مصابيب صغار بدون بيض
طريقة عمل مصابيب صغار بدون بيض عبير العميرة بالصور
أهديكم عسل صافي 🍯🙊😘 مع ميني مرآصيع او مصابيب صغيرة يممم 😋
الوصفه مضبوطه وناجحه وبدون بيض وتنفع حتى للمبتدئات بالطبخ وراح تنجح معهم 👌🏻
طريقتي فيها ولا أسهل 👌🏻♥️♥️
saudi arabian masabib recipe
مكونات ومقادير وطريقة عمل وتحضير ميني مصابيب صغار :
لعمل عجينة المصابيب
– كوبين ونص طحين ( أسمر ) .
+ م ك بيكنج بودر + م ك خميره + نصف فنجان قهوه سكر + شوي ملح
+ ملعقتين كبيره حليب بودره
+ ربع كوب زيت + ٣ أكواب ونصف ماء
تنخلط المقآدير مع بعض بالخلاط
لين يصير عندك عجينه سآيله ثقيله شوي
ونخلّيها تتخمر شوي من ربع ساعه إلى نص ساعه وبس 👌🏻 .
. * تنبيه :-
الماء ممكن تزيد أو تنقص على حسب نوع الطحين
الطحين البر اللي استخدمته كل كوبين ونص طحين يحتاج 3 أكواب ونص ماء وطبعاً يختلف كل وحده تشوف كم يحتاج من ماء ممكن يزيد او ينقص على حسب الطحين .
بعدها نصب العجينة في علبة ضغط الكاتشب
ونجهز الصاج الحامي
ونصب المصابيب باحجام صغيرة
وتخبز على الصاج
واول ما الوجه ينشف وتطلع الفقاعات
نقلبها على الوجه الثاني
وبعد ما تخلص نحطها بحافظة
ونكمل باقي العجينة بنفس الطريقة لين تخلص
و آخر شيء بعد ما تخلصين منها
حطي عليهم خليط عسل مع زبده
أذوبهم ع النآر مع بعض وشوي قرفه مطحونه للي يحب أو فلفل اسود .
واذا بدت تغلي تصبّينها ع المصابيب
وتقدّمين المصابيب الصغار دآفيه ولا ألذ منها 😋👌🏻
سؤال وجواب عن المصابيب
كيف اعمل مصابيب قليله لشخص او شخصين او كمية كبيرة
اذا حابّه تضاعفين المقدار .. كل المقادير تتضاعف للدّبل إلا الخميرة ملعقه صغيره .. واذا لشخص او شخصين بدل الكوب استخدمي بياله معيار يعني بدل الكوب بياله وبدل الملعقة الكبيرة ملعقة صغيرة
كيف اخلي المصابيب صفراء
اللي تحب لونها يصير أصفر تضيف كركم .
كيف استخدم النكهات
وإذا تحبّين نكهات مثل القرفه والهيل أضيفيهم مع الزبده والعسل وبس والله 😘
ممكن تكتفين بس بالعسل الصافي مع المصابيب
صحة وعافية ♥️
