طريقة قهوة هيفاء سليمان
![طريقة قهوة هيفاء سليمان](https://recipes.qassimy.com/wp-content/uploads/2022/11/وصفة-القهوة-العربية-السعودية-هيفاء-السليمان-الحماد.jpg?v=1667681833)
طريقة طبخ وتحضير وعمل قهوة هيفاء سليمان بالصور
وصفة القهوة العربية السعودية الملكية الشقراء بالهيل والزعفران
يقول خلف بن هذال شاعر قبيله عتيبه 😍
سوولي الكيف وأرهولي من الدله
البن الاشقر يداوي الراس فنجاله
كيف لنا نحرقه بالنار ونزّله
وليا انقطع لو ورا صنعاء عنينا له 👌🏼
قهوتنا احنا اللي متعودين عليها هي قهوه وهيل وزعفران فقط …غيره ما نقدر نتقبله طبعاً هذي ثقافة مجتمع وكل مجتمع ومنطقة وناس لهم طريقتهم .. و القهوه اشتريها من عطاره العويس اللي عنده نوع واحد فقط اسمه قهوة الشيوخ .
how to make al qahwa al arabiah saudi recipe
طريقة طبخ وتحضير وعمل القهوة السعودية الشقراء بالهيل والزعفران :
قبل نبدأ كثير يقولون القهوة ماتضبط معنا ..مره تجي خفيفه ومره ثقيله
لذا يأعطيكم طريقة سهله جداً في كيفية وزن القهوة
اول شي جيبو ترمس قهوة حق لتر
وعبّوه مويه عشان تعرفون القياس
وبعدين حطوه في الابريق حق تفويح القهوه ويسمى
( ملقمة قهوة او مفواح قهوة او قمقوم قهوة او بكرج قهوة )
واذا غلت المويه
حطو مقدار فنجال واحد من القهوة زي مانتم شايفين
واذا غلت القهوة
نقصّر عليها النار
ونتركها لمدة نص ساعه
وآخر دقيقتين من الغلوه
نحط ملعقه كبيره هيل
وشوي زعفران
وملعقه صغيره حليب مبخر
( اختياري مرات احطه ومرات استغني عنه )
ونتركها دقيقتين تطبخ
وبعدين اشخلوها
وحطوها في الترمس
انا هذي قهوتي ما اضيف عليها غير اللي شفتو
ملاااحظه
الترمس او دله القهوة اذا جلست فتره طويله ماسويتي فيها القهوه ترا يتغير طعم القهوه فيها
يعني اذا بغيتو تستخدمون الترمس او الدله قبل الاستخدام الاساسي لازم تحطون فيها قهوه وهيل شوي مع مويه حاره وتتركونها نص ساعه تقريبا بعدين تغسلونها وتحطون القهوه الاساسيه
شفنا الطريقة في الزمزمية
واما اذا كنا نبي نقدم القهوة في الدلة
نفس طريقة الطبخ لكن الاضافات الهيل والقهوة ما نحطها مع القهوة في المفواح
نحطها بالدلة بعد ما نزلها
وسلامتكم 🌹🌹
وبالعافية