انواع البيتزا الايطالية
طريقة عمل انواع البيتزا الايطالية بالصور من وصفات توب شيف خالد
وصفات طبخ أنواع البيتزا الإيطالية واسمائها ومكوناتها بالصور
بيتزا مارجريتا الإيطالية
بيتزا فواكه البحر بالبيستو و جبنة الفونتينا الإيطالية
بيتزا الفطر الإيطالية
بيتزا البيبروني الايطالية
فطيرة كالزوني الخضروات الايطالية
بيتزا فطر الشيتاكي مع جبنة الماعز و الزعتر
بيتزا كابريزي الايطالية
بيتزا بيضاء بالبيض و الجرجير و الخضروات الايطالية
how to make italian pizza recipe homemade
بالنسبة لمكونات وطريقة عجينة البيتزا كتبناها هنا في موضوع البيتزا الإيطالية الأصلية
اراح أحط أمثلة لكم نوع بيتزا ايطالية بنفس العجينة
بيتزا مارجريتا الإيطالية pizza margherita italiana
هذي البيتزا من أشهر و ألذ أنواع البيتزا حولين العالم
سبب التسمية هو زيارة الملكة مارجريتا لمدينة نابولي ( عاصمة البيتزا )
ومن باب الإحتفال سووا بيتزا فيها علم إيطاليا اللي هو الأحمر ( الصلصة ) ، الأبيض ( الجبن ) و الأخضر ( الريحان ) وهذي بالضبط مكونات هذي البيتزا
نفس المكونات لو زدنا عليها شرايح أنشوجة تصير بيتزا رومانا pizza romana أو البيتزا الرومانية
المارجرايتا اللي أسوي أستخدم فيها صلصة طماط + موزاريلا طازة وموزاريلا ناشفة + طماطم مجففة sundried tomatoes
و بعد ما تطلع من الفرن
أرش عليها زيت زيتون وريحان طازج وشوي بارميجانو ريجانو.
بيتزا فواكه البحر بالبيستو و جبنة الفونتينا الإيطالية pizza frutti di mare italiana
هذي وحدة من ألذ ألذ أنواع البيتزا اللي ذقتها بحياتي
البيتزا ممكن تنعمل بأي نوع من المأكولات البحرية زي الربيان أو اللوبستر أو حتى المسل (بلح البحر) أو القواقع أو الكلماري
نقدر نستخدم وحدة منهم بس أو أكثر نخلط أكثر من نوع
نبدأ بإننا نخلط اللحم اللي بنستخدم مع شوي بيستو ريحان بعدين ندهن عجينة بيتزا بعد ما نفردها بصلصة وبعدين نحط الربيان وآخر شي طبقة من جبنة الفونتينا
جبن الفونتينا نوع من أنواع الجبن الإيطالي يذوب بسهولة وله تقريبا نفس قوام الموزاريلا بس بطعم أقوى شوي.
بيتزا الفطر الإيطالية pizza al funghi italiana
فيه آلاف الطرق اللي نقدر نسوي بيتزا بالفطر
في هذي النسخة راح أستخدم فطر بورتابيللو Portabello mushroom مع بصل أحمر وجبن موزاريلا وصلصة طماطم عادية
وبعد ما تطلع من الفرن برشها بشوي زيت فقع أو truffle oil وشوي ريحان وبارميجانو ريجانو
فطر البورتابيللو فطر كبير في حجمه وله طعم “لحمي” قوي
تقدرون تستبدولنه بفطر أبيض طازج عادي أو أي نوع فطر تحبون
في حال توفر عندكم فقع جربوا تستخدمونه مع البيتزا وشوفوا كيف الطعم
كون فترة الطبخ قصيرة في البيتزا ما تتدمر نكهة الفقع زي مايصير في أغلب الأحيان في الطبخ الشعبي.
بيتزا البيبروني الايطالية italian pepperoni pizza
في آخر دراسة عن أكثر بيتزا مطلوبة بيتزا البيبروني فازت بأكثر عدد من الأصوات
بيتزا البيبروني سهلة
صلصة ، حلقات بيبروني وجبن موزاريلا بس
كثير ناس سألوني عن البيبروني
البيبروني هو نوع من أنواع السجق أو النقانق
يسوونه بإنهم يفرمون لحم مع شحم وبهارات
( بهارات كثيرة منها بابريكا وفلفل حار وثوم )
وبعدين يملحونه ويدخنونة وآخر شي يخلونه ينشف ويتعتق أو يتخمر بالأصح وهذا اللي بيعطيه طعمه.
فطيرة كالزوني الخضروات الايطالية italian vegetable calzone
الكالزوني نوع من أنواع البيتزا اللي تكون مقفلة زي المحفظة تقريبا
كل المباديء اللي تكلمت عنها للبيتزا تمشي هنا الفرق بس في طريقة الفرد و اللف.
تقدرون تسوون الكالزوني بأي حشوة تبون
أنا أستخدمت هنا صلصة طماطم مع جبن موزاريلا فريش و ناشفه ، ذرة ، فلفل أحمر مشوي ، ريحان ، بقدونس ، سبانخ وبصل أحمر
المكونات تمشي مع بعضها بشكل جدا جدا ممتاز هنا.
عشان نسوي الكالزوني أول شي هو إننا نفرد العجينة لأنحف شي نقدر عليه بالضبط زي ما سوينا في البيتزا العادية
بعدين نبدأ نرص المكونات في نص البيتزا بس ونخلي النص الثاني فاضي
آخر شي نقفل النص الثاني على النص الأول بحيث يعطينا شكل نص دائرة وبعدين نلصق الأطراف في بعضها.
ندهن الكالزوني بشوي زيت زيتون وبعدين نقطع كم فتحة فوق عشان نهوي الحشوة وما تنفجر علينا داخل الفرن
آخر شي نحط الكالزوني فوق الحجر بالضبط زي ما سوينا في البيتزا إلين تستوي من فوق وتحت.
بيتزا فطر الشيتاكي مع جبنة الماعز و الزعتر Shitake mushroom , thyme and goat cheese pizza
هذي البيتزا نوع من الأنواع اللي يسمونها بيتزا بيضاء يعني بدون صلصة طماطم وسويناها في موضوع البيتزا الايطالية الاصلية
راح أستخدم هنا نوعين فطر هم الشيتاكي و الفطر الأبيض العادي
تقدرون تستخدمون أي نوعين فطر موجوده أو حتى نوع واحد لو ماكان موجود إلا هو
جبنة الماعز goat cheese من ألذ أنواع الجبن
قوام هذا الجبن ونكهتة جدا مختلف عن أنواع جبن البقر اللي الغالبية متعود عليها
حليب الماعز يعطي الجبن هذا نكهة وقوام خاصيين.
بعد ما نفرد العجينة ندهنها بطبقة زيت زيتون
بعدين نحط فوقها فطر الشيتاكي المقطع و الفطر الأبيض العادي
وبعدين نقطع عليها قطع من جبن الماعز
ونرش عليها شوي من جبن الفونتينا
بعدين رشة ملح وفلفل أسود وزعتر طازج thyme
وبعدين ندخلها الفرن
بعد ما نطلعها من الفرن
نزينها برشة زيت فقع وجبن بارميزان.
بيتزا كابريزي الايطالية italian caprese pizza
كابريسي يعني على طريقة كابري اللي هي وحدة من مدن إيطاليا
فيه سلطة مشهورة جدا بهذا الإسم اللي هي سلطة الموزاريلا مع الطماطم ومكونات هذي البيتزا أبدا موب بعيدة
البيتزا مستخدم فيها صوص بيستو بدال صوص الطماطم
وفوق البيستو حطينا طماط صغار مع موزاريلا بوفالا ( موزاريلا الجاموس )
بعد ما تطلع البيتزا من الفرن رشينا عليها صوص بلسمك.
أول شي نسويه هو صوص البلسمك
في قدر صغير نطبخ ٣ أكواب خل بلسمك ( من النوع الرخيص ) على غليه خفيفه إلين يبقى منها كوب واحد ويثقل الخليط ويتحول لسائل ثقيل
ننقل الصوص لصحن ونخليه يبرد قبل نستخدمه
هذا الصوص جدا لذيذ وله إستخدامات كثيرة جربوه مع السلطات أو كصوص مع اللحوم أو غيره أو حتى مع الفراولة أو الإسكريم.
نفرد العجينة بعدين ندهنها ببيستو ريحان
بعدين نقطع فوقها شوي جبن موزاريلا طازه (يفضل من نوع موزاريلا بوفالا)
وبعدين نرص فوقها حبات طماط صغار مقطعه أرباع
ندخل البيتزا الفرن
وبعد ما تطلع نرش عليها شوي زيت زيتون و أوراق ريحان ونبشر عليها شوي بارمزان
وآخر شي نصب عليها شوي من صوص البلسمك.
بيتزا بيضاء بالبيض و الجرجير و الخضروات الايطالية italian egg and vegetable pizza with arugula
بيض في بيتزا ليش لأ ؟ كله بروتين
هذي البيتزا مثال ثاني على البيتزا البيضاء أو البيتزا بيانكا وصدقوني جدا جدا لذيذة
هذي البيتزا تنفع بالذات كفطور متأخر أو اللي يسمونه برنش brunch
طريقة عمل هذي البيتزا تختلف شوي عن الطريقة العادية كوننا بنحط البيض بعد ما تنطبخ القشرة نص طبخة عشان ما تخربها
الخضار المستخدمة هي الفلفل الأحمر المشوي مع زيتون الكلماتا المنزوع النوى وحلقات البصل. حلقات البصل بالذات ضرورية هنا كوننا بنكسر البيض داخلها عشان تمسك البيض وهو فوق البيتزا
الجبن المستخدم هنا بيكون جبن بارمزان بس وتقدرون كالعادة تضيفون نوع ثاني لو حابين.
نبدأ أول شي بإننا نفرد العجينة بعدين ندهنها بشوي زيت زيتون
وبعدين نحط الفلفل الرومي الأحمر المشوي
وبعدين زيتون الكلماتا منزوع النوى
و بعدين نحط بصل مقطع حلقات عريضة
نرش شوي جبن بارمزان
وبعدين ندخل البيتزا الفرن إلين تتحمر الأطراف
بعد ما تتحمر الأطراف نطلع البيتزا من الفرن
ونكسر بيضتين ( أو حسب الرغبة ) داخل حلقات البصل
بعدين نرش البيض بشوي ملح وفلفل أسود
ونرجع البيتزا للفرن إلين تكمل أستواء
ويستوي البيض للدرجة اللي حابين
بعد ما تستوي البيتزا نطلعها من الفرن
ونرش عليها كمية من الجرجير وإضافة بارمزان لو حابين.
صحة وعافية❤️♥️
نقلا عن مدونة توب شيف
