وصفة بسبوسة سودانية

طريقة عمل بسبوسة سودانية بالصور خطوة خطوة من وصفات حلويات مريم الحسين

اسهل و ألذ واضبط وصفة البسبوسة السودانية في المنزل بالمقادير

بسبوسة تينا بنت خالي… وبالمرّه اوريكم طريقتي بتاعت الشيرة، فكرة بسيطة تضمن ليك الشيرة بتاعتك تكون مظبوطة وما تحبحب ليك… البسبوسة لزيزه وطاعمة وبتذوب في الخشم زي حلاوة قطن…مقادير البسبوسة باختصار في الصورة وبالتفصيل

how to make dessert sudanese basbousa recipe in arabic

مكونات و مقادير وطريقة عمل وتحضير وصفة بسبوسة سودانية :

اول شي نبدا بالشيرة لانه مفروض نعملها وتبرد عشان تكون هي بارده والبسبوسة حاره

الشيرة مقاديرها ساهله

بس كانت مرات بتعمل لي حركات

السكر ما بذوب، او بتغاظ من الوقفة الطويلة والسواطة… او السكر يحبحب لي في جنبات الحلّة، او بعد تنتهي وتكون ممتازة، القى السكر عمل طبقة من فوق

عشان نتفادى المشاكل دي، بقيت اعمل حركة بسيطة ريّحتني شديد

اول حاجة المقادير حسب الكمية

انا بحب اعمل قدر استخدامي

كوب سكر… ومعاه مويه

كمية الموية حسب التقل العايزاه

لو عايزه شيرة تقيلة

اعملي ربع كوب موية

البسبوسة بتحب الشيرة الرقيقة عشان تشربها

بقوم اعمل مع كوب السكر، نص كُوب موية

كبيهم في الحلة العايزه تعملي فيها الشيرة

يفضّل تكون حلّة تقيلة عشان ما تسخن ليك بسرعة

احنا عايزين النار تكون هادية

ما ترفعي الحلة في النار لسّه

كبي السكر والموية وسوطيهم سوا… ساي برّه على البارد

طبعا لانه كمية السكر اكتر بكتير من كمية المويه

ما حيذوب كلهلكن بذوب جزء كويس منه…

الان ارفعي الحلة في النار

وتكون نار هادية

ارمي في الحلة تلاته حبّات هبهان او قرفة

انا بحب الهبهان لانه ما بغيّر لي لون الشيرة

وسوطي شويه

هدفنا انه السكر يذوب في الموية قبل ما يغلو سوا

يعني النار الهادية تسيّح السكر في الموية… عشان يبقى معقود

النار بتربط السكر والمويه سوا وببقوا سائل لزج حتى لو برد ما بنفصلوا

لو المويه غلت قبل ما يذوب فيها السكر، بتتبخر لانها اساسا شويه

استمري في التحريك

ما حتطّولي كتير لانك بديتي قبل ما تختيها في النار

بعد شوية حتلاحظي انه السكر ذاب كله في الموية

بعد ده ما بتحتاجي تسوطي كتير

ببقى سائل شفاف، لكن ما نضيييف…

خليهم سوا في النار

بتبدا تظهر فقاقيع.. والسائل ببقى شفاف اكتر

ما تخليه يغلي كتير

اطفي النار واعملي فيها تلاته نقاط ليمون

الليمون بمنع السكر يتكتّل ليك

ما تكتريه عشان ما يطغى طعمه..

كده الشيرة جاهزه

ختيها في برطمان لو عايزه

قوامها الحالي وهي حارة بكون اخف

لمن تبرد بتبقى اتقل شويه

الان نجي للبسبوسة

مافيها بري كتير

في الخلاط ختي

تلاته بيضات وكباية سكر وملعقة فانيليا وتلاته ارباع كوب زيت وعلبة قشطة

حركة الخلاط ما ضروري ممكن بمضرب البيض ساي تعمليها

بس كسل مني ساي

ما تخلطيهم كتير عشان ما يدخل فيها هوا كتير وتبقى ليك زي الكيكة

القشطة بتدي قوام وطعم خرافي

ممكن بدلها تعملي زبادي لو عايزه

بس بنصحكم بالقشطة بالجد عجيبة

في كوره

كبي كباية سميد ومعاها كبايتين جوز هند.. وملعقة كبيرة باكينج باودر

وحرّكيهم سوا

لو عايزينها بسبوسة تقيلة زي حقت المحلات

اعملوا العكس

كبايتين سميد وكباية جوز هند..

ضيفوا محتويات الخلاط مع المقادير الجافة وسوطيهم سوا

وكبيهم في صينية تكوني مسحتيها بي زيت

عشان ما تمسك ليك.. الألومنيوم في الغالب ما بمسك..

الفرن طبعا لازم يكون مسخّن على درجة حرارة ١٨٠

بتاخد من ٣٥-٤٠ دقيقة

اول ما تشعري بيها في الأطراف ظهر لون بنّي

معناها استوت من تحت

اطفي النار تحت

وولعي من فوق عشان تاخد تقميره بي فوق

خليها تبرد حبة

وقطّعيها وسقّيها بي شيرتك ديك

نقطعها عشان تشرب لينا الشيرة تمام

وغطيها عشان تطري بالحرارة

شوفوا حتى لونها بقى مختلف بعد الشيرة

غير الطعم بتديها لمعة حلوة كده

صحة وعافية ♥️