طريقة عمل بطاطس ودجز بالفرن
طريقة عمل بطاطس ودجز بالفرن من اكلات مطبخ الشيف عبير العميرة
وصفه عمل بطاطس ودجز بالفرن مثل المطاعم 😍🍟😋
تهقون أسوّي مشروع بطاطس ودجز 😅🙊
أعشقه يممم لذيذ 😋👌🏻
مكونات وطريقة اعداد وتحضير وعمل بطاطس ودجز بالفرن :
ننظف البطاطس ونغسله مضبوط مع قشرته
والبطاطسه تكون (حجم وسط )
وننقعها في مويه وملح 10 دقايق
وبعدين نقطع البطاطس الوحده لنصفين بعد النصف يطلع معنا ٤ قطع
باعطيكم طريقتين للتبيلة
التتبيلة الاولى
م ك نعناع مجفف ، م ك زعتر برّي ، م ص ثوم بودره ، م ص فلفل أحمر بودره ، ملح ، فلفل أسود ، م ص كركم ، بهارات ايطاليه ، ٣-٤ م ك زيت زيتون ، وحطيت رشة من اكليل الجبل المجفف .
التتبيلة الثانية
ملح ، فلفل أسود مطحون ، بهارات ايطاليه ، باربيكيا ، فلفل أحمر حار مطحون ومجروش 🙊 ،
كزبره ناشفه مطحونه ناعم ، اوريغانو ، بقدونس مفروم ، بودرة ثوم ، بودرة بصل ، شوي برش ليمون .
( اختاروا اي تتبيلة فيهم ومو شرط تلتزمون بالتتبيله بالكامل كل وحده وذوقها 🙊) .
ونجيب زبديه
ونحط فيها التتبيلة اللي نحب
ونضع معها البطاطس
ونخلطها مع بعض بملعقه
ونقلبها مضبوط
ونصب عليها زيت زيتون يغطّي كل القطع ونقلبها
ونخليه بالثلاجه لمدة ساعه كامله
اللي ماعنده وقت مايحتاج تخلينه بالثلاجه بس أحلا يكون بالثلاجه لمدة ساعه عشان يتشرب الخلطه قبل الفرن وكل ماطولت المده كل ماتشرّب البطاطس الخلطه وطلع أطعم 😋👍. .
نجيب صينيه حافتها قصيره ونحط قطع الودجز فيها بشكل عشوائي جنب بعض مو فوق بعض
ثمن نرش على الوجه مره ثانيه زيت زيتون
ندخله بالفرن ونشغله من تحت على درجة ٢٥٠ يجلس ثلث الى نص ساعه تقريباً
وبعدين نشغل عليه من فوق ونحمرها من فوق أحلا شي يكون محمّر من الجهتين .
أنا ما أحركها أبداً عشان ما تتكسر معي وعند التقديم الافضل تقدّم ساخنه 😋😍👍
وقدّمو البطاطس الودجز مع الصوص اللي تحبون 😘
وعساه هني وعافيه على قلوبكم ❤️❤️❤️
– ملاحظه :
١- البطاطس اشترو النوع الخاص للفرن مو للطبخ .
من أهم المميزآت ( بطاطس القلي أو الفرن اللي يكون خاص بالتحمير تكون القشره لونها فاتح ورقيقه والبطاطس يكون قاسي ، بعكس بطاطس الفرن )
٢- بالنسبه لي أحب الفرن أكثر من جهاز الفيلبس لأني أحط الكميه كلها مره وحده ما احب انتظر واجلس أحرك بين فتره وفتره وعاد على راحتكم 🙊
٣- ماتغطون الصينيه بقصدير ولا شي تخلونها مكشوفه والافضل الصينيه تكون حوافها قصيره .
4- بنفس الطريقه تنفع مع البطاطس الحلوه والقرع 😋
مره يجننن لا يفوتكم 😍👍
صحة وعافية❤️♥️
