طبيخ القرع السوداني

طبيخ القرع السوداني

طريقة عمل طبيخ القرع السوداني بالصور من وصفات مريم الحسين

وصفة طبيخ القرع من المطبخ السوداني لذيذ وسهل وسريع

how to make sudanese pumpkin stew recipe in arabic

مكونات و مقادير وطريقة عمل وتحضير طبيخ القرع السوداني :

طبيخ القرع المزبوط لازم اول شي يكون مسبّك، يعني ما تكون فيه مويه زايده، ويكون القرع ظاهر فيه ومحافظ على شكل، ما يكون مهروس… اها مشكلة القرع يلا انه بطلّع موية كتيرة.. وانه مفروض ما يتحرك كتير عشان ما يتهرس…

اول خطوة تقطعي بصلك كتير عشان تكون عندك تسبيكة حلوه

المكنة البقطع بيها البصل… المكنة دي حنينه في سعرها، فيها عجانه وفيها تقطيع.. وسعرها في حدود ٦٥٠ ريال… وممكن العايزه تجيبها تضيع ليها اكسسوارات، عندها مفرمة لحمة ممكن تشتريها تركب فيها وعندها جك خلاط وعصارة برتقال كلها تجيبيهم بي راحتك لما تجتاحي ليهم.. صغيرونة ومختصرة وقوية.. ليها معاي أربعة سنين.. الماركة ألمانية اسمها بوش Bosch صناعتها تشيكية (كله ولا الصيني)

حشيت البصل سريع جدا

بستخدم الآلة لو عندي بصل صغار او عايزه احش بصل لكم طبخة

ختيت الزيت في النار

للقرع احسن الحلة تكون عريضة عشان ما يتردم فوق بعض ويتهرس

الزيت لما يسخن، كبي البصل وقلبيه تمام لحدي ما يتبل

وبعداك كبي طماطم مقطع وخليه لحدي ما الحموضة تروح

اعملي حبة ملح وأرخي النار وامشي على القرع عشان تجهّزيه

القرع نقشّرة ونقطعه مكعّبات متساوية قدر الإمكان عشان تستوي مع بعض ما تتهرس

واعملي مكعبات عريضة لانه هو قبل يستوي بكون قوي، لما يستوي ببقى طررررري

القرع برضه من الخضار البقعد كويس في التلاجة او الفريزر

لكن انا بفضل ينطبخ كتير ويقعد وهو مبطوخ

برضه بقعد كويس في الفريزر وهو طبيخ

الجزء اللين أللي فيه البذور ده طلّعوه

وخلوا القرع مقطع جاهز …

صور وصفة وصفة طبيخ القرع من المطبخ السوداني sudanese pumpkin stew7

البصلة ديك لو عايزنها كده خلوها، او اهرسوها.. حسب نوع البصل بتاعكم

انا هرستها عشان اولادي وقصتهم مع الطماطم

اعملوا حسابك ما تزيدوا موية كتير

كبوا اللحمة

واعملوا البهار… قرفة وكزبرة وحبة بابركيا وشمار الفول

الشمار ده رهيب في القرع

وكبوا اللحمة والقرع في نفس الوقت

نصيحة ماما فاطمة انه اخلي القرع واللحمة يستووا في نفس الوقت

مسافة اللحمة تنضج القرع بكون نضج

صور وصفة وصفة طبيخ القرع من المطبخ السوداني sudanese pumpkin stew7

بعد ده القرع دخل، بقينا لازم نكون حريصين

بعد نغتّس كل مكعبات القرع في البصلة نعمل التوم والملح والفلفل

لانه بعد شوية ما حيكون عندنا طريقة نضيف شي ونحرّك

غطّي الحلة وأرخي النار وما تهبشيها تاني

الهدف حسي انه القرع واللحمة يستوو..

صور وصفة وصفة طبيخ القرع من المطبخ السوداني sudanese pumpkin stew7

اخر خطوة انه الطبيخ يتسبّك

اكشفي الحلة واهبشي ليك قرعاية

لو اتهرست معاناها انت كده تمام

خلي زيتك داك الكبيته يظهر بي فوق

كده طبيخك بقى جاهز

وبالهنا

 صور وصفة وصفة طبيخ القرع من المطبخ السوداني sudanese pumpkin stew7
صحة وعافية ♥️

مطبخ مريم الحسين للاكلات السودانية

مطبخ مريم الحسين للاكلات السودانية

وصفات و طبايخ و أكلات طبخ سوداني من مطبخ مريم الحسين السوداني .. الوصفات خاصة فقط باكلات سودانية شعبية قديمة ومشهورة من المطبخ السوداني التقليدي و المطبخ السوداني الحديث والمعاصر من عمل الشيف السودانية مريم الحسين
ArabicEnglishFrenchGermanIndonesianItalianPersianPortugueseRussianSpanishTurkishUrdu