نظام فيافي للنفاس

نظام فيافي للنفاس

طريقة عمل برنامج نظام فيافي للنفاس بقلم الاخت فيافي

كثير منكم سمع عن نظام فيافي للنفاس

ان الذي جعلني اتطرق لهذا الموضوع لحزني على كثير من النساء اللواتي لا يعلمن عن ادق خصوصياتهن وقد يكون الموضوع حساس ولكنه مهم جداًَ

ولقد قرأت في احد المواقع عن فتاة تسأل طبيب عن خروج هواء وصوت من منطقة المهبل وماهو وما علاجه فلم يعطها اجابه شافية.. ولذلك حزنت لأن عندي الأجابه للأسف انها خربانه..نعم ارحامها خربانه لأسباب صحيه سيئه لم تلتزم بها اثناء فترة الحيض..والحمد لله ان جدتي (الله يرحمها) كانت تعرف بهذه الأمور وقد اخذت عنها الشيء القليل واريد المنفعه للجميع ان شاء الله

ان السيده الخربانه لاتعيش حياة طبيعيه سواء تزوجت او لم تتزوج لأسباب وهي:

علامات الخراب التي تسبب لها الكثير من الإحراج وخاصة في المراحل المتقدمة

ايضا تكون سبب في عدم السعاده الزوجية للمتزوجين وخاصة الأزواج لذلك تجد الزوجه تشعر بنفور الزوج ولا تدري ما السبب

وسوف اضرب لكن امثله :

ورد الجوري رائع المنظر والرئحه كريه الطعم ولو اجبرتي على اكله لكرهتيه, الكيوي كريه المنظر لارائحة له ولكن لذيذ الطعم لذلك تحبيه وتنسي شكله ,اما اليوسف افندي حلو المنظر حلو الرائحه حلو المذاق , فالمثال الأول للمرأه النظيفة الجميله ولكن خربانه, الثاني للمرأه القبيحه التي لاتهتم بنفسها لكن (جنان) يعني حلوه من جوا غير خربانه, اما لأخيره فهي الجميلة المظهر والرائحة وممتازه جدا من الداخل

علامات الخراب ماهي:

خروج سوائل بكثرة طوال اليوم تقريبا
بعض الحالات معها رائحة كريهه
بعض الحالات يخرج منها هواء من منطقة المهبل مع صوت محرج

مسببات الخراب كثيرة:
وكلها اثناء فترة الحيض او النفاس او العوار

وان شاء الله تدعون لي

الآن سوف اصف لكن الرحم السليم والرحم الخربان :

الرحم السليم يكون ناشف متعافي ليس فيه تسلخات او لزوجات ويكون بطانته الداخلية (اي اللحم) متينه وقوية, ومثال عليه خذي قطعة لحم طازجة(غنم او بقر) وانظري اليها وملمسها طبعا قبل غسلها تكون ناشفة وليس فيها لزوجة .

اما الرحم الخربان يكون رخو وبطانته الداخلية مهترئة ومثال عليه خذي نفس قطعة اللحم ثم دقيها لترقيقها قليلا ثم ادعكيها بصابون ودعيها لمدة يوم في الثلاجة وانظري ماذا يحل بها؟تكون لزجة ورخوة ومرعبة.

ولذلك نجد ان البنات بعد الزواج يعانين المشاكل ولا يدرين ما السبب

هناك امراض اخرى يصاب بها الرحم اذا لم تهتمي في فترة الحيض والنفاس وهي:

اولا:

الفَقرة بكسر الفاء وهي بقاء الدم وتجمده وسده للمبايض ويسبب العقم للأسف وهذا لاتكشفه الأشعة بأنواعها مع تطور العلم ويسبب الآلآم شديدة وقت الحيض, وكثيرا ما سمعنا عن حالات لم تحمل لمدة طويلة وبعد ذلك تكتشف ومن خلال المنظار ان هناك عوار لم يسقط كاملا ثم تيبس في ارحمها

واعرف امرأة لم تحمل لمدة 13 عام وبعد ان اعيها التعب مع رحلات العلاج ذهبت الى امرأة متخصصة بالطب العرب والحمد لله اعطتها دواء فأنزل دم فاسد متجمد بحجم كرة التنس وهذا لايعني ان نهمل المستشفيات بل على العكس نعالج الألتهابات وغيرها ثم نكمل بالعلاج العربي

ثانيا:

انقلاب الارحام ويسب العقم والم شديد فترة الحيض وممكن كشفه في بعض الحالات في المستشفى اما المتزوجات فهو يسبب الم شديد

ثالثا:

ميلان الارحام اما للخلف اولليسار او لليمين ايضا يسبب عقم اذا ترك ولم يعالج في الوقت المناسب لأن الميلان يلتصق على تلك الوضعية ويسبب الم مع منطقة الميلان.

ولان لابد انعرف المسببات للخراب والأمراض الأخرى لتجنبها وهي:

اثناء الحيض او النفاس او العوار عليك تجنب الأتي:

الجوع الشديد(يعني رجيم يوقف) او التخمة الزائدة
الأكلات اللزجة مثل الملوخية, الباميا,البصل الاخضر,القرع,الشمام ,البطيخ
الحوامض خاصه الليمون, لاباس بأكل برتقاله في اليوم ولكن بعد الشبع ( لاتكن حامضه )
الأيسكريم,الجوامد بشكل عام
تعريض القدمين للماء او المشي حافية على البلاط البارد او الأستحمام بكثرة
او اخذ دش مهبلي ويجب المحافظة على النظافة اليومية
المشروبات الغازية
حمل الأشياء الثقيلة او سحبها وهذا لايمنع الحركه والعمل بل على العكس اعملى الأشياء السهله وتحركي لكن لاتجهدي نفسك فوق طاقتها
العنب الحامض والرمان والكيوي والاناناس والمنجا
ممنوع الرياضه العنيفه اثناء النفاس او الدوره

واحب ان اوضح ان هذا النظام يصلح للمرأة الخربانه سواء متزوجه او غير متزوجه ويصلح للنفساء ايضا حتى لو لم تكن خربانه.. اما التي تعودت على نظام معين للنفاس في جميع ولاداتها وارتاحت عليه ولاتحس بالخراب فيجب ان تكمل على نظامها افضل ولاتتبع نظام فيافي

نظام فيافي للنفاس يقسم الى فترتين:

1- الفترة الاولى : ال 20 يوم الاولى في النفاس او ال 3 ايام في الدوره

2- الفترة الثانيه : ال 20 يوم الاخيره من النفاس او اليوم الرابع للدوره وحتى نهاية الدوره

ملاحظه هامه جدا :

افضل نتيجه لهذا النظام يكون خلال النفاس مع ملاحظه ان الدورة الشهريه التي تلي النفاس مهمه جدا جدا .. ويجب الاستمرار عليه حتى 3 دورات وراء النفاس حتى يعطي النتيجه المرجوه بشرط الالتزام الكامل والصارم ..اما اذا تم تطبيق النظام بدون نفاس فيطبق 40 يوم مع بداية الدوره واذا جاءت الدوره التاليه خلال ال 40 يوم نقلب الايام ونلتزم بالنظام حسب الدوره واذا انتهت الدوره نكمل النظام عادي الذي كان قبل الدوره .. اي نطبق اخر 20 يوم .. مع الرجاء الالتزام بالنظام للدورات الثلاث المقبله

خوا جوا
خوا جوا
رشاد ( الحبة الحمراء )
رشاد ( الحبة الحمراء )
محلب
محلب

ملخص النظام كله من أوله لآخره:

(((الايام الاولى)):

20يوم من النفاس
و3 ايام الاولى من الدوره

في الصباح وعلى الريق تأخذين مع هذا السفوف ( اللهوم )

بعد جمع نباتاته وطحنها وتأخذين منه 2.م.ك

{ كوب حلبه+ نصف كوب حبة سوداء + مقدار فنجال حبة حلوة(شمر) +م.ك قرنفل}

وتلهمينها وتشربين بعدها كوب حليب

بعد ذلك تتناولين التالي:

تمر معبوط (وياليت تكون عجوه) + م.ك. سمن غنم او زبدة

يطبخ على نار هادئه لمدة 10 دقائق ثم يضاف إليه حب الرشاد وهو ناشف بدون غسيل وكثري شوي

او تستعيضين عنها بعصيدة التمر المحلاة وهي عباره عن

( كوب تمر بدون النوى + 4كوب ماء)

ثم توضع في الخلاط وتصفى

ويضاف اليها كوب دقيق اسمر ثم توضع على نار هادئة مع التحريك حتى تثخن مثل الباشميل

يستغرق طهيها ساعة تقريباَ

ثم تضيفين إليها فلفل اسود

ممكن تعبينها في علب بلاستيك على كميات

وتوضع في الثلاجه وكل ما بغيتي تأكلين تطلعين علبه وتحميها

بعد ذلك بنصف ساعه تقريبا الافطار وهو على رغبتك لكن ابتعدي عن المعلبات

بعد ساعه اشربي شاي الاعشاب ممكن تحليه بسكر نبات او عسل

وانا افضل العسل الطبيعي وتأخذين منه مقدار 3.م.ك مع 3كوب ماء وتغليه

وهو مكون من النباتات التاليه

{ نصف كيلو ميرميه+ اعواد شيح+ نصف كوب كمون+ قليل من قشر قهوه+ نونخه+ دارسين او ماتسمى بالقرفه + يانسون}

وممكن انك تضعين باقي المقادير التي لم احدد بقياس كوب من كل نوع

ومن الممكن زيادة الماء اذا كانت مره .. واذا ذابت المكونات وقلّت اضيفي غيرها

بعد الغداء بربع ساعه عليك بمنقوع التالي:

في كوب ماء وسط او صغير

( م.ك.عنزروت+م.ص.مره+ شوي محلب ..لاتكثرين المحلب بس نتفه)

لانها تعمل كمهضم وملين وتنظف الأمعاء

ولابأس من اضافة الماء اليها كلما انتهت الكميه واستخدامها لاكثر من يوم

طبعا توضع في الثلاجه وقبل ما تشربيها بنصف ساعه طلعيها من الثلاجة.

فترة العصر وبعد الغداء ب3ساعات اشربي شاهي الاعشاب السابق مع 2.م.ك من السفوف السابق

(( الايام الاخيرة)):

نفس تسلسلك بالادويه ولكن السفوف يختلف وهو مكون من

{كوب حبه سوداء+ م.ك. قرنفل+م. ك قرفه + م. ك. فلفل اسود+ م.ص. محلب + فنجان كمون + م.ك. نونخه+ فنجان حبة حلوة(شمر)+ فنجان رشاد}

تطحنين جميع المكونات ماعدا الرشاد

*استمري على التمر والرشاد والسمن لانه ينظف الارحام

*تستخدمين منقوعة العنزروت نفسها بس زيديها وزيدي كمية المحلب و زيديها شوي مباركة او ماتسمى بالصبرة

*تستخدمين شاي الاعشاب نفسه

تعملين كبو كل ليله وهو كبو الهواء وهو مكون من

{ خوا جوا+مرة+كمون+حلتيته+محلب+قشر + قشر بصل يابس من البيت وليس العطار+ هدب اثل+ فلفل هواء}

وفيه حبوب صغيره حمرا يابسه مثل الخرز هذي شيليها مو زينه

استخدمي التحميلات من اول يوم او اذا بغيتي يوم وراء يوم وهي مكونه من

{م.ك. مرة مطحونه+ فنجال ملح (اما فارسي او خشن)+ م.ك.محلب مطحون}

واعجنيهم بعسل قليل مع تبليل الاصابع بالماي حتى يسهل تكويرهم

وشريهم في تيارات هواء بدون غبار لمدة يومين او حتى ينشفون

وبعد ماينشفون احفظيهم في مكان جاف ومو شرط في الثلاجه.

بالنسبة للتي تعاني من ضعف في المبايض

خذي مطحون الحلب كل صباح قبل الافطار بقليل مع كوب حليب

واستمري عليه وان شاء الله يكون الحمل مع شاي الحلب لابأس ان يشاركك الزوج في شرب الشاى اذا كان يعاني من ضعف.

او خذي بار النخيل+ عسل طبيعي اخلطيهم مع بعض مقدار .م.ك كل يوم على الريق ولابأس ان يشاركك الزوج.

بالنسبة لنزيف الارحام

وهو يصيب في حالات الحيض فقط نتيجة لحمل شيء ثقيل فيحدث تمزق للارحام

عليك بالتالي:

مقدار فنجان قهوه حلب+ كبر حبة الحمص شبة سوداء

تطحن مع بعض ثم تأخذين مقدار ملعقة صغيرة مع كوب حليب على الريق كل صباح

وسوف تلاحظين وقوف النزف.

نكمل موضوعنا بالنسبة لعلاج النساء الخربانات عليها أن تتبع التالي :

النظام الغذائي السابق عليها أن تتبعه في فترة الحيض أو النفاس أو العوار أما إذا كانت الحالة شديدة يعني تعاني من خروج هواء من المهبل أو خروج سوائل فعليها اتباع النظام السابق لمدة أربعين يوم وكأنها نفاس حتى وإن لم تكن باستثناء أنها تستطيع الاستحمام والوضوء عادي وقد يكون علاجها يحتاج مدة طويلة وتستمر على العلاج كل حيضة ولن تصدقن إذا أخبرتكن أن سيدة اعرفها شخصياَ لم تعتني في نفسها فترة النفاس فأصيبت بالهواء والسوائل معاََ وهو شيء خطير جدا

لذلك اتبعت النظام السابق بصرامة + استخدمت عشبة تسمى (جنبة) وشربت مغليها يوميا

وهذه العشبة نوعان

النوع الأول تسمي ( جنبة النفود) ولا انصح بها لانها حارة على الأرحام

اما النوع الثاني تسمى( جنبة البر) وهي ممتازة وانصح بها وانا استخدمها في بعض الاحيان

ولكن اتمنى لو اريكن شكلها حتى تعرفنها, واهم شيء للخربانة ان تأكل التمرة مع الرشاد التي سبق واعطيتكن وصفتها , والعلاج يحتاج الى صبر لأنه قد يستغرق مدة 4 اشهر وإن كانت متزوجة لاتقول شيء لزوجها وتشاهد فقط انطباعته لأنه ما أن يتعدل وضعها الصحي فأنه سوف يصارحها بأنها مختلفة , وأنها افضل ويزول السبب الذي كان يجعله كتوما معها

اما انقلاب الارحام والميلان فلا يعالج بالادوية لانه لابد من الذهاب الى امرأة متخصصة ويكون على جلسات ( مخبنة وتمريخ) ولابد أن تسارع المرأة المريضة بالذهاب الى مرأة متخصصة حتى لايكون عقم لاسمح الله .

علاج السقط (العوار)

اذا تعرضت السيدة الي السقط او مات الجنين داخل الرحم فعشان ينزل عليها بالتالي :

سبحان الله اذا كان الجنين حي لا يصيبه اي شي مع هذه الادوية

مغلي شجرة العوار وتلقيها عند العطار والافضل سفة كمون مطحون+ مغلي الكمون محلى بعسل

لحد ماتنظفين

او فقع مسلوق +مويته السلق+ سمن بري

عشبة المرة
المرة
عنزروت
عنزروت
حبة حلوة - شمر
حبة حلوة – شمر

الغداء والعشاء طوال النفاس

الغــــــــــداء:

ممكن مطازيز مع لحم +لوبياء
ممكن مقلقل لحم فقط مع خبز بر
ممكن مشاوي مع ايدام لحم بدون خضار او الخضار التالية( حبة بطاطس ,لوبياء حمراء) خففي من الطماطم لانها حامضه
ولا بأس في الفاكهه بعد الاكل مثل تفاحه او برتقاله ( ماتكون حامضه)
تجنبي الموز لانه لزج
اذا جعتي كلي ماتشتهي نفسك إلا الممنوع ممكن شابوره بر

العشــــــــاء:

المجال امامك مفتوح الا الممنوعات اهم شي لاتجوعين

ممكن بعد العشاء تأكلين سلطه + برتقاله

هذا النظام الغذائي يستمر كل فترة الحيض او النفاس

* احرصي ان تضيفي الي اكلك الفلفل الاسود كذلك اللوبياء الحمراء مع المرقوق او المطازيز واذا عندك فقع ضعيه مع اكلك واعتمدي على البر لانه جدا مفيد

*بالنسبه للنظافه ممكن الاستحمام كل اسبوع

اما يوميا فتغسلي من الرقبه الي السرة بماء وصابون عادي وتجنبي وصوله الى المناطق الأخرى

الغسول التالي لمنطقة المهبل وهو:

( ارطا يكسر+ يطبخ مع ماء + ملح فارسي )

تلاحظين لونه يتحول الى الاحمر لاتخافي عادي ثم صفيه وضعيه في جركل وتوضي منه يومياً

طريقة التبخر بالكبو

اذا جيتي تتكبين خذي من المخلوط مقدار ملعقتين كبار وحطيهم على الفحم

ووقفي تحت المدخنه او ممكن تحطين المدخنه تحت كرسي مفرغ وتجلسين على الكرسي وبكذا يدخل الكبو

المكروشه:

المكروشة ممتازة جدا بس تبي الحذر والتعامل الجيد مع البخار عشان متسبب حروق:

خذي كرش ذبيحة غنم لاتكون مقطعه يعني على شكله

غسليها ونظفيها وبعدين احشيها بأدويه مثل:

(كمون +فلفل اسود+حبة حلوه+دارسين(قرفه)+حلبه +محلب+نونخه+ماش+قيصوم+شيح+يانس ون+ميرميه+حزاة+الحبة السوداء+قرنفل)

وبعدين تخيطينها وتحطينها في قدر كاتم لمدة ساعه بعدين تسكرين النار ولاتفتحين القدر خلي الهواء ينسم مع الفتحه المخصصه

بعدين بربع ساعه خذي القدر معك داخل بطانيه وافتحيه شوي شوي واستنشقي البخار واذا تقدرين تاكلين منها يكون احسن وبعدين اجلسي لك شوي انتي ومتلحفه بالبطانيه وخلي احد يروح ويوزنلك الدش على ماء دافي وقومي وانت والبطانيه وادخلي تحت الدش وتروشي ,والهدف انك ماتطلعين من تحت البطانيه عشان ماتتعرضين لتيارات الهواء المختلفه ويكون الماء اللي تتروشين تحته دافي .وكذا تمت العمليه كامله .

ارطا للنفاس
ارطا
هدب اثل
هدب اثل
حلتيته
حلتيت

ملاحظات هامه:

* يجب عمل كمية من السفوف ( اول 20 يوم ) تكفي لاربعين يوم ( 80 ملعقه كبيره ) للصبح والعصر ( ملعقتين في كل مره )

* الهمي السفوف او اللهوم واشربي بعده على طول كوب حليب قليل الدسم مغلي وفاتر محلى بعسل اسود افضل ولاتخلطي اللهوم بالحليب حتى لايلصق بالفم

* لاتاكلي لبنه او جبن حامض في الافطار

* الغسول طوال الاربعين مرتين باليوم او مره افضل

* التحاميل اخر 20 يوم وتأخذ كل يوم او يوم ورا يوم وتوضع وانتي جالسه حتى لايدخل هوا والافضل ان تتغطي بشرشف وذلك قبل النوم

* من الافضل استخدام التحاميل من اول يوم لانها تنظف وتطهر وتسحب الالتهابات لكن اذا كنتي خائفه خصوصا مع تأثير الملح الحارق استخدميها في اخر 20 يوم او عند توقف الدم والتئام الخياط

* ممكن عمل التحاميل ووضعها في علبه وكل مره تاخذين كبر حبة النوى وتستعملينها ( بناء على تجربة احدى عضوات المنتدى )

* يجب تجفيف التحاميل تحت الشمس في مكان نظيف حتى يمنع خرابه ويجب التاكد من انها ناشفه تماما قبل وضعها في علبه زجاجيه حتى تمنع تعفنها

* اذا الجو بارد احفظي التحاميل خارج الثلاجه واذا الجو حار احفظيها في غرفة بارده بشرط التأكد من انها ناشفه حتى لاتتعفن

* اكثري من منقوعة العنزروت اخر 20 يوم

* نظام فيافي لايزيد وزنك كثيرا وربما السبب منقوعة العنزروت ( بناء على تجربة احدى عضوات المنتدى )

* اضيفي الماش الى طعامك وممكن اضافة مجروش الماش مع السفوف لان الماش يقوي الظهر والعضلات ويعوض الدم

* كمية شاي الاعشاب المغلي تكفي لمرتين باليوم بشرط وضعها في مطاره حافظه للحراره بعد غليها صباحا حتى تظل ساخنه للعصر

* الافضل عدم غسل الراس الا بعد اسبوع واذا غسلتي شعرك اغسليه بالمغسله وليس تحت الدش او البانيو .. يعني اغسليه بدون الجسم وغطيه جيدا حتى لايدخل هواء للاذن ويصيبك ( خوا الراس ) وهذا يسبب خراب شديد للارحام مع صداع شديد ومستمر للراس

* لاتتنقعي في بانيو لان الماء يدخل الارحام ويفسدها واستحمي مره بالاسبوع بشكل سريع

* عند التبخر بالكبو البسي ملابس واسعه بدون ملابس داخليه تحتيه وتغطي جيدا بشرشف وبعد التبخر اذهبي مباشره للفراش مع التغطي جيدا ( طبعا ارتدي ملابسك الداخليه وانتي بالفراش ) ويجب ان تتكببي قبل النوم مباشرة والافضل بعد ارضاع الطفل وبعد نومه .. ولاتتبخري في نفس الغرفه

* قللي المحلب في الايام الاولى في منقوعة ( المره والمحلب والعنزروت ) وكثريه في الايام ال 20 الاخيره

* الحبه الحلوه هي نفسها الشمر وليس الينسون

* ابتعدي عن السكر واستبدليه بالعسل الطبيعي لان السكر يمنع التئام الجروح عكس العسل الذي يسرع في التئام الجروح

* لاتشربي الحلبه نهائيا فكمية الحلبه في اللهوم اول 20 يوم كافيه لان كثرة الحلبه ترخي وتسمن

* لاتشربي الماي على جوع ولاتكثري منه ولاتقللي واشربي بالمعقول لكن على شبع ولاتشربي الماي البارد.. لان كثرة شرب الماء تكبر البطن وتسبب خراب للارحام

* من الممكن اكل المشمش والعنب والكرز والخوخ لكن على شبع

* اذا لم تجدي قشر القهوه ممكن الاستغناء عنه ولكن ضعي مع القهوه التي تشربينها ( القهوه المره طبعا ) ضعي القرنفل

* لاتأكلي الرشاد في اول 20 يوم الا مع التمر .. اما في ال 20 يوم الاخيره يؤخذ مع السفوف والتمر

* الفلفل الاسود ممتاز مع الشوربات والايدامات والمرقوق والمطازيز .. اما التي تعاني من مشاكل في القولون والمعده او الربو لاتكثر منه

* المحلب ينشف وينزل الماء لكنه لايستخدم الا اخر 20 يوم لانه اذا استخدم اول 20يوم ينشف على خراب لذا يوضع القليل جدا منه مع منقوعة العنزروت

* لاتأكلي الرز بكثرة مره بالاسبوع تكفي لانه لايفيد .. فقط يكبر البطن ويسمّن واستعيضي عنه بالبر ونخالته

* تجنبي العطور خصوصا الريحان والمسك واكليل الجبل والتبخر بالمعمول لانه يسبب الشمم

* التمر والرشاد والسمن تستخدم طوال ال 40 يوم وطوال الدوره وكذلك الغسول

* للي تعاني من خراب شديد يجب ان تستخدم مغلي عشبة (جنبة البر)وهي تنبت في البر وتنشر اوراقها بشكل مستعرض وفيها اشواك ولونها اخضر باهت

* فائدة الاورطا انه يشد المنطقه ويمنع تعفنها

* اذا كانت المره سوداء فهذا يعني انها قديمه

* الافضل ان لاتكثري المحلب مع التحاميل اذا اردتي استخدامها في ال 20 يوم الاولى او اول ايام الدورة

* لاتكثري المره مع الكبو

اتمنى ان يكون النظام واضح والمعلومات الخاصه بالنفاس وترتيبه واتمنى ان تستفيدو منه وان تدعولي

كبو النفاس
الكبو

سؤال وجواب من بعض الاخوات

سؤال: مارائيك بالتبخر بالعفص خلال ايام الحيض وايضا الوضوء من منقوع العفص؟

التبخر بالعفص سمعت عنه لاكن لم اجربه ولكن نصيحهاياك ثم اياك وان تأكلي العفص مع سفوف لأنه يزين اول مرة بعد اكله ثم يدمر المرأة تدمير
ويخربها, اما الغسول فيه مانصح لأن مفعوله مثل الشبه وهي للاسف تخرب
والبخور

سؤال: ياليت تعطيني وصفة كيف اقدر انزل الدم الفاسد من الرحم كمان وصفة عن تاخر الدورة وكيف اجعلها تنزل في الاعشاب بعدين حبيت اسئلك في وحد تستخدم السكر النباتي في منع الحمل بحيث تاخذة مثل التحميلة صراحة انا مرة مستغربة منها لاني احس انها تخرب الوحدة بس حبيت اسئل

الدم الفاسد اذا قصدتي الحيض فعليك بمنقوعة المرة والعنزروت او اطحني التالي(فنجان حبة سمراء+ 2.م.ك مرة) ثم خذي م.ك. الصباح على الريق مع قهوه اليومين الأولات , اما اذا كانت عوار فلها اكثر من دواء حسب الحاله
اختي
اول مره اسمع ان السكر يمنع الحمل عليك بوسائل منع الحمل المضمونه اما تحميلات السكر اثناء الدورة او النفاس لاتساعد على التأم الجروح واحس انها تخرب

سؤال: من بين الوصفات اللي ذكرتيه الحلبة،واسمع البعض يقول انها تخرب وتخرب مرة بعد،وبعضهم يقول السبب في توقيت استخدامها يعني ما تستخدم في الايام الاولى،صدقيني احترت من كثر ما سمعت،،،

هذا السر في التعامل مع الطب العربي
الحلب (الحلب هو حمع الحلبة بالغة العربية يعني الحلب هو نفسه الحلبه) يستخدم العشرين اليوم الاولات من النفاس او الثلاث الايام الاولى من الحيض واذا زدتي عن المده المعطاة سوف ترتخي عضلات الارحام لذلك تتحدد الحلبه بمدة الايام وفي اول الامر وياليت تقرين الموضوع بدقة شوي لاني الى الحين ما خلصته باقي ايام الحيض الاخيرة+ الايام الاخيرة من النفاس لان لها ادوية اخرى ومعلومة الحلب يختلف عن المحلب وكلها نباتات

سؤال: بالنسبة لشاهي الاعشاب انتي ماحدتتي المقادير كلة شوى شوى هل قصدك قبضة اليد ام بالكوب الاني نفسي اعرف المقادير بالضبط

بالنسبة للغسيل ماتعتقدين ان الملح حار لمثل هاذي الاماكن كذالك العسل مرة حار بعدين الارطا يكسر هل كذا اسمة ام لة اسم اخر لازم اقول ارطا ام فقط يكسر ام الجميع

( الارطا) نبات صحراوي وهو عبارة عن اغصان تكسريها ثم تطحنيها
اضافة الملح ضرورية واكيد بيكون حار لكن الملح مطهر في حلات الجروح ويمنع تعفنها ايضا يسحب السوائل الضارة من الرحم
العسل الطبيعي مذكور في القرآن وهو شفاء ومعروف انه يساعد في التأم الجروح فما بالك بالارحام بعد الولادة تكون متجرحه بشدة
اما شاهي الاعشاب اخلطي المقادير مع بعض ثم خذي مقدار 3 .م.ك واعملي الشاهي المقادير مرة اخرى( نصف كيلو ميرميه+ نصف كوب كمون + نصف كوب شيح + نصف كوب حبة سوداء+نصف كوب حزاة+ نصف كوب قيصوم +نصف كوب قشر قهوة+ نصف كوب نونخة+نصف كوب من اعواد الدارسين(قرفة) ) وهذة كلها نباتات

سؤال: اختي بغيت اسئل عن العسل اذا له فائدة معينة عند اكله اثناء فتر ة الدورة واذا له او معاه خلطة معينة ياليت تفيديني

العسل ممتاز خاصة الطبيعي ممكن تحلين فيه اكلك وممكن الشاهي وافضل شيء كما قال الرسول صلى الله عليه وسلم في مامعناه كل صباح ملعقة عسل + 7حبات من الحبة السوداء والعسل ممتاز في كل الاوقات ولو قلتلك عنه اشياء لاصابك التعجب من شفائه للامراض.

سؤال: اكليل الجبل ،،هل استخدامه يترتب عليه شي؟؟بالعربي هل له مضار؟

مفيد ومنحف ولكن يمنع من بات في فترة الحيض والنفاس اما النفاس بالعملية فهو قد يكون قاتل لها لانه يسبب الشمم وهو معروف عند الاطباء بالالتهاب العام يصاحبه ارتفاع في درجة الحرارة مع غثيان ,لذلك تجنبيه فترة الحيض وهي فترة بسيطة ثم بعد الانتهاء من الحيض عاودي استخدامه.

سؤال: عندي مشكلة الألم المصاحبة للدورة، ترى ما اهدأ الأ بالابر والمغذيات و يا ريت لو تشورين علي بشي تذهب بهذا الكابوس اللي ما اصدق يروح حتى استعد لجيته

ابتعدي عن الابر لانك لو لاحظتي في كل مرة يزيد الالم بعد الابر يعني تتعودين عليها وعشان تسكن الالم اولا انتي اذا كانت دورتك ماتنزل جيدا وبعدين يابسة يزي التراب وسوداء فانتي عندك سدد( فقرة) لازم تشربين مغلي الحلب في اليومين الاولات+ كوب حبة سمراءمطحونة+مرة فنجال وتتقهوينها على الريق وان شاء الله ماتشوفين شر
( الحبة السوداء+المرة) خذي منها ملعقة كبيرة مع عسل طبيعي على الريق يومين وفرجها ربي

سؤال: قبل يومين سالت امي عن الافرازات المهبلية عندي صارت كثيرة جداو مزعجة ولكن بدون رائحة لدرجة انها تسيل وقالت شي عادي انا غير متزوجه

اذا عندك سوائل وبهذا الشكل فاكيد عندك مشكلة لأني انا متزوجة ولا اعاني من ذلك ولله الحمد بسبب عنايتي بنفسي خاصة واني قبل الزواج كنت مهملة ولكن عانيت شوي ثم انتظمت على الادوية والنظام السابق واصبحت تمام ولذلك اتبعي النظام السابق واقرائي الردود ولكن بما انك بنت لم يسبق لك الزواج تجنبي التحميلات المهبلية

سؤال: انا مشكلتي الدوره تتاخر عندي شهرين وانا ماعندي اطفال بس سبق وصار عندي عوار وحاسه هذا السبب انه يكون في بقايا للدم مع الدكتوره تقول في عندي ضعف مبايض رغم اني سبق لي الحمل وسوال اخر هل في علاجات لتضيق المرأه؟

اذا عندك ضعف في المبايض ياليت تتبعين الادوية الي قلت عن الضعف وشي طبيعي تتأخر عليك بسبب الضعف ويا اختي ممكن انتي تكتشفي مقدار الضعف الي عندك استلقي على ظهرك وضعي اصبع السبابة والوسطى فوق السرة وتحسسي النبض اذا لم تحسي به جيدا فهناك ضعف اما اذا تحسستيه فالحمدلله وياليت تقرين الردود لان فيها المنفعة ان شاء الله بالنسبة لتضويق اتبعي النظام اثناء الحيض مع التحميلات وراح تشوفين الفرق

بنسبة لضعف الى عندك وعند الزوج اتبعو التالي انتي واياه وان شاءالله يكتبلك الحمل وثباته عليك بالحلب اشربي مغليه + م.ك حلب مطحون يوميا ولمدة شهرين اقل شي واذا صار حمل وقفي الحلب الطحون والمغلي او عسل طبيعي+ بار نخل+سبع حبات من الحبة السوداء لمدة شهر اقل شيء

سؤال: الاعراض هذي تصير بس للمتزوجات ولا حتى البنات اذا تعرضو لها يكونو بعد مصابين؟

الخراب يصيب البنات والمتزوجات ولكن البنات مايعرفون إلا بالافرازات

سؤال: ذكرتى للحمل (عسل طبيعي +بار نخل+سبع حبات من الحبه السودا) كم مقدار العسل ومقدار بار النخل؟

العسل مقدار كيلو وبار النخيل خذي جرم كامل وفتيه فيه ثم تؤخذ ملعقة كبيرة بعد ان تضيفي اليها 7 حبات حبة سوداء كل يوم انتي والزوج

سؤال: فيما ذكرتى في المنقوع محلب او حلب ؟

اقصد منقوع الحلب اما المحلب فهو نوع ثاني

سوال: هذه التحميله الي كتبتي طريقتها الي فيها حلبه او محلب؟

التحميله عبارة عن( م.ك.مرة+م.ك محلب+فنجان ملح خشناو مايسمى بالملح الفارسي)يعجنن بعسل ويجففن ثم تجعلين حجم الوحدة كبر حبة نوىالتمر وتتلبسين واحده كل ليلة.

سؤال: بغيت رايك انا هالحين في اخر النفاس يعني لي 38يوم باقي يومين واخلص ان شاء الله والحمد لله طهرت لكن معي بعض الافرازات البنيه وانتي بكرامه يعني كدره المهم صديقتي عطتني تحاميل وحده عباره عن ملح والثانيه عن معمول وتقول استخدميهم تمدحهم مره تقول تنشف وتضيق لكن انا الى هالحين مااستخدمتهم وتحسفت سؤالي اقدر استخدمهم هالحين وانا في نهاية الاربعين والا لا؟؟؟؟؟؟؟
وسؤالي الثاني كيف اعرف انب ماني خربانه وخاصه ان زوجي مايحب يجرحني ولا يقول لي شي يمدح وبس
سؤال اخير اذا ممكن ليه اهلنا وجداتنا يحذرونا من انه نروح لازواجنا بعد الاربعين على طول يعني مانسوي شي يقولون اصبري 5 او 10 ايام احسن لك هل هو مضر والا لا؟ وكيف اقنع زوجي ؟؟؟؟؟؟

ماقلتيلي ولادتك طبيعي ام قيصري على كل حال بعض النساء لاتنشف نهائي
الا بعد خروجه من الاربعين بالنسبة لتحميلات صديقتك ضعيهن الفترة هذه واذا نشفتي احفضي الباقيات للحيضةالاخرى واستخدميهم كما وصفت لك صديقتك
اما الخراب واضح اما صدور هواء مع صوت من منطقة المهبل وفي بدايته يكون عند الجماع واذا تطوريصبح في كل وقت هذا نوع منه وان شاء الله مايصيبك ولايصيب من يقراء اما النوع الثاني السوائل الكثيرة شوفي ملابسك الداخلية اذا كمية السوائل الي نازله عليها كثيرة يعني مافيه نشوفة الله يستر اهتمي بنفسك بعدين الدورة الاولى بعد النفاس اهتمي فيهاجدا جدا جدا لانها ممكن تدمرك وممكن تعدلك واتبعي النظام الغذائي والعلاجي الي انا واضعته بالدوره القادمة
وبعدين لاتقلقين نفسك انتي والله بتعرفين نفسك اذا خربانه بعد ماقريتي المقال ولا تنبهين زوجك لهذه الامور خليه غافل وخليه يحس انك احلا وحدة بالدنيا
اما نصح النساء الكبيرات لنا فلخوفهن من الشمم وهو يقتل المرأة الله يكفينا شره وسببه ان المرأه ماتكون طهرت وتذهب مع زوجها وتتعطر ببعض الاطياب التي تسبب الشمم لذلك يجب تجنب المسك والريحان

سؤال: ممكن احط التحاميل في النهار والا لازم في الليل علشان مااتحرك؟؟؟؟؟؟؟؟ والمويه هل شربها مضر في الدوره والاربعين والا لا؟؟ لان امي تنصحني بعدم شربها او على الاقل تقول قللي منها والعصيرات احسن

التحميلات يوضعن باليل افضل واحسن عشان يسحبن كل الاوساخ ويطلعنهن برا
اما شرب الماء مايضر بس لاتكثرين منه على جوع او بارد وهذا الاعتراض ليش؟ لان الماء يكبر البطن ولان كثرته تسبب خراب للارحام اشربي بالمعقول لاتكثرين ولا تقللين

سؤال: أنا متزوجة ولدي أبنان وأعاني من نفس الأعراض المذكوره من نزول السوائل وخروج الهواء من المهبل والرطوبه بالأضافه الى نفخه في البطن كما وأني أحس بأن فتحة المهبل قد توسعت وتغير شكلها وقد عرضت نفسي على طبيبة وقد قالت لي بأن كل شيء على ما يرام ولكني غير مرتاحةوللعلم فأن الدورة الشهرية منقطعة عني منذ ولادة أصغر أبنائي البالغ من العمر سنة وثلاثة شهور ربما بسبب الرضاعة ماذا ترين في حالتي وهل هناك دواء لشد المهبل وتضييقه واعادته كما كان.

انتي معك خراب مهو هين الله يعينك المهم راح اعطيك خطوات العلاج
شوفي الوصفات السابقة واعتبري نفسك نفاس وسويها لمدة اربعين يوم بحذافيرة واستمري لحد ماتحسين ان الوضع تعدل واذا ماتعدل بعد اربعين يوم ياليت تخبرينن عشان ابدا معك بالنوع الثاني من العلاج
بالنسبة لأنقطاع الدورة اذا انتي ترضعين عادي اما اذا لا فيمكن عندك ضعف بالمبايض وتقدرين تعرفينه بالطريقة التالية انسدحي على ظهرك وضعي اصبعك السبابة والوسطى عند السرة اذا سمعتي النبض قوي الحمدلله واذا كان ضعيف فالله يستر واذا ماسمعتيه فعندك ضعف

سؤال: أن ألآلم الظهر ظهرت في هذاالوقت أي قبل شهرين وآلام مصاحبة قبل الدورة وبعدها واثناء الجماع كما أنني قد عالجت من مشكلة الألتهابات التي عندي ولكنها تنقطع يوم او يومين وبعدها تعاود من جديد وعدم إنتظام الدورة بعد الولادة مباشرة وعندما تاتي تاتي بشكل خفيف جدا فما هو الحل في نظرك أفيديني جزاك الله خير.

على مايبدولي انه عندك ميلان للخلف ممكن اصبح عندك هذا الميلان من تو يعني تذكري الدورة الي قبل ماتحسين بهذي الاعراض يمكن انك شلتي شيء ثقيل فوق طاقتك او سحبتي حاجه ثقيله اثناء الدورة على كل حال ياختي هذا الميلان على مايبدولي للخلف لذلك استعجلي وابحثي عن مرأة تعالج واهم شيء تكون ثقه وتطمني منها افضل وياليت ترجعين شوي لموضوعي عن الميلان وتقرينه عشان تعرفين اخطاره وكذلك عندي ( فقرة) لاتتركين نفسك

سؤال: عن بخور(كبو)اسويه بنفسي يتكون من (خواجوا,مرة،قشربصل،كمون،فلفلة الهوا) ياليت لوتعطيني رايك فيه,,,مع العلم اني بعد ما اتبخر به احس بالم في بطني وظهري ما ادري استمر عليه,,,وبرايك ايش سالفة هالالم؟؟؟

لابأس بالكبو اللي ذكرتي وممكن تضيفين له ( محلب+حلتيته )
هل تتكبين وقت الدوره؟ اذا وقتها فهذا الالم طبيعي لان الارحام تدفى وتنزل الدم الفاسد

سؤال: بعض الأشياء ما سمع عنها العطار وهي قشرقهوه ونونخة وأرطا وكبو الهواء ما أدري اذا تعرفين لهم مسميات ثانية
وذكرتي بعد من أدوية العشرين يوم الأخيره الحبة السمراء فهل هاذي هي نفسها الحبة السودة وبعد بالنسبة للسفوف اشلون ناكله مع شاي الأعشاب نخلطه معاه والا ناكله في البدايه بروحه ونشرب وراه الشاي؟؟؟؟
ويصير نحط مع الشاي شوية سكر أو عسل لتحسين الطعم؟؟؟؟

المشكلة ان قشر القهوه موجود ابحثي عنه في محلات العطارة والتي يعمل بها من الاخوة الحضارم (من اليمن)واكيد بيعرفونه على طول
الحبة السوداء نفس الحبة السمراء
الارطاء نبات صحراوي معمر معروف وهو ممتاز للجروح اتمنى انك تحصلينه ودوري عنه في محلات العطارة اللي يعمل فيها كبار السن من السعوديين .
النونخه تشبه الى حد كبير حبة الحلوة ولاكن لها لذعه شوي وطعمها حالي
اما كبو الهواء مخلط من مجموعه من الاعشاب مثل( خوا جوا + مرة+ كمون +حلتيته+محلب+ [حاجه والله مدري وس اسمه لكن مثل الانابيب المفرغه لونها اسود وحجمها متوسط]+قشر بصل +هدب الاثل) وفيه حبوب ضغيره حمرا يابسه زي الخرز هذي شيليها مهيب زينه.

سؤال: التمر مع الرشاد ينفع من دون سمن لاني مستحيل آكل السمن,هل ينفع؟

ممكن تستغنين عن السمن بزبده ولكن السمن البلدي افضل بكثير

سؤال: بالنسبة للتحاميل..تصلح للي مركبة لولب،،يعني مافيه خوف ان الملح والعسل يذوب اللولب،،او ان الملح حار على الرحم ممكن يحرقه ؟؟؟؟

ممنوع استخدام التحميلات مع الولب يخربن اللولب

سؤال: بغيت أعرف طريقة التمر مع الرشاد بالضبط أشلون انحط الرشاد على التمر ننقعة أول في ماي وبعدين نحطه عليه وهو ناشف…بينخلط يعني؟؟؟

عمل التمره مع الرشاد كالتالي:
خذي تمر بدون نوى +سمن (المقادير على راحتك) ضعيهم في قدر وعلى نار هادئة لمدة 10 دقائق حتي يذوب التمر قليلا مع شوي تحريك بعدين اضيفي الرشاد وهو حب ناشف وكثري شوي مثل السمسم لا تحطينه بماء.

سؤال: انا ماآكل السمن ولا الزبده ينفع التمر مع الرشاد بدونهم؟سؤالي الثاني اللي تحس نفسها مره خربانه كم المفروض تستمر على البرنامج يعني اربعين يوم تكفي؟

حاولي تغصبي نفسك عليها لان الحريم الاولات يسمونها ربيبة الارحام ومعناه انها ترب الارحام مثل مترب الدلال وتصير تلمع من النظافه واذا ماقدرتي جربي معه زيت الزيتون واذا متحبينه بس اطبخي التمرة واضيفي الرشاد(بس ماضنيت بتنفع كثير) ومثل ماقلت الخراب عشان الوحده يطيب منه ميه بالميه لازم يكون بعد نفاس بس اذا الوحده سوت النظام لمدة اربعين يوم عادي تكون بأذن الله نسبة الشفاء ثمانين بالميه وهذا تقدم ومع الدورات ترجع مثل اول واحلا واهم شي صحتها قبل كل شيء

سؤال: بغيت أسألك عن شي إسمه ( مردود ) موجود عند العطار هل هو زين للنفاس والحيض ؟؟ وياليت أخت فيافي تعطينا إذا فيه برنامج تتبعه الحامل في فترة الحمل وبغيت بعد الأشياء اللي تساعد على الولاده. شاهي الأعشاب اللي ذكرتيه للنفاس والحيض هل هو يطحن أو يترك حب ؟؟ وهل يغلى أو ينقع حتى لا تذهب فائدته والنقع يكون بماء مغلي أو ماء فاتر؟؟ ماهو مقدار الشب والبودره اللي ذكرتيه لي يروح ريحة الحلب ؟؟

انا ماأنصحك تشرين دواء ماتعرفينه لان العطرين يبيعون بعض النباتات اللي تسبب الخراب مثال:
الصك والك معروف يخرب وشكله زي الكلوه لونه بني واملس هذا ياساتر منه يسبب الخراب بشكل مرعب. وصدقيني الادوية اللي كتبت عبارة عن مردود وهي ممتازة .
اما شاي الاعشاب مايطحن تغلينه على شكله لمدة عشر دقايق وتحلينه اما بسكر نبات او عسل طبيعي .
الشبة خذي الحجم (كبر حبة المشمش) واطحنيها واضيفي عليها تقريباَ 12 م.ك من البودره المفضله عندك وهذي للاستخدام اليومي ماراح تضر اذا كل يوم الصباح غسلتي منطقة الابط ووضعتيها وهكذا

سؤال: عن كبو الهوى فانا اشتريتة بشكل يشبة المزمار اي مجوف ولونة اسود واختي اشترتة يشبة هيك الفلفل الاسود ولاعرف ايهم هو كبو الهوا فارجو منك التوضيح ان امكن

كبو الهواء مكون من كل الاعشاب اللي ذكرت سابقا واللي زي المزمار يسمى عود الهواء(اسمه توي اعرفه من امي) والي اختك حصلت عليه هذا اسمه فلفل الهواء وها العنصرين اخلطيهم مع بعض راح اعطيك بعض من مكونات كبو الهواء(محلب+ورق حناء+فلفل هواء+ عود هواء+ مرة + حلتيته+خوا جوا+قشر بصل+كمون+هدب اثل).

سؤال: هل الفلفل مع العسل في اخر ايام الدورة زين للمرة حيث سمعت من الصديقات انه يحرحر!! وهل المحلب ينزل المويات؟

الفلفل الاسود ممتاز مع الشوربات والايدامات والمرقوق والمطازيز والعسل ايضاممتاز لكن معمري انا خلطتهم مع بعض
والمحلب ينشف وينزل المويات بس مايستخدم إلا في اخر ايام الدورة او 20 يوم الاخيرة من النفاس

سؤال: في الدوره الي فاتت قريت لوحده تقول السكر النبات بعد الدوره زين والله جربته علي طول والله لا يوريك احس انه خربني ازياده والالم هل تتوقعين انه من اللتهبات ولا التهبات تجي مع الميلان

حنا في حالات الكسور والجروح الصعبه نمنع المصاب من اكل السكر لانه مايساعد على التأم الجرح او الكسر
وننصح بالعسل الطبيعي لانه يساعد على تكون الانسجة التالفة. عشان كذا قليل مانستخدم السكر في النفاس او الحيض ونلجأ الى العسل الطبيعي .

سؤال: إذا ( لاقدر الله ) وكانت الولاده قيصريه هل أستعمل كل هذه الأشياء الكبو ، شاي الأعشاب ، التحاميل ، الغسول … وإلا خلاص أريح عمري مالها فايده ؟؟؟؟

انا جبت بعملية ومشيت على النظام لان الارحام هي الاساس والخراب يكون بالارحام مو بالمهبل.
بالنسبه لشاي الهواء زي ما قلتلك مافيه شاي هواء لكن ممكن المقصود المطبوخة وفيها مجموعة من الاعساب فيه حاجه يابسه زي ورق البازلا وخشب زي الاغصان وحب صغير احمر هذي تنظف من الدم ولكن فيها اعشاب لابد تتخلصين منها لانها اذا انقطعت عنك تخربين ولذلك اعطيتك شاي اعشاب حتى لو ماتوفر ماتخربين اذا تركتيه وانا استخدمه وخواتي وخالاتي وكلنا ولله الحمد تمام

سؤال: الدش المهبلي زين ولا يخرب المرأه لان صديقتي قالتلي حطي فيه مويه وملح وتغسلي فيه اومويه مع مره في الدور او النفاس او الايام العاديه والحامل هل الماي والمره او الملح يضرها لو تشطفت فيه من جوا وش احسن حاجه للمره في النفاس التنقع في الماي والملح لمده عشر دقايق او التشطف فقط ..وش احسن يوم تبدا فيه بعد الولاده بالماي والملح لاني سمعت لازم بعد اسبوع من الولاده ..وهل استمر فيه لاخر يوم من الاربعين
وبغيت اسأل عن البخور متى تبدأ فيه الوحده بنفاسها في اي يوم ولمتى لحد ماتخلص الاربعين ولا لا

الدش المهبلي مايضر بس استخدميه من برى اما التنقع بالماء تجنبيه لان الحين اللحم اذا تعرض لماء يفسد والارحام بعد الولادة تكون عباره عن لحم متجرح فوش يصير لو تعرض لماء (تخرب الارحام) والتشطف للحامل عادي بس مو داخلي وتتجنب التحميلات عشان ماتسحب موية الطفل اما الكبو يستخدم في الايام الاخيرة من الدورة او20 يوم الاخيرة من النفاس
وافضل شي بالليل عند النوم

سؤال: قلت مع اللولب اتجنب التحاميل,,,طيب بقية الادوية اللي ذكرتيها تكفي يعني ،،،اذا كنت تعبانة ممكن بعد الله تساعد على الشفاء؟

مافيه اي شيء اذا تركتي التحميلات واهم شيء الادويه الداخليه السفوف والشاي والاهم انك تتقيدين بترك الممنوعات والجوع اثناء الدورة والحيض وان شاء الله بتشوفين بنفسك الفرق لما تخف المويات والرطوبة ولكن استمري ولاتملين

سؤال: فيه وحده قريبتي عندها ضعف في المبايض وكل ماحملت وصار لها شهر سقطت ومافيه مستشفى إلا وراحت له بس ما استفادت شي وش تنصحينها تستخدم من الأدويه؟

اذا تكرر التسقيط عند زميلتك فما ادري وشو السبب لان لابد ان تكشف عليها مرأة متخصصة بطب العرب في بعض الحالات لايكون معروف عند النساء ولذلك تنصح بالرقية الشرعية فقد يكون عين او نفس هي المانع اما اذا كان التسقيط معروف سببه عند الاطباء مثل (قصر المهبل) فهذا اكيد يحتاج ربط ويسويه المستشفى واللي مثل حالتها لاتستخدم اي دواء شعبي حتي لا يطيح الطفل وحتي الحلب توقف استخدامه
قلتي صديقتك عندها ضعف عليها بالحلب حتي يتم الحمل بعدين توقف استخدامه
وممكن تستخدم عسل طبيعي +بار النخيل(كافر واحد) وتأخذ ملعقة كل صباح وان شاء الله يكون حمل وانا اخاف ان صديقتك معاها ميلان معه عشان كذا مايثبت الحمل وبالغالب اللي معاها ضعف بالمبايض قليل مايثبت الطفل لكن انا انصحه تعالج عند مرأة طب عرب.

سؤال: _بغيت أسئلك عن الرز ناكله عادي بفترة النفاس والدوره؟؟ لأن فيه ناس يقولون يكبر البطن ليه هو يضر أكله بهالفترتين؟؟
_ بالنسبه لشاهي الأعشاب ذكرتي أنه ناخذ 3ملاعق كبيره من الأعشاب وش كثر الماء اللي نغلي فيه؟
_ منقوع العنزروت والمره والمحلب قد إيش أشرب منه والماء اللي أزيده قد ايش هو كثر اللي آخذ منه ؟؟
_ البنت بفترة الدوره تسوي ( كبو الهواء ) ؟؟ ومتى أصلحه؟؟ وهل ضروري أسويه وإلا أكتفي باللي قلتي بفترة الدوره؟؟
عزيزتي فيافي أنا طلبت منك تعطينا إذا فيه برنامج تتبعه الحامل فترة الحمل وكذلك الأشياء اللي تسهل الولاده لأن أختي حامل وتمنينا تفيدينا بخبرتك ..

اكل الرز عادي بس المشكلة فيه انه يكبر البطن ويسمن وثقيل على المعدة عشان كذا نستغني عنه بالبر وخاصه البر ونخالته مثل المطازيز او المرقوق او ايدام لحم مع خبز بر.
اما شاي الاعشاب 3.م.ك مع 3اكواب ماء حجم وسط منقوع العنزروت كوب ماء صغير او وسط واذا شربتي زيدي
نفس كمية الماء واذا ذابت العنزروت والمرة والمحلب اضيفي ثاني .
البنت عادي تتكبا؟ والكبو ضروري وافضل طريقه له هي كالتالي:
حطي الفحم في المبخرة تحت كرسي مفرغ اجلسي على الكرسي والمبخرة تحته وضعي على الجمر قبضه من الكبو وتكونيين شايلة بس الملابس الداخلية وهذى يكون كل ليله عند النوم وفي الايام الاخيرة من الحيض او النفاس.
بالنسبه للحامل افضل شيء لها المشي وبعدين اذا بدت الالام (الوضع) تشرب حلب وتأكل رطب (والرطب ذكرة الله لافضل نساء اهل الجنه مريم عليها السلام) وانا اعرف نساء كثير ولدتهن سهله من الله ثم للرطب وانا للاسف ما جربته لاني استفرغ اثناء الالام الله يكرمكم ولكن امي واختي جربنه كذلك اذا ماتوفر الرطب خذي تمر واعبطيه بماء وزعفران واقرائي
سورة الزلزلة واول آل عمران واشربيه

سؤال: الشراب يكون على الريق ……. وإلا عادي خلال النهار وهل المعدة لازم يكون فيها أكل ؟؟ وكم مرة في اليوم ؟؟
طريقة تنظيف العنزروت ؟؟؟؟ فيه شيء معين ينشال منه ؟؟؟ علك اللبان….. يكون لين وإلا يابس ؟؟

تشربين الدواء مرتين في اليوم على الريق وعند المغرب من نفس الكوب يعني الصبح نص الكوب وعند المغرب باقي الكوب.
العنزروت زي التراب وهولونين حليبي واحمر واذا اضفتي له ماء يلزق مع بعضه وما يحتاج تشيلين منه شيء العلك المر طعمه مر وشين وهو دوائر صغيرة مو زي العلك المستكه

سؤال: لو سمحت متى تستخدم التحميله يعني من اول يوم من النفاس حتى لو كان فيه جراحه؟

نعم التحميله من اول يوم لانها تعمل كمطهر للجروح وكمنظف وطارد للدم الفاسد

سؤال: النفاس ماتتنقع ابد ولا بعد تتشطف؟ فهمييييييييني عيوني

نعم النفاس ماتتنقع في بانيو ابد ابد ابد ليش؟؟؟؟؟ لان الماء يدخل الارحام ويفسدها(يخربها) والتروش (الاستحمام)ضروري مرة في الاسبوع بس علي السريع وانتي واقفه تحت الدش اما التشطف للمناطق الدخليه
يكون يوميا بس(بالارطى+ الملح + الماء ) غير كذا ممكن تغسل الرقبه والصدر الى السرة فقط واهم شيء
القدمين لايتعرضون لماء لفترة طويله او تمشين على الرخام حافيه لازم تلبسين شبشب لان البرد مو زين للقدمين.

سؤال: هل الرشاد في ثاني يوم من الدوره له فائدة؟

الرشاد ينشف الدورة بدون تنظيف عشان كذا نستخدمه مع التمر بس اول ايام الدورة وفي الايام الاخيرة نستخدمه مع التمر والسفوف

سؤال: الدش المهبلي من جوه ما اسويه ابد لو مره بعد الدوره؟ ويكون عباره عن عسل وماء دافي علشان انا بعدة عن الى في الصيدليه با المره والعسل وش رايك؟

ابدا لاتسوين دش مهبلي اثناء الدورة حطي تحميلات او تشطفي

سؤال: اود ان اسالك عن الماش ،،،انا اذا استخدمته يبين مفعوله بسرعة ينشف ويوقف الافرازات،،ياليت لو تقولين رايك فيه اخاف انه مثل الصك واللك اللي يخرب؟؟؟

الماش ممتاز جدا جدا وقت الدورة ولا يهمك استخدميه وهو مو مثل الصك واللك فرق السماء عن الارض
والماش حب زي حبة الوبياء لونه اخضر وهو ممتاز ويضاف ممكن مع المرقوق او المطازيز او يطحن ويضاف الى السفوف

سؤال: ممكن تساعديني في معرفة العفص ايش هو وهل يصلح لتنظيف الرحم من الالتهابات

تجنبي العفص لانه يخرب سواء حمستيه او طحنتيه

سؤال: انا لي 15يوم مخلصه الاربعين واحيانا يعورني ظهري مره وتنزل مني افرازات الله يكرمك بنيه او ورديه او دم خفيف …مع ان الدوره جتني بعد الاربعين على طول ماادري وش الحل وجع ظهري متعبني مره خاصه مع شغل البيت والاطفال

اولا دورة النفاس تسمي(ردة النفاس) وهي مهمة وممكن انتي مانظفتي زين يعني باقي دم فاسد وابعطيك وصفه استخدميها مع الدورة القادمة ( فنجال مرة+فنجال حبه سوداء) اطحنيهم واخلطيهم مع عسل طبيعي على الريق وان شاء الله بيتحسن وتنظفين اما اذا استمر وجع الظهر فيمكن متعرضه لظغط اثناء الوضع من الممرضات وصاير شيء لفقرات الظهر
والافضل تأخذين اشعه للاطمئنان . واذا ماصار تحسن بلغيني

سؤال: بغيت أسألك حبيبتي ياليت تعلميني الأشياء اللي نعطيه المولود مثلا للمغص وغيره..وياليت تذكرين المقادير والوقت علشان ما أعيد السؤال نفسه.
بغيت أسألك أختي بناته يوم ولدتهم كل الليل يصيحون ولاندري وش السبب لدرجة إن بنته الأولى حصله بعج وسووله عميله. والثانيه مثل إخته كل الليل إلى الفجر تصيح بصوت واحد ولما سألنا وحده من الحريم الكبار قالت لنا نقطوا بحلقه نقطتين مره وصلحناه وكأنه أحسن إذا تعرفين السبب قوليلنا وعلمينا وش نسوي ؟؟ صديقيني محتارين وش نسوي والخوف للي بيجي يصير مثلهم .

للمولود اذا فيه مغص اطبخي شوي كمون مع ماء وسكر نبات ورضعيه يهدي المغص
اما اطفال اختك فامراض الاطفال تختلف فمثلا ولدي الصغير بعد ماجبته بأسبوعين صار بس يصيح ويرجع راسه وراء ومايرضع بغى يموت وماخليت مستشفى ماوديته المهم وديته لمرأة متخصصه بالاطفال
وشافته وقالت لي مشتم بريحان ولازم كوي المهم كويته وتوكلت على الله ماتصدقين نام على طول ورضع ولله الحمد عشان كذا صعب اقولك وش فيه لكن اكيد انتم بعد الولادة مارضعتوه جليكوز لانه ينظف المعدة وهوحلو للمواليد

سؤال: هل خشة البرد علاجها اللي ذكرتيه.. هو نفس اللي يبيعونة الحريم (سعوط) ام لازم انا اخلطهم رغم ان الحريم موثوق فيهم ..لونه بين الكحلي والبني

ممتاز السعوط مع الدواء اللي كتبتلك يعني اضيفي سعوط مع نفس الكوب اللي فيه الدواء ويشرب
وانا للاسف ما أعرف مكونات السعوط وإلاكان كتبته لاني اخذه من عجوز تقرب لامي وحنى متكلين عليها ولا عمري فكرت اخذ مقاديرة

سؤال: بغيت اخبرك اني ماشيه تمام على النظام وبديت احس ان خروج الهواء قل بنسبه كبيره عن قبل قبل خمسة أيام كنت مسافره ووديت معاي الأدويه وكل شي بس تعرفين زحمة السفر ويا العيال يعني شوي صار في خربطة في العلاج بس في هالأيام.. ما أدري الحين اواصل عادي والا اعوض الأيام اللي طافتني يعني ازيد العشرين يوم الأولات خمسة ايام بعد على نفس الأدويه وبعدين انتقل للعشرين يوم الأخيره؟

الحمدلله على التحسن واذا ان شاء الله استمريتي في كل دوراتك بتشوفين العجب وياليت انك مالخبطتي لان الفايدة في الالتزام بالنظام بس معليش الحين بعد مارجعتي كملي النظام عادي واذا جتك الدورة اقلبيه على الايام الاولى من الدورة ثم الايام الاخيرة من الدورة ثم كمليه عادي وصدقيني وحدة مشت على النظام 3 دورات هي وزوجها حسو بالفرق.

سؤال: يقولون الغسيل بالصابون والشامبو للمنطقه يخرب ايش رايك 00وهل في صابون طبي تعرفينه زين؟ وفي حريم ينشفون المنطقه التناسليه من داخل بشاش او قماش ناعم هل هو كويس ولا لا؟

التغسيل بالماء او الصابون وقت الحيض او النفاس من مسببات الخراب ولكن في الاوقات العادية غسلي بماء وصابون عادي ولكن تجنبي الشامبو او الصابون المعطر انا شخصيا استخدم (صابون ديتول) بس مو دايما واحرصي انك تنشفي المناطق هذي بعد التشطف بمناديل أي نوع لان الفطريات والبكتريا تحب تتجمع في المناطق الرطبه الحارة وهذا من المساعدات على حصول الالتهابات.

سؤال: إذا كانت المرأة ولله الحمد سليمة ولا تعاني شيئا مما سبق من بعض أمراض النساء فهل هناك أعشاب معينة تتناولها المرأة أثناء الدورة مثلا لتحافظ على صحتها مع زوجها؟
والسؤال الثاني:
إذا كانت المرأة قبل النفاس لا تعاني من أي مرض مما سبق ذكره فما هي نصيحتك لكل امرأة نفساء ويمكن أن نطلق عيها(النصيحة الذهبية) حتى ترجع مثل ماكانت من قبل وتنال رضا زوجها؟

السيدة التي تريد المحافضه على صحتها انصحها بأن:
1ـ ان تستمر على نظامها الذي اعتادت عليه ولاتغيره
2ـ ان لاتشتري ادويه مطحونه من العطار او أي امرأة دون ان تعرف
مكوناته فقد يكون بعض الادويه مخلطه من نباتات ضارة لها
3ـ تتجنب الجوع فترة الحيض او النفاس
4ـ ان لاتستخدم تحميلات لاتعرف مكوناته وافضل التحميلات اللي ذكرت لانه لو تركته لم تؤثر عليها .
واتمنى اني وضحت مع ان الذاكرة بعض الاحيان لاتسعفن

سؤال: _ في فترة النفاس فيه شي نستخدمه علشان البطن يرجع لوضعه الطبيعي أي مثل ماكان قبل الحمل ؟؟ فيه حريم ماشاء الله عليهم إذا طلعوا من النفاس ما كأنه حملت وولدت.

البطن لم يكن مشكلة كبيرة قبل 30 عام فجداتنا وامهاتنا كن ينجبن 15 من الابناء او 12 ولانرى لهن بطون وكان الدواء هو نفسه الذي نستخدمه الان وانا لاانكر ان العمليات تؤثر ولكن العمل الشاق له دور
فمثلا عندك المشي على الرمال (الثمامه,الدهناء,النفود)كله تمسح البطن مسح فقد كانت جدتي حامل في شهرها التاسع ولانرى لها بطن كله من المشي لذلك اللي يكبر البطن شرب الماء اثناء الحيض والنفاس عدم الحركه فمهما اكلتي من الادويه حتي تذهبي البطن لن يروح مادمتي لن تبذلي
مجهود عضلي وانا اعرف افضل رياضه وهي المشي على الرمال وصعودها فهذه تشد عضلات البطن شد خيالي, ايضا تمارين البطن اما ادويه شعبيه تنزل البطن ما اعرفها .

سؤال: أنا إستخدمت قشر رمان مع شاي صيني ونعناع وزنجبيل وطبعا أغليه بمويه لكن ماينحف البطن إلا شي بسيط..
هذه الطريقة قريتها من احد المنتديات وياريت اختي فيافي تعطينا رايك فيهاوهل تنفع نسويها مع النظام اللي قاعده اسويه

للي تعاني من بروز الكرش:
خذى كميه من قشرالرمان اليابس اطحنيه ثم انخليه ثم ضعي عليه كميه من العسل الطبيعي كوني منهاعجينه متماسكه شكلي منها على هيئه اقراص بحجم نصف حبه الباندول ضعيها في علبه ثم ضعيها في الفريزر استعمليها في العشرين الاخيره من النفاس (او) في الثلاثه الايام الاخيرة من الحيض خمس حبات في الصباح على الريق وهى مفيده ايضا للمعده وتقوم بتنضيف الرحم .

والوصفه اللي ذكرتي ممتازه للمعده

سؤال: أنتي ذكرتي ( أرطأ+ ماء + ملح ) لكن ماذكرتي المقادير ياليت توضحين حبيبتي..وإذا طبخته أحطه بالثلاجه وإلا برى وكم مره باليوم؟؟
كذلك التحميلات:
م ك مره + شوي محلب + ملح خشن.<<< ياليت توضحين الشوي وش كثره والملح وش كثره ..

والله يا اختي انا اقدرها تقدير ولكن خذي مقدار 3كوب ارطا 1ملح +لتر ونصف ماء واغليهم وهذا يمكن استخدام يومين ومافيه داعي تحطيهم في ثلاجه ولكن اذا كثرتي الكميه احفضيها في الثلاجه
اما التحميلات م.ك مرة + فنجال ملح خشن+ م.ك محلب اعجنيهم بعسل طبيعي لحد مايتماسكون وكوريهم كبر حبة نوى التمر ويبسيهم يومين وبعدين استخدميهم.

سؤال: ابي اسال الله يعطيك العافيه بالنسبه للسفوف هل يمكن ان يخلط مع الحليب ويشرب؟

لاتخلطين السفوف بالحليب السفوف يكون مطحون وتأخذين بملعقه وتبلعينه وعشان يروح ميلزق بالحلق تشربين

سؤال: بالنسبه للغسول الأرطأ كم مره أستخدمه في اليوم هل كل ماأدخل الله يكرمك الحمام أتغسل منه ؟؟
سؤال ثاني :الحين إذا بغيت أغسل المنطقه أغسلها بماء ثم بالأرطأ؟؟

الغسول مرة في اليوم ايام الحيض والنفاس واكتفي بالتنشف بالمناديل اطبخي الارطا بالماء والملح مع بعض وهذولي استخدميهم لتشطيف تلك المناطق
اغلي الارطى مع الماء والملح لمدة ربع ساعه وبعدين صفيه واحفظيه للاستخدام

سؤال: بغيت أسألك : إذا فيه غسول يومي في وقت الطهاره ؟؟
وش نحط على سر المولود علشان يطيح ؟؟
الحين إذا طهرنا المولود الذكر وش نسوي بالطهار وش نحط عليه ؟؟
لأن حنا ماجانا مولود ذكر ولا نعرف وش نسوي لو يجينا

افضل غسول يومي الماء ولابأس بصابونة(ديتول) مرة واحدة في اليوم
اما سر المولود احرصي على نظافته وذلك بتنظيفه بمسحة طبيه كل يوم وبطريقه لطيفه وعاده يطيح سر المولود من 15 الى 20 يوم وبعد مايطيع ذري عليه شوي (صبرة) المباركه وممكن تجيبين قرش اونص ريال وتلزقينه على السر عشان اذا بكى الطفل مايطلع او ينفتح سرة طبعا بعد ماتنظفين السر بمسحه تذرين شوي صبرة ثم تلزقين القرش العمليه يوميه اما الطهار اهم شيء لاتشيلين اللي يركبون المستشفى واكتفي انك تصبين زيت زيتون عليه مع مطهر جروح وبعد مايشيلون المستشفى اللزقه صبي عليه زيت زيتون ولاتنظفين اللون الابيض اللي يطلع تراه جلد ينمو وهو طبيعي بيلتأم من نفسه

سؤال: ودي اسالك عن الرياضة بالنسبة للمراة هل منها ضرر ؟؟؟ كثير يقولون انها تسبب نزول الارحام ما ادري وش رايك؟؟؟؟؟؟

الشغل والرياضه الغير عنيفه ماتضر بالعكس تقوي العضلات ولكن اذا ماعمرك سويتي رياضه ابدي بالتدريج حتى تتعودي عليها بس الاعمال العنيفه وحمل الاشياء الثقيلة هي اللي تسبب نزول الارحام وانا اشجعك على الرياضه بس لا تكون عنيفه

سؤال: حسيت انه لازم استمر على العلاج اربعين يوم وسوف ابدأ من بداية الدورة فهل اخذ علاج الايام الآولى وعلاج الآيام ألاخيرة وبعدين ابدأ بالعلاج من جديد ولا اخذ علاج الآيام الاولى عشرين يوم حتى بعد ما اطهر وهل التحميل اثناء الدورة والغسول يكون مجرد شطف من الخارج او لابد من الداخل
انا جبت جميع المطلوب بس العنزروت مثل اللبان الذكر بس لون احمر والارطا مثل الحجر ولونه ابيض انا شاكه فيه لانه وصفك له غير والقيصوم كيف شكله وكبوا الهوا ما احد عرفه

مع بداية الدورة ابدئي بنظام الثلاث الايام الاولات ثم الثلاث الايام الاخيرات وبعد ماتخلصين وتطهرين اعيدي النظام من جديد 20 يوم الاولات ثم 20 يوم الاخيرات واثناء هذه الفترة اذا جتك الدورة اقلبيه من جديد واذا خلصتي كملي على الايام الاخيرة لحد ماتخلصين كل 40 يوم وان شاءالله ماتشوفين الا العافيه وبالنسبه للتحاميل تستخدم اثناء الدورة او بدون عادي اما الغسول فمن الخارج فقط
اما العنزروت لونها مختلط بين الحليبي والاحمر وزي الحصى الصغير وطعمها مر واذا غسلتيها تلزق مع بعض واذا نقعتيها يكون لونها مائل للعكر وتذوب جزئيا اذا طولتي ناقعته(لمدة يومين)
اما الارطا فهي جذوع نبات صحراوي معمر وهو مجود في الرمال الصحراويه ويكون على شكل اخشاب تكسر وتطحن وتستخدم وهو ليس ماذكرتي يمكن اللي عرض لك العطار شبه
اما القيصوم نبات صحراوي وله مواسم ينبت فيها وريحته عطريه حلوه
اما كبو الهواء معروف ولكن انا راح اعطيك بعض من مكوناته (محلب,ورق حناء,فلفل هواء, عودهواء, مرة , حلتيته (رطبه او يابسه) خواجوا , قشربصله , كمون, هدب اثل)

سؤال: بغيت اسألك ايش رايك بالبخور في الجاوي العشرين الايام الاخيره من النفاس لمدة ساعه او سعف النخل؟

اذا قصدك البخور الجاوي الغير مفصود ولونه ابيض وريحته يعني فانا اعرف انه يستخدم لتبخير المنزل لكن انا ماعمري تبخرت فيه ولذلك لااستطيع اني انصحك بشيء لااعلم عنه اما سعف النخل لا ماأنصحك فيه لان مافيه نفع

سؤال: حبيت استشيرك بشى وهو فى شى يسونه الحريم اثناء النفاس وهذى اخذناها منجداتنا انها تكبا بكرش الخروف او راسه تاخذ الكرش وتعبيها دويات من ( رشاد وحلبه وكلهم) وتخيطهم بعد ذالك تكبى فيه تحت البطانيه وتبخر بلبخار مال الكرش وتاكل منه الى الصباح لين تعرق اذا عرقت معناه انه فى نتيجه وهذا يتبعنها خواتى فى النفاس مارايك فيها ارجوا الافاده
وماعلاج غازات اللى تصيب المراه المتزوجه؟

سبق واني ذكرت المكروشه وهي ممتازة للنفاس بس تبي احد يعرفله اما حشو الرأس (راس الغنم ) فهي ممتازة ولكن صعبه طريقتها وهي ممتازة للي داخلها هواء بالراس ومن اعراضه صداع مزمن وشديد
يمكن يستمر لاكثر من يوم مع دوخه ورغبه بالاستفراغ وخاصه اذا تروشت وتعرضت الوحده لهواء

سؤال: كبو الهواء اللي انتي ذكرتيه فيه ورق حناء هل الحنا كويس ومايسبب شمم ورق السدر هل هو يحط مع البخور ولا لا
انتي ذكرتي منقوع مكون من كوب ماء -ملعقه صغيره مره – ملعقه صغيره محلب-ملعقه كبيره عنزروت ، هل ستخدمه لاخر يوم في الاربعين يعني من البدايه الى النهايه كل الاربعين وانتي ذكرتي ان المحلب مايستخدم العشرين الايام الاولى .. فهميني ارجوك من اليوم وانا في موضوعك اكتب لاني في الشهر السادس وابغى اجمع معلومات منك بدري والله يعطيك العافيه اختي فيافي الادويه هذي ماتخرب اذا جمعتها وطحنتها من الحين ولا بدري مرررررررررره ابي افتك

المحلب وبالكميه اللي ذكرت وهي ملعقه صغيره ماتضر على العكس تبعد الشمم ولكن الهدف من عدم تكثير المحلب في الايام الاولى هو انك ماتنشفين على خراب لان المحلب ينشف واذا تقيدتي بالمقادير ان شاء الله بتشوفين الفرق والمنقوعه ممتازة كل ايام النفاس عشان تنظف المعده والله يقومك بالسلامه ولكن اهتمي بنفاسك القادم زين لانه باهتمامك ممكن ترجعين بنت
والكبو معاه حناء بس ماعمري حطيت معه ورق سدر الادويه مافيه مشكله انك تجمعينها الحين ولكن خلي طحنها اذا جاء الشهر الثامن على خير

سؤال: انا عندي مشكله ما ادري سببها من شهر وانا اعاني من نزيف وذهبت لاكثر من طبيبه والادويه مع اختلافها الا ان تاثيرها لوقت محدد ثم يرجع النزيف المهم وقررت ازالة اللولب مع ان الفحص لم يبين اي مشكله في اللولب
المشكله اني خلال فترة النزيف جاتني الدورة وتعرضت لبردشديد لاني كنت مسافرة في مكان بارد ولم انتبه لنفسي وشربت اشياء باردة ويمكن هو السبب في خروج الكثير من الهواء مع النزيف والان احس بضيق شديد لا اعرف ماذا افعل

بالعادة اللي تركب لولب يصير معاها لخبطه يعني نزيف اصبري عليه واذا تبين توقفين النزيف
(شبه سوداء ويكون حجمه كبر حبة الحمص+ فنجان حلب) اطحنيهم وخذي ملعقه مع كوب حليب على الريق وان شاء الله يوقف النزيف المهم انك حاولتي تهتمين بدورتك وخاصه البرد
وبالنسبه للنظام اذا انتي سويته ماكان فيه داعي تمتنعين عن زوجك اذا لم تكوني نفاس او حائض

سؤال: اذا كانت الوحده مسقطه0ومسويه عملية تنظيف تسوي نفس النظام للنفاس ونفس البخور والى متى يعني كم يوم؟

المسقطه اذا كان مدة العوار 15 يوم تقسم الايام 7ايام على الايام الاولى و8 ايام على الاخيرة وبالعادة العوار مايتعدي 15 الى 20 يوم وتستخدم نفس الادويه بس انها تكثر من الكمون في الايام الاخيرة

سؤال: الحامل في الشهور الأولى من حمله يعني بالثاني أو الثالث ينزل معه الله يكرمك شوي دم مو كثير وهذا يعني إنذار للإجهاض وش تنصحينه تسوي وإذا فيه شي تستخدمه قوليلنا ..

والله اذا فيه انذار اجهاض فأفضل شيء لها المستشفى يعطونها مثبتات وتحاول تبعد عن الاجهاد العضلي والنفسي

سؤال: عمرك سمعتي عن لحاء الطلح يقولون انه يستعمل كبو وفيه ناس جربوه يمدحونه وش رايك؟
بالنسبه للعنزروت اللي مع المنقوع انا طحنته ينفع؟

سمعت ان فيه نساء يستخدمونه لكن انا ماعمري جربته والشيء اللي ما جربته ما اقدر انصح فيه لاني ما ادري هو زين ولاشين وبالنسبه للعنزروت المفروض انك ماطحنتيها بس مافيه شيء استخدمي اللي عندك واذا خلص لاتطحنين الجديد.

سؤال: اريد علاج العقم فأنا لي فترة متزوجة والسبب انه عند زوجي لزوجة في الحيوان المنوي وقلة عدد

اولا ياأختي عليك انتي وزوجك بالدعاء وان تراعي شروطه وان تتحري اوقات استجابة الدعاء
ودائما افضل شيء اتباع هدى المصطفي محمد عليه افضل الصلاة والتسليم بالتداوي مثل اخذ 7 حبات من الحبه السوداء مع ملعقة عسل كل صباح
وانصحك ان تدعي زوجك يجرب الحلب لمدة شهرين كسفوف وشاي مرتين في اليوم بعد الشهرين اضيفي العسل الطبيعي(سدر)مع بار النخيل واتركيه يستمر عليه انتي مولاازم تاكلين معاه اذا مافيك شيء وان شاء الله يكون حمل ولكن اهم شيء الدعاء والثقه بالله

سؤال: كبو الهواء اللي هو: (محلب,ورق حنا,فلفل هواء,عود هواء ,مره ,حلتيته,خواجوا,قشر بصل,كمون,هدب اثل )؟
بالنسبه للمقادير أحطها بالتساوي وإلا في شي أكثر من شي ؟
كبو الشمم:
ماوضحتي المقادير معليش حبيبتي أحطها بالتساوي وإلا شي أقل من شي ؟؟
وشلون طريقة كبو الشمم أحطها على فحم وأشمها وإلا وشلون ياليت توضحين وبالتفصيل الله يوفقك؟
شو هو المقلقل والمطازيز
مابي الطريقة بس اقصد ليش هالاكلات بالذات يعني مثلا الصالونه والدجاج والمجبوس والبيض والحليب والخبز الابيض كلها عادي ممكن اكلها
وذكرتي البر اكثر من مرة اعرف انه له فائدة غذائية كبيرة لكن في وقت الدورة هل له ميزه خاصة
وحدة صاحبتي الدورة مو منتظمه ومتأخر الحمل عندها ممكن يكون هو السبب لانها فحصت وكل شي عادي وفي شي ينظم الدورة

كبو الهواء لا مافيه مقادير معينه لكن خذي من كل نوع مقدار قبضة اليد واخلطيهم مع بعض واذا جيتي تتكبين خذي من المخلوط مقدار ملعقتين كبار وحطيهم على الفحم ووقفي تحت المدخنه او ممكن تحطين المدخنه تحت كرسي مفرغ وتجلسين على الكرسي وبكذا يدخل الكبو وبنفس الطريقه سوي كبو الشمم الا انك تشمينه وتحطينه قريب من وجهك وبعدين تجلسين او توقفين زي الطريقه السابقه
المقلقل: اللحم ومرقته لما تكون ثقيله
المطازيز: مثل المرقوق بس العجينه تكون اصغر
وانا افضل البر لانه مايسمن ولا يساعد على تكون الشحوم في الجسم وهوافضل بكثير من الابيض وممكن انك تأكلين اللي تبين واللي تحبه نفسك ولكن تتجنبين الممنوعات وممكن تاكلين اسماك وروبيان ولحوم وطيور عادي ولكن الممنوعات من الخظار والفواكه اما الرز مايفيد ابد بس يكبر البطن(المجبوس).
اما لتنظيم الدورة ما اعرف .
اما كبو الهواء ممكن انك تلغينه وتتبعين النظام عادي واي
فرصه تحصلك جيبيه واستخدميه ولكن كثري الفلفل الاسود في اكلك.

سؤال: ذكرتي الزبيب اليماني وين أحصل عليه ؟ أشرب المنقوع فقط وإلا آكل بعد الزبيب المنقع (أي أشرب الماء وآكل الزبيب بعد النقع)؟ كم مره باليوم ؟ متى أوقف الزبيب وإلا طول العمر ؟

الزبيب اليماني تلقينه عند العطار, اشربيه كله المنقوع والزبيب واذا تبين تاكلينه كانه مكسرات عادي وعدد المرات على قدرتك مرتين او ثلاث او اربع وبالنسبه لتوقيفه لحد مايرتفع نسبة الدم عندك للنسبه المطلوبه.

سؤال: والله انج خوفتيني لأني مره تعبت بالدوره وقالت لي وحده ان فيني فجره اللي قلتي عنها وانا حشاج الدوره ماتنزل معاي عدل ينزل معاي دم اسود اول يومين الله يخليج دبريني والله خاااايفه
وسؤالي الثاني صج لما الهم الرشاد ينظف الرحم؟؟؟؟

اعراض الفقرة جفاف في الدورة ويكون الدم في الايام الاولى زي التراب
وبعدين خفيفه ومؤلمه, ياليت تروحين لمرأة وتكشفين عندها اذا عندكم بالكويت واحدة ثقه
الرشاد ممتاز وينظف ولكن يستخدم في الايام الاخيرة احسن وياليت تشوفين
تدرج وضعي للدواء فانا اضع الرشاد مع التمر من اول الايام ولكن ما اخلطه مع السفوف الا بالايام الاخيرة.

سؤال: ابي اعرف شو تعني كلمة سفوف صاحبتي متزوجه من ثلاث سنوات وما حملت يقولن لها البويضات صغيرة واحيانا الهرمونات ماادري شوفيها وهي ضعيفةوااايد وحملت مرتيين وتسقط لان البويضة صغيرة كانوا يعطونها منشطات بس الحين وقفت شو رايك

كلمة سفوف تعني أي شيء مخلط ومطحون ويسف (يأخذ ناشف ويبلع) وانا بعباراتي هذي برجعكم للتراث اما صديقتك فأنصحها بالحلب تطحنه وتسفه على الريق وبعد المغرب وعند النوم غير انها تشرب مغلي الحلب كل مابغت ماتصدقين مفعوله على المبايض يقويها اذا كانت ضعيفه وتستمر عليه وفيه وحدة قريبه لي كان عندها ضعف في المبايض واستخدمت علاج الطبيب ومانفع لوحدة وبعدين رجعت استخدمت علاج الطبيب مع الحلب وحملت ولله الحمد والحين عندها طفلين .

سؤال: شرايك باللي تشرب منقوع المحلب والمرة يعني تنقع لها محلب مع مرة في بطل ماء …. وطوال الدورة تشربهم وهل المحلب ينشف ….. وما رايك في جند البوال ( وحده من البنات مدحته على الريق للنفاس )

منقوعه المحلب والمرة ممتازة بس في الايام الاولى قللي من المحلب وبعدين في الايام الخيرة كثري منه اما جندالبوال ما اعرفه

سؤال: حبيت اسئلك عن شرب الماء اثناء الدوره وهل يمكن ان نلهمه مع اللهوم فى ناس يقولون لازم تلهمون باالكمون او شى اعشاب ولازم مانشرب الماء نهائى باالدوره وانا مااستغنى عنه سؤاء بارد او دافئ

الضرر في شرب الماء هو احتباس السوائل وغير كذا اذا كان بارد لذلك مافيه مشكله من شرب الماء بس لاتكثرين يعني مو كل دقيقه اما اللهوم الافضل تلهمينه بمغلي اعشاب او كمون..

سؤال: اذا المراة نفاس لا ينبغي لها استعمال العطر لانها قد تصاب بالشمم على حد قولك يعني اللي افهمته انه يشبه حمى النفاس ارجو التوضيح قصدك بالشمم يعني اذا المراة حائض او نفاس اذا شمت العطر يصيبها هذا المرض
هل عندك هالخبرة من واقع تعاملك مع جدتك ام انك دارسة له عذرا اذا كان تدخل في خصوصياتك

الشمم يصيب من بعض انواع الطيب ولذلك اهم شيء تجنب جميع العطور خاصه الريحان المسك وهذا من واقع عشته مع كثير من النساء وانا يامحكيتك تعرضت بعد نفاسي لحمى شديده وانفتح جرح العمليه ولا يعرفون السبب ولكن عرفت انه شمم وكان ريحان المهم تعبت وانا من مستشفى لمستشفى لمدة اربع سنوات وفي احد المرات ذهبت لواحدة من نساء طب العرب وما ان مسكت بطني حتى سالتني هل تعرضت لشمم ريحان لرابع او خامس يوم من ولادتي والحمدلله تعالجت لمدة 3 شهور وشفيت اما الطب فانا لست بطبيبه ولكن عندي معلومات من جدتي وجدت امي وكلهن طبيبات وحاولت ان اجمع المفيد وفيه معلومات اخذتهن عنهن والحمدلله اكثر صديقاتي الواتي اعطيتهن النصائح او اكتشفت علاتهن شفين وبعضهن رزقن بالاطفال بعد عقم زاد عن 7 سنوات ولكن هذا كله من الله والنيه الصادقه

سؤال: سؤالي هو أنني سمعت محاضرة مسجلة في شريط وبعد نهايتها كان بعدها مقطع لرجل – يبدو أنه خبير في الأعشاب-وكان مما قاله : أن بعض النساء لاتهتم بنفسها بعد الولادة فينفر منها الزوج ,وأن هناك أعشاب مهمة للمرأة وقال: أن هناك مادة عند العطارين تسما(خواجوا) إذا تبخرت بها المرأة فإنها تشد وتجفف وتعود المرأة كالبكر؟
فهل كلامه عن الخواجوا صحيح؟وهل يمكن أن نتبخر به لوحده بدون بقية خلطة الكبو؟وإذاكان ممكنا فكم المدة المطلوبة ؟

فعلا صدق هذا الرجل ولكن الجهل عندنا يالنساء بعض الاحيان يجعلنا نعيش في حيرة ولاندري مسبب المشكلات الحقيقيه في حياتنا الزوجيه والخوا جوا ممتاز لكل شيء ونحن نستخدمه كاكبو وممكن تطبخينه مع زيت زيتون وشوي بصله كمدلك للبطن وممكن يخلط مع شوي ارطاء وملح للجروح او القروح
وممكن مع محلب للثه وله عدة استخدامات

سؤال: صار يجيني من فترة تسع شهور تقريبا كدرة قبل الدورة ..لمدة ثلاث أيام وهي مضايقتني مرة
لأن ماعمري جاني زي كذا .. دايم تجيني الدورة بدون اي كدرة ناس قالو يمكن المبايض فيها شي!!!!!!!!

الكدرة اللي تجيك لونها بني غامق مع بني لزج او لونها برتقالي وكأنها زلال بيض اذا لونها بني (فاحتمال عندك سدد على نسبه خراب) اما اذا كانت اللزوجه لونها برتقالي فانك ايضا عندك شوي خراب مع فقر دم .

سؤال: انا عملت نظام الدورة اول يوم عادي لكن ثاني يوم جاتني الام في الظهر الام الدورة العادية فهل هذا عادي؟ علما ان الدورة دائما تجيني بدون الام ومااحس بها ابدا

بالنسبله للالم اذا كنتي مو متعودة انه يجيك الم وقت الدورة وخاصه اليوم الثاني فيمكن اول كانت الدورة ماتطلع زين بس مع الادويه والاهتمام اصبح يطلع الدم الفاسد وكدليل على كلامي اذا بطلع منك قطع سوداء وبعدها ترتاحين فهذا هو السبب الدواء طلعها

تحياتي

برنامج نظام فيافي للنفاس
صحة وعافية ♥️

وصفات أكلات شعبية

وصفات أكلات شعبية

وصفات الأكلات الشعبية القديمة والتراثية والتقليدية من المطبخ الخليجي والعربي حسب موروث المطبخ الشعبي لكل دولة ومنطقة
ArabicEnglishFrenchGermanIndonesianItalianPersianPortugueseRussianSpanishTurkishUrdu