مرقوق لحم كويتي

مرقوق لحم كويتي

طريقة عمل مرقوق لحم كويتي بالصور من مطبخ يوميات فرفر

وصفة مرقوقة اللحم على طريقة الوالده دعواتكم الطيبه لها 🥰

مرقوق لذيذ وسهل وسريع من المطبخ الكويتي الشعبي القديم

how to make margoog lamb kuwait recipe in arabic

مكونات و مقادير وطريقة عمل وتحضير مرقوق لحم كويتي :

صور وصفة مرقوقة اللحم المطبخ الكويتي الشعبي القديم margoog lamb kuwaiti recipe

اول شي نسلق اللحم بماي ٣/٤ استواء

مع راس بصل ودارسين وهيل شويه وورق غار وبهارات مشكله

وبجدر ثاني نحمس بصل مع زيت وثوم وزنجبيل مهروس

تقريبا قفشه كبيره او اكثر حسب كميتكم

وننزل شويه بهارات

(هيل ،كركم، كزبره،ملح وفلفل اسود )

ونحط عليه معجون طماط

انا حطيت علبتين وشويه لانه كميتي كانت كبيره انتو قللو

وننزل اللحم المسلوق

ونحمس الصلصه مع اللحم

ونحط طماط فرش معصور بالخلاط

وننزل لومي وراس ثوم

ونخليه يتسبك شويه

ونحط ماي سلق اللحم بعد ما شخلناه

ونخليه ٥ دقايق جذي يطبخ

وعقب انزل البطاط والجزر

ونخليه يطبخ

واذا حسيتو كميه الماي شويه زيدو ماي

ونخليه شويه لما تستوي الخضره

ونجهز عجينة المرقوق

مكوناتها طحين بر وشوي ملح وماء

ونعجنها وبعدها نحها كور صغيره ونفردها

ونفردها ونرقها طبعا ترقونه خفيف مو متينه

انا احب اخذ العجين من الخباز وتقدرون تستخدمون خبز لبناني ، او خبز صاج اسرع

وبعدين ننزل العجين

وفلفل حار اذا تحبون

ونخليه يطبخ

علما تستوي العجينه تقريبا نص ساعه

عاد انتو جيكو كل شوي

واخر شي ننزل البيديان الي قليناه

ونخليه ونقصر النار عليه

خطوه اختياريه وانا اشوفها موضروريه صراحه:

بمقلاه نحط

شويه زبده وثوم مدقوق وكزبره ناشفه وكزبره فرش

وتحمسونهم

وتضيفونه للمرقه اخر شي

مع قفشه سكر عشان تكسر الحلاة

ونخلطها وبس

وبكذا يكون مرقوق اللحم جاهز

وعليكم بالعافية 🥰

صور وصفة مرقوقة اللحم المطبخ الكويتي الشعبي القديم margoog lamb kuwaiti recipe

صحة وعافية ♥️

وصفات أكلات شعبية

وصفات الأكلات الشعبية القديمة والتراثية والتقليدية من المطبخ الخليجي والعربي حسب موروث المطبخ الشعبي لكل دولة ومنطقة