طريقة السوفلية الأصلية

طريقة عمل السوفلية الأصلية بالصور من وصفات توب شيف خالد

وصفة تحضير حلى السوفليه الفرنسي الاصلي لذيذ وسهل وسريع

في هالموضوع راح نتعلم ماهو السوفليه و كيف تصنع السوفليه و كيف يطبخ السوفليه

السوفليه يمكن أكثر أكله تجسد الأكل الفرنسي ويمكن الأكله الوحيدة اللي مربوطة بعلم فرنسا بالتحديد ، ما تحرف ، ما تعدل ، ولا تطور كثير . الأبل باي مثلا أو فطيرة التفاح أكله أمريكية بس طبعا فرنسية الأصل

السوفليه في المقابل فرنسي أصلي .

كثير من الطباخين يخافون من السوفليه كونه صعب تتكهنين بالنتيجة اللي بتطلعلك عشان كذا يحاولون يبعدون عنه في المناسبات الهامة ( تخيلي مثلا عشاء زواج و الحلى ما يطلع ؟؟؟ )

أسباب فشل السوفليه كثيرة بس غالبا لها حل و غالبا ممكن الواحد يتفاداها لو عرف كم نقطة .

طيب وشو السوفليه ؟

السوفليه موب كيك ، موب كسترد ، موب مولتن كيك بعد ، ولاهوب موس ولا بودنج ؟ هو تقريبا هاذول كلهم !!

ومن جد فيه من مواصفاتهم وخصائصهم كلهم .

السوفليه من برا المفروض يكون زي الكيك تقريبا قاسي أو له قشرة ، من جوا ما يكون ناشف زي الكيك ؟؟؟؟ ولا يكون سايل زي المولتن كيك !

من جوا قريب من الموس بس حار فيه صفار بيض ومنتجات ألبان غالبا وهذا يخليه كسترد بس بنفس الوقت موب كسترد؟؟؟

يكون منفوش وكل ما نفش كان أحسن و أضبط بعد ولكن بنفس الوقت مافيه أي مواد رافعة !!؟

شفتوا وشلون هو تقريبا كلهم .

أقرب شي أقدر أقولكم إنه تقريبا زي السيريلاك بس حار و منفوش و أطعم طبعا .

السوفليه ممكن يتسوى بأي نكهة وموب شرط بعد يكون حلو ممكن يكون مالح

واحد من أشهر الأكلات هو سوفليه الجبن بس هذا موضوع ثاني عاد .

ومب شرط بعد يكون حار فيه سوفليه مبرد بعد!!!

الفوندانت أو المولتن كيك أو اللافا كيك هذا شي ثاني مرة ، طبعا أسهل بكثير من السوفليه ، فرص إنه يخرب شبه معدومه ،و غالبا ثقيل .

البودنج : مدري وشلون أوصفه هذا شي يجي بارد أو حار ، طبعا الكلمة نفسها يدخل تحتها أشياء و أطباق كثير وتعريفها في بريطانيا غير أمريكا بعد . بس ما علينا هذا عاد أسهلهم .

الحين عاد جا دور الشي الرئيسي ……..

شرحتلكم وشلون طعم السوفليه المفروض يكون ، وقلتلكم إنه لازم يكون منفوش وكل ما نفش كان أضبط

وحاولت أقربلكم كيف السوفليه يكون من جوا

اللي ما تعرف وشو السوفليه وخايفة تجرب جربيه أول شي في مطعم ، بس نصيحة اللي ما يعرف وشو وما يبي يسويه يجربه و أنا متأكد إنه يبي يعجبكم .

السوفليه طبعا عبارة عن أساس نكهة + مادة رافعة

الأساس يمديك تسوينه غالبا قبلها بكم يوم بعدين تخلطينه مع المادة الرافعة قبل ما تحطينه في الفرن بس ما يمديك تسوينه كامل وتخزنينة أو تشيلينه لمكان ثاني

السوفليه لازم يتسوى في نفس المكان اللي بتاكلينه ، ولازم ينوكل بنفس الوقت بعد .

الأساس حق السوفليه غالبا بيتخفف عشان كذا لازم الأساس يكون طعمه قوي بحيث إنك إذا خففتيه يتعادل .

طيب نجي الحين للمادة الرافعة

أنا قلت إنه ما معه مادة رافعة بس كان قصدي إن ما معه رافع كيميائي زي البيكنج باودر وغيره

اللي يرفع السوفليه هو الهواء المحجوز في المرانج . السوفليه يدخل الفرن ، الهواء يتمدد بالحرارة ويرفع معاه الخليط إلين يوصل حد و يتصلب بياض البيض ، الهواء يروح ويبقى السوفليه شامخ . souffle أو سوفلي بالفرنسي معناها يتنفس أو ينفخ و أظن إنكم الحين فهمتوا ليش .

الحرارة مهمة جدا للسوفليه خصوصا في أول مراحل الطبخ و هذا سبب كبير لخراب كثير من السوفليهات

لازم الحرارة تكون عالية بحيث إنها تمدد الهوا ولازم تكون متواصلة عشان كذا يفضل ما تفتحين الفرن خصوصا في أول مراحل الطبخ ، نسمة هوا باردة تكمش الهوا وينسم السوفليه وما يرجع زي ما كان

زي ما قلت الحرارة هنا مهمة جدا عشان كذا لا عمرك تسوين سوفليه في صحن غير دائري أبدا !!! لأن الحرارة مهيب موزعة صح ! وهذا ممكن يخرب السوفليه حقك .

شي ثاني السوفلية يحتاج صحون موب شرط صحون سوفليه !!! حتى صحون القزاز أو الأكواب العاديه اللي ضد الحرارة تنفع بعد

بس أهم شي لا تحاولون تسوونه في صحن سيليكون أو أي صحن ما يمسك نفسه يعني لين

غير كذا لا تنسين إنك بتقدمينه في نفس الصحن فحاولي تختارين صحون حلوة بعد

السوفليه ما ينفع ينقلب على صحن زي الفوندانت .

اللي راح يرفع السوفليه هنا هو بياض البيض راح نسوي مرانج

أعتقد عاد إني تكلمت كثير عن المرانج

المرانج اللي راح أستخدمه هنا هو مرانج فرنسي ( عادي )

هذا يمكن أهم شي في السوفليه لازم نحاول ندخل أكبر كمية هوا عشان يرفع السوفليه أعلى رفعة يقدر عليها بالعربي لازم تعرفون كيف تنفشونه صح .

نفس الخطوات اللي تكلمت عليها ألف مرة بس بعيدها هنا للتذكير و الأهمية .

أفصلي البيض وهو بارد دايما ، البيض البارد أسهل يفصل بدون ما ينكسر الصفار عليك

و أخفقي البياض وهو على حرارة الغرفة ، عشان يعطيك أكثر كمية .

بعد هذي عاد أهم شي !!! تأكدي إن مافيه أي نقطة صفار في بياض البيض نقطة وحده ممكن تخرب شغلك كله !!!

زي ما تكلمت كثير البياض ما يحب الدهن أيا كان نوع الدهن و صفار البيض مليان دهن

و بعد تأكدوا إن الصحن اللي بتخفقون فيه يكون مرة نظيف هو و المضرب حق الخلاط .

الصحن حق الخفق لازم معدن هنا ، يفضل بعد لو نحاس ولو إني ما أتوقع أحد عنده ، بس النحاس لسبب معين يعطي نفشة زيادة للمرانج . نفس الشي للمعدن بس بشكل أقل بكثير

أبعدي عن البلاستك و أنا ما أمزح هنا البلاستك قريب من الدهن وراح يمنع البيض ينفش .

تقدرين تحطين شوي نقط عصير ليمون لو تبين عشان تنفش أحسن وتمسك الخليط بعد ، بس هنا ماراح نخلي البيض يقعد كثير فما يحتاج .

السوفليه غالبا يجي له تاج !؟ التاج هو الجزأ اللي يطلع برا الصحن ويمديك تسوينه مسطح من فوق وحلو أو إذا ما سويتي التاج راح يسير سوفليهك له زي القبة ، الطعم ما راح يتغير بس الشكل غير بقولكم طبعا كيف تسوون التاج .

أوووه نسيت بالنسبة للمقادير دايما أكواب وملاعق معيارية .

الحين عاد الوصفات لعمل السوفليه بانواعه الفرنسيه :

how to make soufflé french recipes homemade

سوفليه الشكولاته Chocolate Souffle

مكونات ومقادير عمل سوفليه الشكولاته :

١٠٠ جم شكولاته غامقة من أحسن نوعية تلاقينها مقطعة .
١/٣ كوب سكر
صفار بيضتين + صفار بيضتين + ٦ بياضات بيض ، فهمتوا وش أقصد !!
كوب حليب كامل الدسم قصير الأجل
١/٤ كوب طحين
رشة ملح

كيفية وطريقة عمل وتحضير و إعداد سوفليه الشكولاته :

أول شي في قدر صغير أغلي الحليب مع الشكولاته و نص السكر و الملح .

وهو يغلي جيبي صفار بيضتين مع باقي السكر

و أخلطيهم إلين يسير باهت لونه شوي

بعدين حطي عليهم الطحين و أخلطي زين .

الحين صبي الشكولاته أول ما تغلي على البيض شوي شوي و حركيها زين

بعدين رجعيها على القدر على حرارة أقل من النص بشوي إلين ما تبدأ تغلي مع التحريك المستمر

بعد ما تغلي شيليها من النار وحطيها في صحن حديد وخليها تبرد شوي .

اللي سويناه قبل شوي أكيد قد شفتوه قبل إسمه كريم باتسييه أو كريمة الحلويات وهذا عبارة عن كسترد مثقل بنشا وراح نستخدمه هنا كأساس للسوفليه .

بعد ما يبرد زيدي عليه صفار بيضتين

الحين صار الأساس حقنا جاهز

ويمديك تحفظينه يومين لو تبغين .

جهزي صحون السوفليه الوصفة هذي تكفي يمكن ٤-٥ صحون أبو ٣/٤ كوب تقريبا

أدهني الصحون بزبدة دافية ( موب سايحة وموب زيت )

وبعدين غطيها يسكر خشن وشيلي الزايد

السكر هنا راح يتسلق عليه السوفليه وهو يطلع .

سخني الفرن على حرارة ٤٢٥ فهرنهايت

وحطي الشبك في الوسط .

الحين بخلاط كهرب على أعلى سرعة أخلطي بياض البيض زين في صحن معدني إلين يوصل مرحلة منقار الطير .

الحين هذي الخطوة جدا مهمة !! كيف تخلطين الأثنين ؟

هدفنا هنا إننا نخلطهم كلهم بدون ما ننفش البياض كثير طبعا في هذي المرحلة الأساس جدا ثقيل ولو حاولتي تخلطين البياض معاه بيتعبك شوي ، عشان كذا خوذي بس شوي من البياض و أخلطيه مع الأساس بقوة عادي هذا بس عشان يلين الأساس شوي لباقي البياض

الحين حطي نص البياض وبملعقة مطاط أخلطيهم شوي شوي و إنتهي تنفشينه الحين شوي شوي بس إلين ينخلط صح بعدين حطي الباقي .

بيسير شكله زي كذا تقريبا .

الحين صبيه في صحون السوفليه للحافة !!!

طبعا نسوي كذا عشان ما يسير له قبة .

الحين عاد نجي للتاج وشلون تسوينه ؟

يمكن موب باين في الصورة للأسف بس الفكرة هي إنك تمررين طرف أصبعك أو حتى طرق ملعقة شاهي على أطراف الكوب كأنك تمسحينه بالعربي بتسويين حفرة بسيطة في الخليط

طبعا هذي طريقة فيه ناس تتفنن زود وتسوي التاج في الوسط وكذا يعني ترسمين زي الحلقة بعيد عن الطرف شوي بطرف أصبعك أو طرف الملعقة لو تبين طبعا

بس موب في الوسط يعني بعد الطرف بحوالي ١ سم و إذا نفش السوفليه بيجيك شكله غريب وحلو أنا شخصيا مقتنع بتاجي في الطرف أشوفه أحلى كذا

الحين على طول لازم تحطي السوفليه في الفرن على صينية يفضل تكون أصلا في الفرن

بعد ما تدخلينه في الفرن

نزلي حرارة الفرن ل ٣٧٥ فهرنهايت هذي حرارة الطبخ الأصلية

طبعا الفكرة هنا هي إننا نسخن الفرن أكثر من اللازم كونه أول ما تحطين السوفليه بيبرد شوي عشان كذا نحطة على حرارة أعلى من اللي نبي .

بعد حوالي ٢٠ دقيقة طلعيه من الفرن

وقدميه على طول !! ولا ينسم ويروح الهوا .

قدمي السوفليه طبعا ما يحتاج أقولك مع إيسكريم .

===
اللي عاد يمل من الشكولاته جربوا هذا …..

سوفليه الفانيلا بالبرتقال Vanilla and Orange Souffle

مكونات ومقادير عمل سوفليه الفانيلا بالبرتقال :

كوب وثلث حليب كامل الدسم
عود فانيلا مقسوم
ثلث كوب + ملعقة طعام ونص سكر
١/٣ كوب طحين
١ ونص ملعقة كبيرة زبدة دافيه
٤ بيضات مفصولة
قشر برتقالة

كيفية وطريقة عمل وتحضير و إعداد سوفليه الفانيلا بالبرتقال :

جهزي صحون السوفليه زي الطريقة اللي فوق

الحين سخني كوب من الحليب إلين يبدأ يغلي مع الفانيلا و البرتقال

وبعد ما يغلي طفي النار وغطية ١٠ دقايق عشان يطعم .

الحين أخلط ١/٣ كوب الحليب الباقي مع الطحين + السكر في صحن

بعدين أضيفيها للحليب الحار وخليها تغلي مع التحريك المتواصل

بعد ما تغلي طفي النار وحطي الزبدة و حركيها زين معاهم بعدين غطيها وخليها ١٠ دقايق .

وبعد ١٠ دقايق شيلي الفانيلا و حطي صفار البيض .

الحين سوي المرانج

و أخلطيه زي فوق بالضبط و سوي كل شي زي فوق بالضبط

الفرق إنك قبل ما تدخلينها الفرن رشيها بسكر مطحون

هذا بيسوي طبقة ذهبية فوق السوفليه .

أستمتعي بأحلى سوفليه مع إسكريم أو صوص شكولاته بس طبعا موب هيرشي .

لاحظي وشلون جوا موب سايل ولاهوب ناشف شي بالوسط …

====

الحين عاد الوصفة الأخيرة :

سوفليه القهوة Coffee Souffle

هذي الوصفة بالضبط زي الأولى سوفليه الشكولاته بس بوريكم كيف تعدلون عليها .

ذوبي ملعقتين كبار نسكافيه إسبريسو مع ملعقة من الحليب اللي في الوصفة الأولى على حرارة وسط إلين ما يذوب ويغلي بعدين حطي باقي الحليب وكملي الوصفة عادي زي الأولى .

الفرق هنا إن مافيه شكولاته و السكر هنا بس ثلاث ملاعق كبيرة . بدال ثلث كوب

سوفليه المنجا والباشن فروت مع ايسكريم جوز هند وصوص كاراميل استوائي