مديدة الحلبة

طريقة عمل مديدة الحلبة بالصور من مطبخ الشيف السودانية مريم الحسين

وصفة مديدة الحلبة من المطبخ السوداني

مديدة الحلبة ودي ما الطريقة الوحيدة ولا بقول انها احسن طريقة في الدنيا، لكن دي الطريقة البعمل بيها، كالعادة الهدف انه يكون في مقادير وطريقة واضحة للمابعرفوا يعملوها…

طيب كل انواع المديدة بتعتمد على حاجتين… عنصر مُنكّه (يعني بدّي النكهة).. ده ممكن يكون حلبة او تمر، وعنصر يدي القوام وده عادة بكون دقيق او كورنفلور (نشا) او ود عمّه الكسترد او مزيج منّهم.. اهم شي في المديدة اننا نتأكد انه الحلبة استوت كويس جدا عشان ما تكون حبوبها قوية لما ناكلها.. بعد نتم الخطوة دي خلاص كده موضوع المديدة انتهى

how to make easy sudanese madeeda hilba recipe homemade

مكونات ومقادير والطريقة لعمل وتحضير مديدة الحلبة :

بالنسبة لي عشان اختصر الوقت بستخدم الحلبة المسحونة

نبدأ بي ملعقتين كبار سمنة في الحلة ومعاهم تلاته ملاعق كبيرة حلبة مسحونة

نقلبها تمام في السمنة ونخلي النار مرخية عشان الحلبة ما تتحرق ونقلّب تمام اصلنا ما نقيف

لاحظوا الحلبة مسحونة يعني بتستوي أسرع كتير من لو كانت حب

نستمر في التقليب كويس لحدي ما نشعر انه لون الحلبة بقى أغمق شوية.. على بُنّي كده.. ده لون التحميص

كده معناها الحلبة ماشه كويس ونكهة الحلبة بدأت طلع في السمنة

كل الفكرة من التحميص انه نطلّع نكهة الحلبة عشان واحنا بناكل بعدين ما نكون زي البناكل في عجين ما عنده نكهة

بعداك نكب فيها كبايتين موية

الهدف من الموية بعد ده انه ندي فرصة للحلبة تستوي

الخطوة الاولى كان الهدف نطلع النكهة

الخطوة التانية الموية لانها بارده حتبرّد ليك الحلبة وتديها فرصة تتسلق وتطرى وتستوي

وعشان نساعدها تستوي نكب ليها ملعقة صغيرة باكينج باودر

ده بساعد على انها تطرى وتستوي

طبعا الناس عادة بعملوا كربونات.. لكن دي حلبة مسحونه، ما عايزه حاجه قوية زي الكربونات او العطرون عشان تخليها تطرى

باكينج باودر كافي جدا..

بعداك كبي ليها ملعقة صغيرة ونص ملح

معروف الملح بخلي النكهات تبرز في الاكل

وبرضه بساهم في موضوع السوى بتاع الحلبة

اصلهم الكربونات والعطرون شنو! ما كلها أملاح..

بعد ده ارخي نارك اكتر وغطيها شوية وادي فرصة الحاجات دي تتفاعل مع بعضها

الخطوة دي اخر خطوة عشان نضمن موضوع النكهة القلناه قبيل

لأننا بعد شوية حنبدا في خطوات القوام

ما بتاخد زمن كتير في الحتة دي.. يا دوب مسافة ما تغلي الحاجات سوا

كبي فيها لتر كامل حليب

يعني علبة كبيرة بتاعت حليب السعودية

شيلي منه شويه ذوّبي فيها تلاته ملاعق كبيره حليب بودره

وكبيهم كلهم في حلّتك

دي طبعا الكمية المناسبة للتلاته ملاعق القبيل ديلاك

وما تقلقي لو شفتي الحلبة شكلها بقى كيف كيف .. الوضع بستعدل بعد شوية

حسي احنا عايزين طعم الحلبة يجي في الحليب

ودي ما عملية صعبة لانه الحلبة مستوية ونكهتها كلها موجوده في المويه الكبيناها قبيل ديك

ادي الحليب فرصة يغلي ويندمج مع المكونات.. وحياخد شوية من اللون بتاع الحلبة

لاحظوا انه لون الحلبة بُني بعد تتحمّص.. ما اصفر.. اللون ده بجي من الكسترد

في ناس يستخدموا الحلبة الحب وببلوها في موية وبعملوها

موية الحلبة بتكون مايله للصفار.. لكن بعد تجيها المويه والحليب لونها بخف شديد.. يعني ما بجيك اللون الاصفر ده الا بالكسترد

بعد ده نظبّط الطعم

كبي كباية كاملة سكر… ومعاها ملعقة كبيرة قرفة مسحونة

وسوطي عشان السكر يذوب..

كده بقى طعمها لزيز وما عندها اي مشاكل

نجي للقوام

في كوره كبي تلاته ملاعق كبيرة كسترد وتلاته ملاعق نشا (كورنفلور

وكبي معاهم موية بارده

وسوطيهم بالملعقة لحدي ما يتجانسوا تمام

لو ما عايزه اللون ممكن تعملي الملاعق كلها نشا

أصلا الفرق بين الكسترد والنشا هو في اللون (جاي من صفار البيض

لو عملتي الملاعق كلها كسترد بطلع ليك لونها اصفر شديد..

لو ما عندك نشا او كسترد.. ممكن تستخدمي الدقيق… بس الدقيق عيبه انه براه في النار ممكن يديك طعم ني كده

في ناس، زي بت خالتي جولي، بعملوا الدقيق زي البشميل

يعني ياخد فرصة يتقلب في زبده او سمنه او زيت عشان الطعم الني بتاعه يروح

مهما كان الشي الاخترتيه للقوام

كبّيه في حلّتك ديك

وحرّكي بي مضرب الشبك

نارك مرخية وحرّكي بسرعة.. عشان ما تعمل ليك كلاكيع

ولو لا قدر الله عملت.. أبدا ما نهاية الدنيا

تجيبي خلاطك اليدوي وتديها “ورّه” ترجع ناعمة حرير

كبيها في صحانتك ومن فوق ليها سمنة

وزّيني مديدة الجلبة بي رشّة قرفة مسحونة..

كل ما تبرد المديدة كل ما قوامها بقى اظرف

لكن تتاكل دافيه.. ما تخلوها تبرد شديد

ودي طريقة لناس التجهيز المسبق

عملته كتيره ومركّزه امس بالليل

الليلة الصباح فطّرته بيها نادر قبل يمرق

طلعت حلوه شديد

الخطوات لحدي ما نكب الموية زي الوصف الفوق هنا

بعداك في حلّة تانية او طوّة

نكب حوالي اربعة ملاعق زيت ومعاها ستة ملاعق دقيق

ونخليهم على نار هادية عشان الدقيق يحمّص

بعداك ذوّبي تلاته ملاعق كسترد في مويه بارده

وكبيه مع الدقيق وأطفئ النار وحرّكي سريع

حيبقى ليك عجينة كده

ضيفي العجينة دي للحلبة والموية

وقلّبي سريع… حتطلع ليك زي الصورة الفوق دي

كده انت جاهزه

خليها تبرد ودخليها التلاجة… متى ما تحبي تعملي مديدة في ثواني تجهز… وبالكمية العايزاها

الليلة الصباح شلته ٣ ملعقة كبيرة من الحلبة

وختيت معاها خمسة ملاعق سكر وقرفة مسحونه وكباية حليب

وحركتهم سوا لحدي ما اندمجوا

لو حسيتي انها تقيلة كبي حليب لو حسيتيها خفيفة كبي زيادة حلبة

ده شكلها النهائي

صحة وعافية❤️♥️