الكشري المصري على أصوله مثل المحلات
طريقة عمل الكشري المصري على أصوله مثل المحلات بالصور خطوة بخطوة من وصفات طبخات مطبخ بحب بلدي
وصفة طبخ اكلة الكشري لذيذة وسهلة وسريعة من المطبخ المصري بالخطوات التفصيليه
طريقتي بالتفصيل يمكن تكون مختلفة شويه ولكن الطعم مركز وأحلي والذ من المطاعم بكتير
how to make easy egyptian koshari recipe homemade
مكونات ومقادير عمل الكشري المصري :
المقادير علي حسب عدد أفراد الاسرة
عدس أبو جبه يعني اللي فيه قشرة غامقه
رز مصري
مكرونه حجم صغير
بصل مقطع شرايح رفيعه ومقلي
مكونات صلصة طماطم الكشري :
بصل مفروم ناعم + ثوم مفروم + طماطم مفرومه ف الخلاط + ملح + فلفل أسود + كمون + شطه حاره
مكونات صوص الثوم والخل دقة الكشري :
خل + ماء + ثوم مفروم + شطه+ ملح + كمون
طريقة اعداد وتحضير وعمل الكشري المصري :
اولاً بحمر البصل الاول في زيت غزير عشان يكون مقر مش
وافرده علي ورق مطبخ ليمتص الزيت الزائد
ثم أرش عليه قليل من الملح والكمون بيعطي طعم رائع للبصل
وخلي بالك أوعي تغمقي لونه عشان مش يكون طعمه مر
ودي صورة البصل المقرمش
طبعا أنا بقول الخطوات بالترتيب عشان نستفيد بالزيت اللي حمرت فيه البصل وكمان لان الزيت بيكون أخد طعم البصل
باخد الزيت واطبخ بيه العدس والرز والمكرونه
وبكدة استفدت منه بدل ما ارميه وف نفس الوقت بيعطي طعم حلو
المهم نضع قليل من الزيت في حله ع النار
ثم الماء وشوية بصل من اللي قليناه
ولما يغلي الماء نضع العدس المغسول والمصفي
واحط كمون أهم شئ
وكتري كمية الماء لان هاناخد منه للرز
ولما يقرب ع الاستواء نضع الملح
أه ونسيت بحط مع العدس نصف مكعب ماجي
وبعد ما يستوي بصفيه من الماء
واسيب العدس شويه ع نار هادئه لغاية مايتبخر من المايه وينشف تماماً
ثم في إناء اخر نضع شويه من زيت اللي قليت بيه البصل
وأضيف ماء العدس واظبط الملح
ولما يغلي أضيف الرز
واخليه يستوي عادي
وذي طريقة الرز العاديه
ودا شكل الرز بياخد لون حلو وكمان طعم
بعد كده المكرونه
ودي طريقتي فيها مختلفه شويه
بدل ما أسلقها ويكون مش لها طعم
بطبخها مثل الرز تمام
في إناء نضع شويه زيت
ثم الماء ومكعب ماجي وشوية فلفل اسود وملح
واخليهم يغلوا ثم أضيف المكرونه
مع مراعاة ان تكون كمية الماء يادوب تغطي وجه المكرونه
وأهدي النار جداً
واخليها تستوي مثل الرز
ودي بتكون طعمها احلي بكتير من المسلوقه
اخدتوا بالكوا من كمية المايه
وكمان بعد ما استوت مفلفله ولذيذة
بعد كده نجهز الصوص او صلصة الكشري الحمراء
نضع بصله صغيرة مفرومه ناعم مع فصين ثوم مفرومين
ونشوحهم شويه ع النار
ثم نضيف الطماطم المعصورة
ومعلقه كبيرة خل
وملح وفلفل اسود وشطه للي بيحب الحراق
بس أكيد الكشري لازم يكون حار جداً
ونسيب الصوص يتسبك تماماً ع النار
ودا شكله النهائي
بعد كده نجهز دقة الكشري اللي هي صوص الثوم بالخل
وكمان طريقتي فيه مختلفه شويه
في إناء صغير نضع
3 فصوص ثوم مهروسه وربع كوب خل وماء وملح وفلفل اسود وكمون وشطه مجروشه
واخليهم يغلوا غلوة واحدة ع النار
عشان كل حاجه تأخذ من بعضها ف الطعم
او تجهزيه ع البارد وتسبيه منقوع مع بعضه وتسبيه ف التلاجه بضع ساعات
نيجي بقي للكشري في التقديم
نضع طبقة من الرز
ثم العدس
ثم المكرونه
وهكذا حتي تنتهي الكميه
ونرش البصل ع الوجه
وعند التقديم نضع الصوص
بحد بجد كشري لذيذ وطعمه خيال
وممكن تغيري ف الترتيب
تخلي المكرونه طبقه اولي ثم الرز ثم العدس زي ماتحبي
المهم هو في الاخر كشري
ودي شكل السفرة كامله
وكمان قدمت معاه بالسفرة
قليت معاه باذنجان علي طريقتي لزوم التحابيش وكمان بيفتح النفس
ومرة تانيه مكنش موجود عندي فلفل احمر عملته بالأخضر وكان لذيذ
اعرفكوا علي خلطتي السرية لاحلي واطعم باذنجان
المقادير
٢ حبة فلفل اخضر
٢ حبه فلفل احمر (ضروري ليعطي لون حلو)
٢ حبة فلفل حار(للي بيحب الحار بس بية أكيد احلي)
حوالي ١٠ فصوص ثوم
خل+ليمون
بهارات(ملح+كمون+كسبرة ناشفة+فلفل اسود)
٢ م ك زيت ليعطي لمعه
الطريقة:
نضع كل المكونات ف المفرمة ونفرمها
وبعدين نضيف لها البهارات
شوفوا شكلها حلو اذاي تتآكل بالمعلقة
وبعدين نقطع الباذنجان دوائر
وننقعها في ماء وملح عشان مش يشرب زيت كتير
ونقليه ف الزيت
ونطلعه ع ورق مطبخ لامتصاص الزيت الزائد
ونوزع الخلطة عليه
وكمان باقي خلطة الباذنجان حشيت بيها طماطم
بقطع الطماطم بالنصف
ونفضيها من اللب والماء الموجود فيها
واضيف خلطة الباذنجان واحشي بيها الطماطم
وبخليها حراقه شويه
ياسلام سلم لذيذة وتفتح النفس يم يم
أتمني تجربوه متأكده إنه ها يعجبكوا
في رعاية الله وأمنه ولا تنسوني من دعواتكم الصالحه
والحمد لله الذي أطعمنا وسقانا وكفانا فكم ممن لا كافي له ولا مأوي
صحة وعافية❤️♥️
