طريقة المحلى السهل

طريقة عمل المحلى السهل بالصور من مطبخ أم سميه

mahalla dates saudi arabia recipe in arabic

في البرد تحلى الاكلات الشعبيه الشتويه وانا احب اسويها مثل المحلى اللي هو عصيدة التمر

عاد المحلى ما يحلى الا بالشتاء بذا الوقت

الطريقه بسيطه مره وسهله

ومحلى التمر السهل اخذت طريقته من الاخت نجلاء القاسم فالف شكر لها لانها وهذي ثاني مره اسويه لأنها سهلت المحلى بطريقتها الله يسعدها

مقادير ومكونات وطريقة عمل محلى التمر السهل :

اخذت تمر معجون او بقايا التمر الي يبقى وناشف عندي

صبيت عليه مويه دافيه مقدارها كاسه ونص

واحركه على النار حتى يذوب

وتكون النار واطيه حتى مايحترق التمر

لازم يذوب التمر نهائي

واذا فيه بقايا مثلا قشور او قطع نفرمه بالمضرب الكهربائي او بالخلاط

ونرجعه للقدر

نرشه بملعقه صغيره ملح

واذا تحبون حلاه زايد حطي فنجال سكر

نذوب ثلاث كاسات دقيق بماء دافي

ونخلطهم حتى يسير قوامه خفيف مثل قوام البان كيك

نصب الدقيق السائل على التمر

ونحرك بالمضرب اليدوي الين يمتزجون

وممكن نحط ربع اصبع زبده للي يحب

ونحرك ونغطيه

وكل نص ساعه نحرك المحلى حتى ما يتكتل

نتركه المحلى على النار

وتكون هادئه جداً حوالي ساعه ونص

وبعدها اقدم المحلى

وازين المحلى بالمكسرات والسمسم والحبه السوداء حسب الرغبه

صحة وعافية على قلوبكم

و علينا و عليكم بألف عآفية