مطبق فول
طريقة عمل مطبق فول بالصور من وصفات توب شيف خالد
وصفة عمل مطبق الفول لذيذ وسهل وسريع من المطبخ السعودي
الأكله اليوم جدا سهلة ووحده من ألذ الأكلات عندي ، لو آكلها كل يوم ما قلت لأ. المطبق أكله شعبيه سعوديه ومن أصل هندي أو يمني على ما أعتقد وموجود شي قريب لها حتى في الأكل الأندونيسي. المطبق عبارة عن عجينة نحيفة محشيه حشوة لحم مليانه بيض وكراث في الغالب أو تكون حلوه ومحشيه موز وقشطة. المطبق أكله تتقبل حشوات كثير برأيي وما أشوف ليش ما نحشيها بأشياء غير الحشوتين هذي بس ؟
المطبق اللي بسويه اليوم محشي بحشوة فول. الفول اللي مستخدم بيكون كامل يعني ماراح يكون فول مطحون وبيكون مطعم بكراث كثير و بيض بالضبط نفس حشوة اللحم. الحشوة هذي جدا لذيذه وتنفع مع كذا شي غير المطبق. عجينة المطبق مسويها بنفسي بس تقدرون تستخدمون عجينة سمبوسة جاهزة أو حتى عجينة سبرينج رول وكلها بتعطي نتيجة رهيبة.أنا هنا بستخدم فول ناشف و أطبخه من الصفر إذا تبون تقدرون تستخدمون فول معلب مطبوخ وجاهز الخيار راجعلكم.
how to make easy arabic foul mutabbaq recipe homemade
مكونات ومقادير عمل مطبق الفول :
مكونات ومقادير عجينة المطبق :
٣ أكواب طحين أبيض
ملعقة كبيرة خل
٣ ملاعق كبيرة زيت
نص ملعقة صغيرة ملح
٣/٤ كوب مويه حاره
مكونات ومقادير حشوة الفول :
كوب فول ناشف أو ٣ أكواب فول معلب
حبة بصل مقطعه صغار
٣ حبات بصل أخضر
٤ فصوص ثوم مقطعه صغار
عود فلفل أخضر حار ( إختياري )
ملعقة كبيره معجون طماط
ملعقة ونص كبيرة كمون
ملعقة صغيرة كزبرة
نص ملعقة صغيرة بابريكا ( يفضل مدخنه لو عندكم )
ربع كوب كزبرة مفرومه
٣ حبات طماط مقطعه صغار
بيضتين
كراث حسب الرغبة مقطع صغار
للزينه والتقديم :
صوص دقوس وصوص طحينه
طريقة عمل وتحضير مطبق الفول :
طريقة عمل عجينة المطبق :
نخلط المقادير مع بعض إما بإستخدام عجانة أو باليد
بعدين نعجنها إلين تعطينا عجينة لينه
نكمل عجن إلين تتكون عندنا عجينة ناعمه ولينه وسهل مطها
تقريبا ٥ دقايق بالعجانة
ندهن العجينة بطبقة زيت خفيفة
بعدين نغطيها ونخليها ترتاح ساعتين أو أكثر
هذي العجينة ما فيها خميرة ولا راح تتضاعف بس لازم ترتاح عشان يسهل فردها بعدين.
نقسم العجينة ل ٨ – ١٠ أقسام
ناخذ قسم من العجينة و نغطي الباقي
بعدين نفرده بيدنا شوي ونرش طحين عالوجهين.
الحين نمرر العجينة في مكينة الباستا
من أسمك درجة في البداية بعدين ننقص السمك كل مره إلين نوصل للسمك اللي يعجبنا
إذا لقينا العجينة تلصق نرش شوي طحين عليها عشان نفتادى إنها تلصق
أنا أفضل تاخذون العجينة لأنحف سمك ممكن
بس إذا كان صعب عليكم تتعاملون معها تقدرون تخلونها أسمك شوي.
طريقة عمل حشوة الفول FOUL FILLING
نغسل الفول الابيض الجاف
بعدين نفرده على صحن ونتأكد إن مافيه أي بقايا حصى أو أغصان
بعد كذا ننقع الفول في مويه باردة كثيره طول الليل.
ثاني يوم نصفي الفول من مويه النقع
بعدين نحطه في قدر ونغطيه ب 3 أكواب مويه مع شوي زيت زيتون
نغلي المويه على غليه جدا خفيفه
ونخلي الفول يطبخ إلين يصير شبه لين بس شوي قاسي من داخل تقريبا ساعة
بعدين نحط الملح ( تقريبا نص ملعقة صغيرة )
ونخليه يكمل طبخ إلين يصير لين
الان الفول مطبوخ جاهز
تقدرون تستخدمونه علطول بالضبط زي ما تستخدمون فول العلب
أو تقدرون تصفونه بعدين تفرزونه أو تحفظونه في الثلاجه أسبوع تقريبا.
نجهز الحشوة
الحين نسخن مقله على حراره هاديه
ونطبخ البصل و البصل الأخضر و الثوم و الفلفل الحار مع رشة ملح
إلين يذبل تماما ويبدأ ياخذ لون ذهبي خفيف
تقريبا ربع ساعة
لا ترفعون الحرارة ولا تطبخونه أقل من كذا
طبخ البصل لهذي الدرجة يعطيه عمق نكهة رهيب مع الفول.
الحين نحط معجون الطماط
ونطبخه شوي تقريبا دقيقه
بعدين نحط الفول المطبوخ بعد ما نصفيه
ونحط الكمون و الكزبره و البابريكا و الكزبرة المفرومه
ونخليهم يطبخون شوي
الحين نطفي النار
ونكسر البيضتين عالخليط
ونضيف الكراث و الطماط
ونذوق الخليط
ونعدل البهارات و الملوحة و الحموضه حسب الرغبة.
الحين عشان نحشي الخليط
ناخذ عجينة المطبق اللي سوينا وفردنا
ونقص كل شريحة
سوينا بالنص بالعرض
يعني بيصير عندنا شريحتين أقصر من الأصليه
نحط الشريحتين فوق بعض بحيث يتقاطعون على شكل +
ونحط شوي من الحشوة في النص بعدين نقفل عليها من ال ٤ جهات
نقص الزوائد لو كانت موجوده ونحطها عالجنب إلين نطبخ المطبق.
الحين عشان نطبخ المطبق
نسخن مقله أو صاج على حرارة وسط مع شوي زيت
وبعد ما تحتر
نحط المطبق
ونطبخه إلين يتحمر الوجه الأول
بعدين نقلبه ونطبخ الوجه الثاني إلين يتحمر.
ويقدم مطبق الفول مع صوص الطحينه وصوص الدقوس
لعمل صوص الدقوس
٣ طماطات مقسومه في النص + فصين ثوم + ٣ قرون فلفل أخضر أو حسب الرغبة
حطيها في صينية فرن بعدين إشغلي الشوايه حقت الفرن
( يعني من فوق على أحر شي )
وحطي الصينية قريبه منها إلين ينشوي كل شي
طلعيها من الصينية
وقشري الطماط
بعدين حطي كل المقادير في خلاط مع شوي عصير ليمون ورشة ملح وفلفل أسود وشوي كزبره
و أخلطي إلين يعطيك دقوس
عدلي الطعم و الملوحة على ذوقك
صحة وعافية❤️♥️
