زيت
وتاخذ قطعه صغيره من العجينه
تفرد دائره صغيره
(كلما كانت صغيره ورقيقه افضل وتستوي بسرعه والاهم شكلها احلى)
ويوضع قليل من الحشو
وتقفل نص دائره
وبعدين ممكن يشيل منها العجين الزايد
وبعدين تقلق جيد مثل الكبه ..
بعدها تحضر مرق اللحم أو الخضار واللي راح تسقط فيه القبوط حتى يستوى …
ملاحظات هامة :
هناك طريقتين لعمل القبوط:
قبوط بمرق اللحم
وبهالحاله يحشى القبوط بمزيج من البصل المقطع خشن ني والكشمش المغسول والمنقوع فقط بدون الحاجه لعمل حشو اللحم المفروم .
في حال القبوط بمرق الخضار
يحشى القبوط بحشوة اللحم المفروم المعصج مع البصل الخشن والكشمش , وهي التي أفضلها .
طريقة المرق :
يحضر مرق حسب طريقتك مع إضافة الخضار التالية
( جزر – بطاط – باذنجان – فلفل أخضر حار )
بدون لحم في حال اخترنا نحشي القبوط باللحم المفروم
أيضا ماننسى اللومي اليابس في المرق , وطبعا البهارات .
بالنسبة للخضار أفضل إنها تكون مقلية نصف مستوية قبل اضافتها للمرق .
بعد ما يستوى المرق
نسقط القبوط فيه
ونخليه على نار هادية الى ان ينضج
(تقريبا نص ساعه )
وبعدها يكون جاهز للتقديم …
وعليكم بالعافية
ان شاء الله تعجبكم
====
الوصفة السابعة
القبوط المحشي
العجينه :
٢كوب طحين بر ( استخدمت طحين الامارات ) / كوب ماي / نص فنجان زيت .
نعجن العجينه و نتركها ترتاح ما يقارب النص ساعه .
الحشوه:
بصل مفروم / ثوم مفروم / لحم مفروم / ملعقه واحده من ( كمون / كزبره / ملح / بهار لحم مخلوط او بهار كويتي مخلوط / لومي اسود ) / ملعقتين كبار دبس الرمان .
نمس اللحمه مع البهارات و البصل و الثوم لحذ ما تستوي
و نضيف عليهم دبس الرمان و نقلب
ثم نرفعهم عن النار
( دبس الرمان اختياري بس عند اضافته يعطي نتائج رائعه للطعم بس ممكن نخلى عنه ) .
نعمل كرات صغيره باليد
و نفردها على شكل دائره
و نضع الحشوه و نسكرها بالطربقه اللتي تناسبكم
يعني ما نتقيد بشكل معين
كل بيت ولهم طريقه معينه متعودين عليها
مو شرط نفس الطريقه اللي سويتها الوم مع والدتي 😅👍
نعمل مرقه القبوط المكونه من :
لحم خروف او غنم / انا اخترت لحم و نزعت العظم منه علشان يستوي بسرعه و الا بالعاده نطبخ اللحمه مع العظم علشان الطعم بس راح ياهذ وقت اطول بالاستواء …
حمست اللحمه من دون زيت و اضفت عليها البهارات المكونه من
( ملعقه من : كزبره / كمون / كركم / لومي اسود / بهار كويتي او بهار لحم / ملعقتين ملح ) . .
نضيف عليهم بصل و ثوم مفرومين ناعم و نقلب .
نضيف كاسين من الطماطم المعصور و علبه معجون طماطم و كاسين ماء . .
نترك العرقه على النار مده ٤٠ دقيقه .
نوطي النار على الهادي
و نبدأ باضافه القبوط المحشي بهدوء .
نتركه على نار هاديه جدا مده نص ساعه
ثم نضيف الخضار المقطعه قطع كبيره
( بطاطس / كوسا / جزر / باذنجان ) .
نتركهم على نار هاديه مع اضافه كاس ماء و نص كاس زيت مده نص ساعه ثانيه .
واذا استوت الخضار يقدم القبوط مع الرز الابيض و البلايط .
اسرار نجاح القبوط :
لكي لا تلتصق القبوطات مع بعضها البعض يجب اضافه كميه من الماء حسب الحاجه لان القبوط سوف يساعد على تخثير قوام المرقه لذلك يجب اضافه ماء مغلي بين فتره و الثانيه .
ثانيا يحب اضافه زيت قلي مقدار نص كوب الى كوب كامل حتى لا تلتصق حبات القبوط مع بعضها البعض .
يجب ان يطبخ القبوط على نار هاديه جدا جدا لان النار المرتفعه من الممكن ان تفرط قوام حبات القبوط .
يحب ان تكون عجينه القبوط متماسكه قليلا و لا نرقها حدا لكي لا تخرج الحشوه من العجين وقت الطبخ .
و بالعافيه
====
الوصفة الثامنة
قبوط باللحم
لعمل المرقه:
بجدر ع نار عاليه حطيت
٤ حبات بصل متوسطه مفروم
نزلت عليهم لحم
وحمستهم لين تغير لونهم نزلت :
م ك ثوم
م ك زنجبيل
غطيهم ع نار هاديه ٣ دقايق
وبعدها نزلي عليهم علبه ونص معجون طماط
وحمسيهم لين تروح ريحته النيه
وغطيه ع نار هاديه بو دقيقتين يتسبكون ونزلي عليه
طماطات مفرومات اما علب او عادي
واحمسيي
بعدها نزلي بهاراتج
م ص من كل من
فلفل اسود وكمون وكركم وكاري ولومي اسود
وبعدها تمي حمسي حمسي لمن تحسين انها تسبكت يعني تغير لون الطماط لي لون بني محمر
بعدها صبي ماي وخلي المرقه تبقبق مع بعضها ع نار هاديه لين جريب ويستوي اللحم
ترشينه ملح حسب الرغبه
وتنزلين خضارج
حطيت بيديانه بقشرها وجزره و بطاطتين
وسويت عليهم طشه :
عباره عن م ص زبده
عليها ٣ فصوص ثوم اشوقرهم
تالي انزل عليهم م ص كزبره باودر
و ٣ م ك كزبره فرش
واصبهم فوق وجه المرق واحط حبتين لومي صحاري و فلفل علوب واحد
بعدها زهبي عجينتج المكونه من
٢ كوب ونص طحين ابيض
رشه ملح او م ص ملح
كوب وربع ماي دافي مايل للحراره
وعجنيها ٨ دقايق
وريحيها ساعه او ساعه وربع
الحشوه :
بمقلى ع نار عاليه
٢ م ك سمنه
تنزليه عليهم حبتين بصل مفرومين
وبس يذبل تنزلين
خليط لحم مفروم ١/٢ لحم بقر ونص لحم غنم
وتحمسينهم لين يتغير لونهم تنزلين عليهم م و زنجبيل
و م و ثوم
ورشه من نفي بهارات المرقه :
كركم كمون لومي اسود فلفل اسود ملح و
كاري
زياده عليهم رشه هيل ودارسين
فردي عجينتهج وحشيها وبقشيها
وعلي النار ع المرقه حيل علشان تبقبق
وسقطي فيها القبوطات بعاد عن بعض
وبعدها قصري النار
و غطيها من ساعه لي ساعه وربع
وبالعافيه
وبالعافية
