سلطة البرغل التركية
طريقة عمل سلطة البرغل التركية من اكلات مطبخ الشيف عبير العميرة
وصفة عمل سلطة تبولة البرغل التركية وبعضهم يسميها السلطه الأرمنية او التبولة الارمنية وعند الشيف منال العالم لها اسم سلطة البرغل
تحمست أصلحها بعد مامدحتها لي صديقتي الغاليه جمون وأنا أثق بذوقها 💘
صلحتها بطريقة منال العالم ما اعجبتني مره 😅 ورجعت اليوم صححت فيها بعض المقادير واطلعت على طريقة أم ريما حسيتها أفضل وطلعت فعلاً لذيذه وطبق مقبلات جميل ومفيد جداً
مكونات وطريقة اعداد وتحضير وعمل سلطة البرغل التركية :
اولا كاس برغل خشن ينقع في ماء لمدة ساعه
ثانيا
نجيب قدر
ونحط فيه ربع كاس زيت زيتون + بصله مفرومه ناعم وفص ثوم
ونقلبهم ٥ دقايق على نار هادئه
وبعدين نضيف م ك صلصة طماطم
وبعدين نضيف البهارات
فلفل أسود مطحون + بابريكا + ملح + فلفل أحمر حار مطحون (حسب الرغبه) + أوريجانو
طبعا ًمو ضروري البهارات نفس اللي كتبت المتوفر عندكم اضيفوه 😘
بعدين نصفي البرغل
ونضيفه ونقلبه شوي مع المكونات ٥ دقايق تقريبا
ونخليه على جنب يبرد على راحته
ونروح نسوي السلطة
*مقادير السلطة :
طماطتين نشيل منها اللب ونقطعها صغار مره مره
وحزمة بقدونس نفرمها باليد انا عندي افضل ونص حزمة كزبره + ٣اعواد بصل اخضر اللي يجي حجمه سخيف + قبضة نعناع نفرمه فرم ناعم ..
نخلطهم مع بعض
ونحط عليهم الصوص :
ربع كاس زيت زيتون + عصير ليمونتين + ٣ م ك دبس الرمان + شوي ملح
وبعدين نحلطهم مع السلطه
ونروح نشوف البرغل اذا هو بارد نضيف عليه السلطه
وذوقيها شوفي ملحها والليمون اذا مضبوط خلاص
وقدميها على حسب الرغبة واستمتعي بأحلا وأجمل مقبلات 😋😍👌
وبألف عآفيه ❤️
* ملاحظات :
– تجلس بالثلاجه لمدة ٥ ايام ماتتغير طعمها .
– منال العالم تقول تنفع نصلحها بالبرغل الناعم مو شرط خشن .
– المقادير سهله وسلسه لاتتقيدين بالمقادير نفسها نقصي وزيدي على حسب رغبتك .
صحة وعافية❤️♥️
