لقيمات هيفاء سليمان
طريقة عمل لقيمات هيفاء سليمان بالصور
وصفة اللقيمات بطريقتي 💗 لذيذة وسهله في افضل خليط لقيمات جاهز هونيخ وبأعلمكم سر نجاح لقمة القاضي الجاهزة
خليط لقمة القاضي الجاهز هونيخ افضلها على عجينه البيت فيها طعم لذيذ جداً مقارب لطعم الصامولي اذا جاك حار مقرمش توه طالع من الفرن 👌🏼
الطريقه لعمل لقيمات هيفاء سليمان :
لعمل اللقيمات انا استخدم كرتون خليط لقمة القاضي الجاهز ماركة هونيخ او ينطقها البعض (هونق )
خليط اللقيمات الجاهزة استخدمها من ٢٥سنه معتمدتها ومهما طلعت طريقه جديده ارجع لها
لقيمات ماركه هونيخ جاهزه يجي في العلبة حليط اللقيمات وكيس خميرة معاه
اخلطي حليط العجينه
وحطي معها خميرتها اللي تجي في الكرتون
وزيدي عليها شوي خميره من عندك
وهذا سر نجاح لقمة القاضي الجاهزة 👌🏼
وتعجنينها بمويه فقط
وبالنسبه للمويه ماعندي وزنيه معينه
اعجن لما اوصل للقوام اللي انتم شايفيه زي قوام عجينه اللقيمات العاديه
وتتركينها ترتاح وتتخمر من ٤٥ دقيقه الى ساعه
وبعدين لقميها
كيف تطلع اللقيمات مدوره
ملعقه بلاستيك تغطينها في الزيت
بعدين تاخذينها بهالطريقه وتبدين تلقمين
اول شي حمي الزيت
وبس تحطين اللقيمات قصري النار
وخليها تستوي راحتها
وكل شوي قلبي اللقيمات عشان تاخذ اللون كامل من الاخر
وكل ما اشتغلتي ولقمتي مجموعة جديدة قصري ع نار لاجيتي تسوين الدفعه الثانيه
عشان الزيت لو ما كان حار يستوي من برا وداخل عجين
وبعدها نسقيها شيرة او دبس
انا احب الدبس اكثر من الشيره احطه عليها .
اللي حاب يشتري دبس يحصله في محلات بيع التمور وياخذ دبس خلاص فقط …..دبس تمر السكري مايصلح ابد وفيه ريحه
انتبهو لايغشونكم ويعطونكم دبس مخلوط خلاص مع سكري تراه يبين يصير الدبس فيه قطع صغيره مو سايل
دبس الخلاص يجي سايل ولونه مايل للشقار
اما اللي تحب تحط شيرة
طريقة الشيره
كاسين سكر نذوبها لين تتكرمل ويصير لونها بني فاتح
وبعدين نوضع عليها بالتدريج مويه تقريبا ثلاث ارباع الكاس وتكون المويه حاره
وبعدين نقلبها ونوضع معاها ليمون اسود مطحون ذره فقط لاتكثرون مع كم حبة هيل ونقلبها
وبعدين نختبر قوامها اذا شفنا القوام المناسب خلاص نسكر النار عنها ونحطها ببرطمان
من افكار المتابعات
*خليط لقيمات القاضي هونج احسن نوعية لقيمات وممكن تزيدينها دقيق وحليب ونشاء وتصير مقرمشه للي يحبها مقرمشة بزيادة
*انا نفس الشيء استخدمها نفس طريقتك لكني اخلط مع ماء العجن شوي لبن تطلع روووعه جربي أو أضيف أحيانا بيكنج بودر واحيانا اسويها عجينة مثل عجينة الفطاير وأضيف المقادير شوي زيت وافردها واقطعها دواير بالبيالة واقليها تطلع روووعه كأنها جبنيه
*جربي الطحين العادي مع المقادير الثانيه اللبن والنشا والكاسترد فعلا لقيمات احلى من القاضي
و صحة و هنا ♥️
