طريقة عمل دمعة الدجاج السودانية

طريقة عمل دمعة الدجاج السودانية

طريقة عمل دمعة الدجاج السودانية بالصور من وصفات مريم الحسين

دمعة الدجاج – الجداد .. كيف نسبّكها.. خطوة خطوة

اكبر فرق بين دمعة الدجاج ودمعة اللحمة انه الدجاج بطلّع موية كتيره

وعشان تتسبك لينا تمام، حننتبه للحاجه دي

الفرق التاني في البهار.. والتسبيك يا حلوات يعني الطبيخ بتاعك كان كبيتيه في الصحن، ما بتسيل ليك منه مويه بالجنبه.. وكمان من فوق بطلع وش بتاع زيت.. بنتكلم عنه كله حسي

how to make Chicken sudanese recipe in arabic

مكونات و مقادير وطريقة عمل وتحضير دمعة الدجاج السودانية :

اول خطوة نقطع البصل

انا ما قاعده اشتغل بحجم التقطيع كتير لانه بحب اخلطها بالمفراكة

لكن لو بصل سمح ومات ليك ما ضروري تخلطيها

كبي حبة زيت في النار ما تكتّري.. لانه الدجاج فيه دهن برضه

صورة وصفة دمعة الدجاج السودانية - الجداد Chicken sudanese recipe

قلبي البصل في الزيت تمام وما تستعجلي عليه

اديه نص ملعقة صغيرة ملح عشان يتحمر ليك سريع

انا بحب اخليه يتحمر حبة كده.. نكهته بتطلع لزيزه

نظفي الدجاج بتاعك بس ما شديد

شيلي الجلد منّه

ما قاعده اغسله بي خل ولا ليمون ولا اي شي ده كله يبقيه مسيخ.. بالمويه ساي وخلاص

صورة وصفة دمعة الدجاج السودانية - الجداد Chicken sudanese recipe

كبي الدجاج في البصل عشان الدهن اللي فيه يطلع مع البصله وعشان طعم البصلة يكون في الدجاج

قلبيه شويه بس يبقى لونه ابيض.. وقطّعي ليك طماطمه تكون حمرا.. لو ما عندك ما ضروري.. قلبيهم كلهم سوا

بعد ده حنطفيه بي حبّة موية.. حبة لانه الدجاج بطلع موية زي ما قلنا.. والطماطم بتطلع مويه

ده غير انه الدجاج بستوي سريع ما زي اللحمة.. فما عايزينه يتهرد

اعملي ملعقة صغيرة كزبرة ناشفة وزيّها هبهان مسحون

ديل اساسيات لدمعة الدجاج.. لازم هبهان مسحون

صورة وصفة دمعة الدجاج السودانية - الجداد Chicken sudanese recipe

وخليهم يغلوا سوا.. ما تغطي الحلة ما بحتاج

بعد شويه شوفي الدجاج لو نضج، طلّعيه من البصلة

صورة وصفة دمعة الدجاج السودانية - الجداد Chicken sudanese recipe

وكبي ملعقة كبيرة صلصة.. عايزين اللون يكون حلو

واخلطيها بالمفراكة اليدوية لو عايزه

ورجّعيها النار.. ما ترجّعي الدجاج فيها لسه

لمن تشعري الدمعة بدت تتسبّك ومويتها قلّت

رجعي الدجاج فيها خليه يتسبّك معاها

واهرسي تلاته فصوص توم كبار وكبيهم فيها

وارخي النار شديد في المرحلة دي وخلي الحلّة فاتحة

بعد شويه الزيت الكبيناه للبصل قبيل داك، حيبدا يظهر بي فوق ويعمل ليك وش.. لو شعرتي بيه كتير، قلليه

صورة وصفة دمعة الدجاج السودانية - الجداد Chicken sudanese recipe

قدّمي دمعة الدجاج مع القراصة، او الفطير

احنا بنحبها مع الفطير لانه خفيف وظريف

صورة وصفة دمعة الدجاج السودانية - الجداد Chicken sudanese recipe

صحة وعافية ♥️

مطبخ مريم الحسين للاكلات السودانية

مطبخ مريم الحسين للاكلات السودانية

وصفات و طبايخ و أكلات طبخ سوداني من مطبخ مريم الحسين السوداني .. الوصفات خاصة فقط باكلات سودانية شعبية قديمة ومشهورة من المطبخ السوداني التقليدي و المطبخ السوداني الحديث والمعاصر من عمل الشيف السودانية مريم الحسين
ArabicEnglishFrenchGermanIndonesianItalianPersianPortugueseRussianSpanishTurkishUrdu