عجينه العشر دقايق
طريقة عمل عجينه العشر دقايق بالصور من مطبخ كوكب
how to make arabic 10 minute dough recipe
وصفة عجينة العشر دقائق ام المعجنات مكتوبة كتابه و مضبوطه و مجربة و قطنيه و هشه و طريه
بصراحه متعجبه شلون عجينة العشر دقايق ما تضبط مع بعض الأخوات
اللي تقول عجينة العشر دقايق ماتضبط معي أو تقول ليش عجينة العشر دقايق ماتنفش و ما انتفخت او ماتتماسك او ما اختمرت او تقول ماذا افعل اذا عجينة العشر دقايق تلتصق و تتقطع معي
أنا بأعلمكم وأشرح لكم طريقة العجينه ام عشر دقايق بالتفصيل الممل
قبل كل شي اللي تحب عجينة العشر دقايق نص الكميه تقلل فقط نصف المقادير يعني تبينها لشخص واحد او تبينها لشخصين او ثلاث اشخاص او اربع اشخاص او خمس اشخاص تقدرين تتحكمين في الكمية وما راح تتأثر وبتكون مضبوطه اهم شي طبقي خطوات عمل العجينة
بسم الله
يالله نبدأ في عمل عجينة العشر دقايق الصحيحة وتضبط معك وتتخمر وتنفش وتنتفخ وتتماسك ولا تلتصق أو تتقطع معك
عجينة العشر دقايق مضبوطه لجميع الاستعمالات والمعجنات يعني عجينه العشر دقايق تنفع للدونات و للبيتزا و للفطاير و خلية نحل والحلزونيات والصامولي والتوست وراح اسوي لكم تطبيقات وتشوفون
من ناحية الفرزنه …. تجلس احيانا شهر .. بدون مبالغه
طبعا عجينة العشر دقائق لها مرحلتين وكل مرحلة لها مقادير
مكونات ومقادير وطريقة عمل عجينه العشر دقايق :
المقادير والمعايير للخطوة الاولى واضحه من الصوره
مقادير الخطوة 1 :
2 كاس دقيق منخول
3 ملاعق حليب بودره
ملعقة كبيرة خميره
ربع كوب سكر
كوبين ماء
طبعا استخدمت الدقيق السعودي العادي
ونقصت ربع كوب من الماء عشان نفشة العجينه ما تكون على الجنبين في الصامولي اذا طويتيها وتركتيها يتضاعف حجمها .. عشان تطلع على فوق بس اذا ببتسوين فطاير ومعجنات حطي الماء كامل
وعشان تصير سهلة التحكم
طبعا طريقة العجينه ام عشر دقايق في العجانه
المرحلة الاولى ضربناها في العجانه بالمضرب وهذي مرحله مهمه
شوفو شلون العجينه ام عشر دقايق سايله في مرحلتها الاولى
هالحين نتركها عشر دقايق تتخمر في مرحلتها الاولى
بعد مرور عشر دقايق نضيف
مقادير الخطوة 2:
نصف كوب زيت
3 أكواب دقيق
ونشيل المضرب من العجانه ونحط آلة العجان ونعجنها
لو ما يتوفر عندك العجان الالي مو ضروري كنت اصلحها واعجنها بدونه بيدي بالمرحلة الثانية وتضبط تماما
ونعجنها زين
لين نحصل على عجينتنا
هنا عجينة العشر دقائق قبل النفشه وخليتها ترتاح وقت
هنا عجينة العشر دقائق بعد النفشه وانتفخت بعد ما ارتاحت وتخمرت
هالحين باوريكم تطبيقي من هالعجينة اللي سويناها
الكميه والمقدار اللي شفتيها قدامك وعجناها من خمس اكواب دقيق عملت منها ثلاث اصناف
( توست – صامولي – خبز همبرجر )
اول شي الخبز الصامولي تفردينه وتطوينه وتقفلين اطرافه
وادهنها بالحليب الطازج اول ما اطويها قبل تنتفخ وتنتفش
البس قفازه باصبعي عشان ما بغى الحليب اللي ينزل على الخبزه يكون كثير يمكن ينزل من الاطراف
يادوب 3 – 4 نقط وتتركينه ينتفش
عجينة الصامولي بعد النفشة
بالنسبه للصامولي اذا طويتها احط على الجنبين دقيق علشان اذا التصقت بعد التحمير تنفصل بهدوء
وسويت خبز الهمبرجر تفردينه وتلملمينه وادهن الوجه بالحليب الطازج
وتتركينه ينتفش
طبعا تغطين الصينيه بغطاء سماط مثلا
وذا بعد النفشه
وهذا خبز التوست نفس الشي وادهن الوجه بالحليب الطازج
وللامانه اذا انتفش وهو في القالب ارجع وافرده واطويه مره ثانيه
واذا انتفش ادخله الفرن
نشغل الفرن درجه الحراره 350 الكهربائي اما كم مدة استواءه … الافران تختلف حرارتها …. جلست معي 40 دقيقه … اول شي اللي تحت .. واذا بدت الاطراف اشوفها بدأت بالتحمير …. انزلها للرف السفلي ….. واشغل اللي فوق … وانا عندها عشان ما تحترق
لذا مدة الخبز … مو محدده بس غالبا 45 دقيقه
بالنسبة التوست اذا طلع من الفرن لاتقطعينه لفيه بفوطه نديه يعني موكثيره مويتها
شوي بس
بعدين دخليها الثلاجه واذا برد القالب قطعيه
بعض الاخوات تقول احب اعمل عجينة العشر دقائق بالدقيق الاسمر البر
العجينة بالدقيق البر فيه مرات اصلح بالبني … بس مو كل مقدار الدقيق بر .. فقط احط 2 كاس فقط والباقي ابيض يغني خليط
بس اذا انتي يتحطين الخمس كاسات كلها من الدقيق البر الاسمر ما اوافقك …. الدقيق البر الاسمر حساس .. حتى اذا شريتي من المخابز خبز بر تلقينه ناشف شوي .. الا مخابز محدوده
جربي نص المقدار بالدقيق البر الاسمر عشان ما يروح تعبك خساره في العجينة
وذي طريقة جربتها
صلحت نص المقدار
في المرحله الاولي حطيت كاس ابيض
ولما جت المرحله الثانيه حطيت كاس ونص بر والزيت
وطلعت تهبل
في عجينة العشر دقائق دائما الدقيق السعودي العادي وما استخدم الدقيق الكويتي واستخدامي له على نطاق ضيق مثلا الكيكه الاسفنجيه او الكيكه اللي بآله التوست المثلثه لانه يقيدك ما عاد تستخدمين غيره
البعض يقول المقدار الاساسي للخميرة ملعقتين بس شوفة عيونكم انا حطيت ملعقه وحده وناجحه …. بس جربي اللي ترتاحين له حطي مثلا ملعقة ونص خميرة
الشي الثاني اني حطيت ربع كاس سكر والاصل ثلث كاس … بس لاني حسيت ان فيها نوع من الحلاوه نقصت شوي … ما صار شي ونقصت شوي من الماء بعد ومضبوطه
انتي كوني لك مقاديرك الخاصه
امس صلحتها وحطيت 2 ملعقه حليب ناشف … طلعت نفس الش
اهم نقطه في عمل العجينة … كميه متساويه من الدقيق والماء …. ومقدار المخصص للحليب وبقية المقادير … الخ …. وبعد ضربهم بالمضرب بعشر دقايق نحط باقي الدقيق والزيت وهذي الطريقه صرت اعتمدها في كل معجناتي خليه .. سينمون … الخ
كميه متساويه من الدقيق والسوائل .. اضربهم بالمضرب وبعد عشر دقايق باقي الدقيق و الزيت
اوزان واحجام لزيادة المعرفة وان شاء الله تفيدكم
55 جرام سكر = 1/4 كوب
225 جرام سكر = كوب
150 جرام دقيق = كوب واحد
450 جرام = 3 أكواب
225 جرام زبدة = كوب واحد
225 جرام سكر بودرة = 1/2 1 كوب
225 جرام سكر خشن = 1 كوب
وبالهناء والعافية على قلوبكم
وبالعافيه 💙
