ايدام العزايم
طريقة عمل ايدام العزايم بالصور من مطبخ صولا الشهراني
وصفة اسهل و ألذ ايدام خضار مشكل باللحم ثقيل
صالونة خضار ولحم سعودي لذيذة وتعتبر ايدام العزايم
saudi arabian idam lamb mixed vegetables recipe
مكونات وطريقة عمل وتحضير ايدام العزايم :
في قدر الضغط
نضع ملعقتين اكل كبار زيت طبخ
ثم نضع حبه بصل مقطعه ناعم
ونحمسها
ونضيف لها البهارات الصحيحه عودين قرفه وورقتين من عشبة الشنه وورقتين ورق غار
وبعد ما حمستها زين
اضفت لها حبيتين طماطم معصوره مع كم حبة ثوم مفروم
ونقلبها زين لين تتسبك
ثم اضيف لها علبة معجون طماطم
واقلبها لين تنحمس
ثم اسكب عليها نص لتر ماء بارد مو حار عشان اللحم ما ينكمش
ثم اضيف فوقها كيلو لحم بالعظم مقطع قطع متوسطه
واقلبها
ثم اغطي غطاء الكاتم عليها
وبعد ما اسمع صافره الكاتم تطلع صوت قوي
احسب له نص ساعه
واول ربع ساعه نار عاليه
وباقي الوقت نار خفيفه
واذا بطبخه بقدر عادي نحسب لها ٤٥ دقيقه بعد غليان الماء عليها او ربع ساعه نار عاليه وباقي الوقت نارخفيفه ونراقب القدر العادي لو نقصت مويتة اللحمه نزودها لان يختلف عن الضغط تتبخر مويته اسرع من قدر الضغط
ثم بعد انتهاء مدة طبخه اطفي النار وافتح عليه
واشيل البهارات الصحيحه
واضيف له البهارات
مكعبات الماجي وملعقه صغيره ملح وملعقه صغيره كركم وملعقه صغيره بودرة الفلفل الحار الاحمر
وملعقه اكل بهارات ناعمه ومشكله كلا من(فلفل اسود وكزبره وكمون وثوم مجفف وقرفه وخولنجان )
ونقلب البهارات كلها مع اللحم
واضيف له الخضار المشكله والمقطعه مكعبات متوسطه
جزر وبطاط وكوسه وفلفل بارد وممكن بازلا
واي نوع نفضله نضيفه لها
ونقلبها كلها مع اللحم تقليب خفيف
ثم نغلق الغطاء عليها
ونحسب بقدر الكاتم له ٨دقايق
اول اربع دقايق نار عاليه
ثم باقي الوقت نار خفيفه
واذا بنطبخ بقدر عادي نحسب له ربع ساعه واول ٥ دقايق نار عاليه وباقي الوقت نار خفيفه
ثم بعد انتهاء الوقت
نفتح عليه
المرق ثقيل زي ما نبي
البعض يقول ما تطلع ثقيلة
لازم الكشنة تعاملينها زي كشنة الطبخ كثري بصل وصلصة والماء وسط وراح تطلع ثقيلة ويتبخر كثير من الماء
ونغرفه بطبق التقديم بدون تقليب عشان ما يخرب قوام الخضار
كذا بالمغرفه من تحت نشيل
ونقدم صالونة ايدام الخضار المشكل باللحم مع رز ابيض او مع خبز
طبق ايدام خضار لذيذ جداً وسهل وسريع
صحّة وعافية♥️
