ملوخية مطبوخة بالطريقة السودانية
طريقة عمل ملوخية مطبوخة بالطريقة السودانية بالصور من مطبخ مرام عبيد
وصفة الملوخية المطبوخة أو ملاح الخدرة الطبيخ لذيذة و سهلة من المطبخ السوداني التقليدي و الحديث والمعاصر
الملوخية تسمى (الخدرة) بالعامية السودانية و هي اكلة سودانية مشهورة ولا يخلو منها بيت في السودان فهي طبق رئيسي على المائدة سواء كانت مطبوخة او (مفروكة) وهي من الوجبات المفضلة كما انها صحية ومغذية بما تحتويه من الياف وعناصر اخري ضرورية
مُحبي الطبيخ يظهروا !! أسرع وأسهل وأطعم ملوخية مطبوخة بالرز ممكن تعملوها
sudanese food recipes
مكونات ومقادير عمل ملوخية مطبوخة بالطريقة السودانية :
كيس ملوخية مجمدة ..او ربطة ملوخية واحدة
صدر دجاج مقطع مكعبات
بصلة متوسطة
٣فصوص ثوم
١طماطم
بهارات
ملح
فلفل
كزبرة
كوبين رز
نص كوب شعرية
طريقة اعداد وتحضير وعمل ملوخية مطبوخة بالطريقة السودانية :
نبشر البصلة ونشوحها في شوية زيت لمن لونا يبدا يتغير ويميل للدهبي
وبعدين نضيف التوم المبشور ونقلب لمن تطلع ريحة التوم
ثم نضيف مكعبات الدجاج ونقلب في نار متوسطة لمن يستوي وينشف من الموية
ثم نضيف البهارات الكزبرة والفلفل ونقلب
ثم نقشر الطماطم ونبشرها كمان ونضيفها للدجاج والبصل
ونقلب المكونات ونخليها خمسة دقايق تستوي مع التقليب
ثم نضيف ٢ كوب ماء مغلي ونخلي الشوربة دي تغلي كويس
ونضبط الطعم بالملح على حسب الرغبة
ثم نضيف الملوخية ونخليها تغلي غلوتين فقط عشان لونها ما يتغير او تقطع
ونطفي عليها وما نغطيها
لو حابين تعملو قدحة توم ممكن ..انا ما عملت
اما الرز بالشعرية
ننقع كبايتين رز مصري ربع ساعة في موية
في الاثناء دي نحمر نص كباية شعرية في شوية زيت
ونصفي الرز ونقلبو مع الشعرية ونضيف ملعقتين صغار ملح وتلاته ونص كوب ماء مغلي
ونخلي النار عالية في الاول لمن حبات الرز تبدا تظهر وبعدين نوطي النار خالص لمدة ٢٠ د-٢٥قيقة
وان شاء الله يطلع احلى رز حبه حبة وما معجن .. وبالهنا
نصيحة صغيرة 💖💖💖💖
بورق كمية من الملوخيه وبحفظا في اكياس مقسمة في الفريزر لمن اكون محتاجة ملوخيه مفروكة بستعملها زي ماهي و لمن أحتاج مطبوخة بشيل الكيس وهو مجمد وبخلطو في ال food processor خلطة سريعه بتديني نفس نتيجة وقوام فرم الملوخية يدويا
صحة وهنا
صحة وعافية♥️
