طاجن الكوارع فى الفرن
وصفة طاجن الكوارع فى الفرن سهل ولذيذ بالصور trotters recipe من وصفات وعمل مطبخ مروة عمر
هو الصراحه طاجن الوحوش يعني 💪 وياحبذا يا ريثما أصحاب يع وكخ يمتنعون عن التصويت لان كوارع الدنيا كلها كوم والطاجن ده كوم لوحده فيالا نبدأ ☺️🙈
مكونات ومقادير عمل طاجن الكوارع :
لسلق الكوارع اولا
– كوارع متنضف كويس
– بصله وجزره
– ملح وفلفل وورقه لورا وحبهان ومستكة
للطاجن
– بصله مقطعه مكعبات
– قرن فلفل عادي وقرن فلفل حامي
– فصين ثوم مفرومين
– ملح وفلفل
– عصير ثلاث طماطم
-كوبايه شوربه كوارع
طريقة اعداد وتحضير وعمل طاجن الكوارع :
بنسلق الكوارع بالطريقه المعتاده بنشوحها ومعاها اللورا والحبهان والمستكة والفلفل الأسود
وبعدين ننزل بالجزره والبصله متقطعين
ونسيبها لحد اما تتهري لو في الحله الضغط بتاخد ساعه وربع بالضبط
وبحط الملح من الاول عادي
– بعد لما تتسلق
بنجهز الطاجن بقا
– بنقطع البصله مع الفلفل الاخضر والثوم والملح والفلفل وندعكهم بإدينا كويس مع بعض ونرجع ننزل بيهم هما والكوارع وعصير الطماطم والشوربه علي النار البوتجاز يغلوا غلوتين بس
– نكون مسخنين الفرن ننزل بيهم في طاجن ونسيبهم ياخدوا ويدوا مع نفسهم شويه حوالي نص ساعه واوعدكوا صدقوني هتحبوا الكوارع جدا
– ملاحظات
– قرن الفلفل بيفرق جدا في الطاجن ده لان الاكل ده عموما حلاوته وهو حامي لو مش موجود ممكن نص معلقه شطة أو زي ما انا عملت كده قرنين شطة ناشفه وفركتهم فيه
– الكوارع مش وحشه ولا يع بس تتجاب من مكان نضيف وموثوق فيه ولا عمرها هتكون ليها ريحة ولا طعم يضايق بس تتجاب صح
وصحتين وألف عافية😋
