الذ جريش
طريقة عمل الذ جريش بالصور من وصفات مطبخ تولين
وصفة اكلة الجريش سهل وسريع ولذيذ
من اليوم ورايح أعتمدي هالجريش بكل ثقه ولا تدورين غيره ولا تشرين جاهز
لأن جداَ طعمه مميز وخيالي
مكونات ومقادير وطريقة عمل وتحضير الذ جريش ابيض بالكشنه:
أفرمي بصله وحطيها بقدر مع شوية زيت وقطعه صغيره زبده
لما تذبل ويتغير لونها
حطي شوية كمون و2مكعب ماجي
وحركيه شويه عالنار لين ماتحسين راحت زفرة الماجي
صبي 2كوب ماء مغلي +ملعقه خل أبيض+ وشويه ملح لاتكثرون الماجي فيه ملح
وخليه عالنار 5 دقايق تطبخ لوحدها بدون ماتحطي حب الجريش
بعد خمس دقايق حركيه وأضيفي الجريش بعد مانقيتيه زين وغسلتيه زين
(وانا أرشح الجريش التركي فاتح شوي أفضل من غيره)
تخلينه لين ماتحسينه قرب يستوي والمويه قربت تنشف
خذي كبشه جريش
وحطيها بزبديه وحطي معها 2ملعتين زبادي
وحركيها زين لين مايسير لونه أبيض مو قطع الزبادي واضحه أنتبهي لا.
ورجعيها للقدر وحركي شوي شوي لين مايندمج الكل مع بعض
وأهم شي التحريك المستمر
عشان ما يلصق الجريش فالقدر
الله يعينك لازم واقفه جنبه
ولين ماتحسين سار ثقيل والمويه قليله.
وذوقي ملحه وأنتي الحكم إذا يحتاج زيدي.
خذي كبشة جريش ثانيه في زبديه
وأضيفي لها 2ملعتين جبنه سايله الزرقاء
وحركيها زين زين
ورجعيها للقدر وحركيه ثانيه.
خذي كبشه جريش وللمره الأخيره
وحطي معها ربع أصبع زبده +2ملعتين قشطه طازجه المراعي
وحركي زين
ورجعيها للقدر
وأقعدي حركي القدر لين ما الجريش يتشرب كل السوائل
وخليه على نار هاديه
الجريش يقعد يطبخ على نار هادئه او واطيه مع التحريك المستمر عشان مايلصق بالقدر
أخر شي تكونين مجهزه بصل الكشري او الجريش وملحته شوي
وتحطين الجريش بحافظه وحطي بالنص سمن
وإذا ماعندك حطي زبده بس موزي السمن
وحطي البصل ورشي شي خفيف لومي (ليمون أسود مطحون)
وتمتعي بألذ جريش بالعالم
هذي حافظة الجريش أرسلتها لأصحاب زوجي ومن جد أنهبلو عليه
و صحة و هنا ❤️
