طريقة عمل القرقوش السوداني بخميرة اللبن
طريقة عمل القرقوش السوداني بخميرة اللبن بالصور خطوة بخطوة من اكلات مطبخ سمسماية
وصفة الشريق او القرقوش بخميرة اللبن من المطبخ السوداني
لعمل القرقوش و كيف يصنع؟! الطريقة بالخطوات
مكونات ومقادير عمل عجينة القرقوش السوداني :
كيلو دقيق
كوب سكر
خميرة لبن
قليل من الملح
2/1 كوب زيت
قليل من الكمون الاسود
ماء دافئ للعجن
الطريقة لعمل وتحضير القرقوش السوداني :
في البداية نعمل خميرة اللبن
مكونات خميرة اللبن
2/1 كوب لبن حار جدا + ملعقة عدس
يوضع العدس مع الحليب الساخن فى علبة محكمة الغطاء
وتوضع فى مكان مظلم لمدة 24 ساعة
بعد ذلك تتكون خميرة اللبن
ويصفى جيدا بقطعة قماش
ويؤخذ الماء واللبن دون حب لعدس
ويخلط مع قليل من الدقيق فيتضاعف (كالخميرة الفورية)
اذا لم تكن الخميرة ناجحة يمكن اضافة م ك خميرة فورية لها
الطريقة لعمل القرقوش
تخلط المقادير الجافة مع الدقيق
ويبس بعد ذلك بالزيت جيدا
تضاف الخميرة السابقة للدقيق
ويخلط مع اضافة الماء
وتعجن حتى تتكون عجينة طرية سهلة التشكيل
تترك العجينة حتى تتخمر
تقطع العجينة على شكل اصابع
وترص متقاربة جدا
وتوضع فى الشمس حتى تتضاعف
تخبز فى فرن متوسط الحرارة
حتى تتحمر
يترك حتى يبرد تماما
ونقوم بفصلة بسكين بخفة
يرص القرقوش فى صينية اخرى على وحهه الاخر
ويدخل الفرن مرة اخرى ليتحمر
ويصبح القرقوش السوداني جاهز
سؤال وجواب
هل هذه الخميرة تصلح لكل أغراض الخبز يعنى تحل محل الخميرة العادية ؟
نعم تصلح لكل الانواع التى تضاف اليها الخميرة وتعطى المخبوزات طعم خاص
جربت عمل خميرة اللبن او القرقوش ولكن للأسف فشلت فشلا زريعا..و كانت النتيجة ان القطع اصبحت كالعجين المحمر…وانا شككت في البداية, عندما لاحظت ان خميرة اللبن بعد ان تركتها 24 ساعة لم تنتفخ عند اضافة الدقيق عليها, هل نضع ملعقة صغيرة ام كبيرة من العدس؟
بخصوص خميرة اللبن المفروض اللبن يكون ساخن (يعنى لا يصل لدرجة الغليان) ممكن تقولى فاتر والعدس ملعقة كبيرة
يصب اللبن فى (برطمان مربى كبير مثلا) ويضاف اليه العدس ويغلق باحكام ويوضع فى مكان مظلم (يعنى ممكن تلفى البرطمان بقطعة قماش وتدخليه فى الفرن او دولاب المطبخ لازم يكون مظلم بعد 24 ساعة بتجدى كأن اللبن تخثر (اللعدس واللبن على السطح والماء فى الاسفل ) بعنى بنفصل الماء عن اللبن المتجمد والعدس
واذا لم يصل هذه المرحلة اتركيه كم ساعة اخرى لانو احتمال الجو ما ساخن عندكم
بعد ذلك امزجيه مع بعض وصفى الخميرة (تخلصى من حبات العدس) ثم اضيفى قليل من الدقيق وستجدين خميرة رائعة
هل ممكن اعمل الخميره العاديه “الفوريه” بدلا عن الطريقة القلتي عليها
ممكن تعملي الخميرة الفوري 2 م ك للكيلو وتتبعي بقية الخطوات بيكون طعمه حلو بس خميرة اللبن عندها طعم مميز
ما ضبط معاي ماهو مقدار الدقيق على اللبن لعمل الخميرة وهل ضروري وضع القرقوش على الشمس بعد تقطيعه
مقدار الدقيق بسيط بمعنى قوامها بيكون سائل اذا انت في بلد جو بارد يمكن ما تضبط معاك الخميرة .. وممكن تستبدلي خميرة اللبن بخميرة فورية
واما وضعة في الشمس بيخلي الخميرة تتفاعل كويس وبيكون خفيف
جربت القرقوش طعمه حلو ومنفوخ بس تخين ولين من النصف
اذا كنت تقصدي بتخين كبر حجم القطعة لازم تكون العجينة صغيرة لانها بتنتفخ في االتخمير
اما لين بمعنى رطب بيكون رطب بس انت تسبيهو في الهوا يجف لان لو تلاحظي عجينته مثل الخبز فلازم يكون لين
العدس حب ولا مسحون
العدس بيكون حب
انا عايشة في انجلترا و الجو ابرد من السودان. الخميرة اتفاعلت كويس لكن العجين ما زاد كويس بالرغم من اني اضيفت بيكنق باودر. طبعا مافي شمس للخطوة الاخيرة في التخمير
بالنسبة للقرقوش بدل الباكنج بودر اعملي خميرة فورية وخليهو يضاعف ولما يستوي ويطلع بره الفرن خليه يبرد تماما بعدين فكيهو من بعض ولما تقلبيهو عشان يتحمر من الجنبات التانية ولع الفرن من تحت ونار تكون منخفضة نسبية عشان الرطوبه تطلع منو ولما يحمر ولعي فوق بنفس القدر او القبيهو للجهة التانية حيطلع معاك ممتاز
جربت الوصفه بس طلع تخين شويه بس الطعم رهييب
التخمير اهم مرحلة لازم يرتفع عشان ما يكون تقيل .. لو خميرة اللبن ما بتتفاعل معاك كويس اديها خميرة فوريه اخلطيها مع الدقيق وبعدين باقي المكونات خميرة اللبن
حسيت ان ١/٢ كبايه زيت شويه علي كيلو الدقيق. وانا استعملته كباية المعيار لقياس الكميات وعملته ٨ كبايات دقيق للكيلو صاح ام خطأ؟
الكيلو يساوي 6 اكواب دقيق غير منخول (مغربل) يعني مافي بين ذراته هواء والزيت ما شوية لان الزيت بصفه عامة ما بيخلي العجين يخمر بسرعة لو كتير
بالنسبة للمعة انا لما اقطع العجينة والفها اصابع بمسح يدي بالزيت عشات ما تلصق وتاني لما اخليه يخمر بعد التقطيع ما بغطيه فالطبقة الفوق بتكون زي القشرة كدا بيضربها الهوا عشانة كدا بتاخد الشكل واللون دا
ممكن ابدل خميرة اللبن بي الخميرة الفورية وكم يكون المقدار للكيلو الواحد
ممكن تعملي ½1 م ك خميرة فورية بس ياريت تعملي خميرة اللبن لانه الطعم الاساسي فيها ولو خايفة ما تخمر ليك العجين اضيفي خميرة فورية للدقيق وبتكون النتيجه رائعة
هل لخميرة اللبن رائحة غير مستحبة بعد مرور 24 ساعه لاني عملتها مرتين وبلاقي الماء انفصل عن اللبن بس بلاقي ريحه لاتطاق
ايوة عندها ريحة نافذة وقوية وبس دي ريحة التخمير
صحة وعافية❤️♥️
