بسكويت العيد السوداني
طريقة عمل بسكويت العيد السوداني بالصور من مطبخ الشيف السودانية سمسماية
وصفة بسكويت النشادر العيد من المطبخ السوداني
sudanese eid biscuits recipe
مكونات ومقادير عمل عجينة بسكويت العيد السوداني :
1 كيلو دقيق
1كوب سكر
1كوب زيت
1كوب حليب دافئ
وقية نشادر
م ك باكنج بودر
فانيليا
من 4_5 بيضات
رشة ملح
رشة قرفة (اختياري)
الطريقة لعمل وتحضير بسكويت العيد السوداني :
يوضع السكر والزيت والبيض
ويخفق جيدا
ثم تضاف الفانيليا والقرفة
يوضع النشادر فى اللبن الدافى
ويحرك حتى يتفاعل
ويصب فى الخليط السابق
يضاف الملح والباكنج بودر الى الدقيق
ويضاف الى الخليط السابق بالتدريج قليل قليل
ويعجن ختى تتكون عجينة ملساء سهلة التشكيل
وتترك لمدة نصف ساعة
يقطع العجين بواسطة قمع مخصص يربط على المفرمة اليدوية او الكهربائية
يقطع العجين الى اشكال طولية
وتلف قليل قبل ان توضع على الصينية
يجب دهن الصينية جيدا اولا
يخبز البسكويت فى نار متوسطة حتى يصبح لونه ذهبيا
ويصبح بسكويت النشادر جاهز
سؤال وجواب
عايزة اعرف وقية النشادر كم ملعقة
الاوقية بتساوي 2 م ك (ملعقة طعام)
عملتو وجيت طبعا الطعم روعة وهشاشة جميلة بس الملامح غير واضحة انا كنت عايزة ينفش بسيط حتى لاتتغير الخطوط وعايزاهو يتوسع بالجوانب يعنى عايزة لية واحد منظر حقى دا بتاع اكل مافية منظر عملتو بالبوصة افتينى
طالما الطعم جميل وهو هش 90% تمام بس القمع الاستخدمتيهو هو البحدد شكل البسكوين
انا بحب القمع الاستخدمتو في الوصفة وبخليهو ضيق يعني سنونو للداخل عشان العجينة تطلع زي المحفورة لما يتنفش بتظهر الاشكال
تانيا: احتمال العجينة لينة شوية لانو زي ما عارفة الدقيق بختلف وحجم البيض برضو بمعنى لوحسيتي العجنة لينة ممكن تضيفي دقيق شوية شوية
هل يمكن أن أستبدل الزيت بالسمن؟
طبعا وبيكون ابداع لانه نكهة السمن غيييييير
ما عارفه مقاس الكبايه بالضبط محتاره والعيد علي الابواب ياريت اعرف المقاس بالضبط
الكوب مقاس 250مل او استعملي كباية العصير في البسكويت تحديدا
انا عملتو طلع منفخ وحلو لكن من جوة لين
حمرتيه كويس؟ لين ولا رطب؟ طالما منفوخ وخفيف بيجف ان شاء الله بس خلي الهوا يضربو لكن دايما نخلي الحرارة متوسطة عشان يتحمر علي راحته وأكبر كمية من الرطوبة تطلع بي كدا بيجف من جوة
من جوة رطب مازي حق الناس البكون هش ومقرمش
لازم النشادر تتأكدي انها جديدة وريحتها قوية ولما تختيها في اللبن تفور وتطلع من الكباية
هل يمكن استبدال البيض بالكستر
صراحة ما حصل عملت بالكاستر بس في ناس بتعملله بس بلاحظ انه بيكون جاف عكس اللي فيه بيض بيكون هش
والله مشيت سويتو بالكيلو دقيق طلع لين وزدت دقيق حاسه بالعجينه قويت اسوي شنو في الحاله دي ما بينفع ازيد زيت؟؟
العجينة في الاول بتحسي بيها لينة لكن لما تعجني بتبدي تشرب وتتماسك وتلم يعني ما كنتي تزيدي الدقيق قبل العجينة ما تفك من يدك
اضافة زيت بعد كدا ما بتنفع ولا حليب لانه صعب بيكون العجن اعمليه كدا يمكن في المكنة يلين شوية بس لازم تخلي في بالك تتقيدي بالمقادير
عايزه اعرف المكنه المستعمله فى الصوره دى .اسمها شنو ؟
بالنسبة للمكنة دي مفرمة لحمة مولينکس
ممكن بديل للنشادر لانو هنا مالقيتو
النشادر ما ليه بديل بس بتلاقيه في القسم بتاع الخبائز بيكون برطمان مثل برطمان المربي مكتوب عليه نترات الامونيا
ما ممكن نقلل البيض وتبقي 2بيض فقط
ممكن طبعا بس بالمقابل كمية الدقيق ح تقليليها او تزيدي الحليب والطعم بيفرق شوية
انا بعملوا طوالى لكن بيكون هش وبتكسر السبب في رايك
حاجات كتيرة بتخليه هش مثلا النشادر بيكون كتير .. او شكل القمع المفلطح بتكسر اسرع من المبروم .. ولو الدقيق ما كفاية يعني العجنة لينة
صحة وعافية❤️♥️
