طريقة عمل طبيخ البامية السودانية

طريقة عمل طبيخ البامية السودانية

طريقة عمل طبيخ البامية السودانية بالصور من وصفات مريم الحسين

وصفة طبيخ البامية من المطبخ السوداني لذيذ وسهل وسريع

كيف تسبّكي الطبيخ… حأشرح بمثال عن طبيخ البامية.. اهداء لكل عروسه جديده 🙂

اكعب حاجه ممكن تحصل لما تكبي طبيخك في الصحن، وتسيل مويه شفافه كده بالجنبه… معناها طبختك ما مسبّك.. لما الموية تسيل بي الجنبة، معناها المويه الفي الطبيخ لسه ما طلعت.. او بصلتك ما اتحمّرت كويس..

how to make bamya sudanese okra stew recipe in arabic

مكونات و مقادير وطريقة عمل وتحضير طبيخ البامية السودانية :

اول خطوة تحشي بصلك

ممكن زييّ شرايح وممكن مكعبات صغار

كبي زيت بحيث تكون الكمية بتغطي البصل

في ناس بكتّروا الزيت لدرجة يغمر البصل

بس انا بكتفي بشويه

اول ما يسخن نكب فيه البصل

اتأكدي ان الزيت حار

عشان البصل لو نزل في زيت بارد حيطّلع مويه وتختلط بي الزيت ويأخد وقت أكتر عشان يتحمر ليك

ما تشغلي نفسك بالتقليب كتير

امشي وتعالي كل دقيقتين حرّكيه

اول ما يبدأ لون البصل يبقى اصفر

يكون جاهز للخطوة البعدها

بعداك تكوني مغسلة لحمتك ومقطّعاها

وتتأكدي انه ما فيها مويه

تكبيها في البصله

عشان تتحمّر بالزيت .. وتاخد من نكهة البصله

قلبيها لحدي ما تبقى لونها رمادي

ما بتكون استوت كده، لكن بتكون أخدت النكهة

الخطوة البعدها

الطماطم، لو عندك طماطمات لينات في التلاجة وما نافعين للسلطة

ممكن تقطعي منهم اتنين ما تقطعي صغار ما بحتاج

او ممكن تستخدمي الطماطم المعلبة الجاهزة

انا بجيب قودي وبتكون قاعده في الدولاب لما احتاج ليها

تكبيها مع اللحمة

وخليها شوية من غير تحريك عشان تتحمّر بالزيت

بتاخد نكهة عجيبة

صور وصفة طبيخ البامية من المطبخ السوداني bamya sudanese okra

الخطوة البعدها

سوطي الحاجات دي كلها مع بعضها

وبعداك كبي ملعقة كبيرة كزبرة مطحونه، وحبة قرفة ناعمة وحبة هبّهان

احنا بنكب البهار عشان زفارة اللحمة ما تظهر

ونقلبهم بس حبّة سوا

ونكب مويه لحدي ما تغمر اللحمة

ونقلب عشان الموية تتوزع في كل الحلة بي التساوي

ونخلي النار وسط، ونغطي الحلّة

(ممكن نكون مستخدمين بريستو، نكبس الحلّة ونخيلها مسافة)

الهدف في المرحلة دي اننا ندي اللحمة فرصة تستوي

لانه اللحمة بتاخد زمن عشان تستوي..

صور وصفة طبيخ البامية من المطبخ السوداني bamya sudanese okra

بعد نحس انه اللحمة استوت تلاته أرباع استوا كده

نطلع اللحمة ونستخدم الخلاط اليدوي عشان نخلط البصل والطماطم

وبصراحة انا عشان ما أنظف هرّاسة التوم

بجدع فصوص التوم عشان تتخلط برضها

الخطوة بتاعت الخلط اختياري لكن بنصحكم بيها والله

صور وصفة طبيخ البامية من المطبخ السوداني bamya sudanese okra

بعداك نرجّع الحلة النار

ونكب ليها صلصة وملح وفلفل ونرجع اللحمة

ونكب البامية المقمّعة

انا حقتي كنت مجهّزاها وخاتاها في الفريزر

ونسوطهم كلهم سوا

اللحمة تتم استوى، البامية تستوي

وأرخي النار تكون متوسطة..

صور وصفة طبيخ البامية من المطبخ السوداني bamya sudanese okra

كل شويه حرّكي

لو البامية لسه قويه، والمويه شويه، زيديها حبّة موية

لو لقيتيها استوت… ارخي النار شديد

عشان بعد ده تتسبك بس

يعني شنو تتسبك؟ يعني اي موية دخلت حلّتك، تتبخر

كيف بنعرف انه الحلّة اتسبّكت؟ لما الزيت الزمان داك حق البصلة وحق اللحمة يطفو فوق، ده البسموه وش الملاح

واتمنى طبيخ البامية السودانية عجبكم

وصحة وهنا

صور وصفة طبيخ البامية من المطبخ السوداني bamya sudanese okra

صحة وعافية ♥️

مطبخ مريم الحسين للاكلات السودانية

مطبخ مريم الحسين للاكلات السودانية

وصفات و طبايخ و أكلات طبخ سوداني من مطبخ مريم الحسين السوداني .. الوصفات خاصة فقط باكلات سودانية شعبية قديمة ومشهورة من المطبخ السوداني التقليدي و المطبخ السوداني الحديث والمعاصر من عمل الشيف السودانية مريم الحسين
ArabicEnglishFrenchGermanIndonesianItalianPersianPortugueseRussianSpanishTurkishUrdu