طريقة عمل الكشري المصري بالبيت
how to make koshari recipe in arabic step by step
وصفة طريقة عمل الكشري المصري بالبيت سهلة وسريعة ولذيذة بالصور من وصفات وعمل مطبخ ياسمين
الكشري المصري 👌 من الاكلات المميزة اووي و معظمنا بيحبها 🧡
عايزة اقولكوا ان عندي في البيت بيعشقوا حاجة اسمها كشري و غالبا جربوا محلات كشري مصر كلها😂
و لما عملت الوصفة جوزي قالي دة احلي كشري كلته في حياتي كلها ، فانا طبعا انبهرت بنفسي😂🙈 و قلت لازم اقولكوا علي الوصفة و لازم تجربوها عشان انا متأكدة انها هتعجبكوا🧡
و هقولكوا علي حاجة لذيذة تعملوها عشان متبهدلوش مواعين كتير🙈
و بردو هقولكوا علي طريقة سهلة اوي لشطة الزيت الشهيرة اللي بنشوفها في المطاعم
مكونات ومقادير وطريقة عمل الكشري :
احنا هنجهز 7️⃣ حاجات بالترتيب :
البصل المقرمش
المكرونة
العدس
ميكس الرز بشعرية
الصلصة
الدقة
الشطة
هما كتير بس سهلين جدا تعالوا نشوف :
(مبدأيا بس عايزة اقولكوا اني استخدمت هنا الكبايات و المعالق المعيارية عشان الوصفة تكون مظبوطة اوي ، ممكن تستخدموا العادية عادي بس الافضل معيارية) معلش انا مأفورة شوية 🙈🤕
🌸 لعمل البصل المقرمش :
٤ بصلات (ابيض) متقطع جوليان (حلقات رفيعة)
٢ م ك نشا ( هنقلبهم كويس مع البصل )
زيت غزير للتحمير
هنسخن الزيت و ننزل فيه البصل و نخلي النار متوسطة مش عالية ، بياخد وقت شوية اصبروا عليه 😅 ، طلعوه علي مصفاه مخرمة مش طبق عشان دة بيساعد انه يصفي الزيت كله و يبقي مقرمش ..
📣 يبقي خلي بالكوا من التركتين دول (النشا، المصفاه) هيطلع مقرمش جدا معاكم👌
🌸 لعمل المكرونة:
في حلة هنجهز مياه تغلي علي النار
هنحط ٣ م ك زيت من قلي البصل
م ك الا ربع ملح
ربع كيلو اسباجتي
ربع كيلو مقصوصة
( ممكن تستخدموا الشكل اللي عايزينه ، الشكل مش قاعدة يعني )
هنسلق المكرونة عادي زي ما متعودين و بعد ما تستوي نحطها في المصفاة او زي ما تحبوا
في نفس الحلة بتاعت سلق المكرونة ، هنحط مياة تغلي بردو عشان نسلق العدس
🌸 لعمل العدس :
لما المياه تغلي هنضيفلها
كوب عدس اسمر (او اسمه بجبة)
م ص ملح
رشة كمون خفيفة
فص توم كامل
نسلق العدس نص سلقة بس (هنلاحظ ان لون المياة اتغير و بقي لونها بني كدة) ، هنصفي العدس ونسيبه علي جمب
في نفس الحلة اللي سلقنا فيها العدس
🌸 لعمل ميكس الرز بالشعرية :
في الحلة هنحط ٥ م ك زيت من قلي البصل
م ك سمنة
نص كوب شعرية هنحمرها شوية
و بعدين نضيف ٢ كوب رز منقوع من قبلها و اشوحه مع الشعرية
و هننزل بالعدس المسلوق اللي حضرناه
م ص ملح او علي حسب
مكعب مرقة
٣ كوب ماء مغلي
و نسيبهم يستووا مع بعض زي ما بنسوي الرز العادي
هننقل الميكس دة بعد ما استوي لسرفيس التقديم و في نفس الحلة هنحضر الصلصة
🌸 لعمل الصلصة :
٦ م ك زيت من قلي البصل
٢ م ك توم مفروم
٢ م ك صلصة جاهزة
م ك هريسة شطة ( اختياري بس بتدي طعم تحفة)
م ص ( كمون و كزبرة و ملح و بابريكا )
٤ كوب عصير طماطم = لتر
هنسخن الزيت و نشوح التوم فيه شوية و بعدين نضيف الصلصة الجاهزة و الهريسة و التوابل و بعدين نضيف عصير الطماطم و نسيبها تتسبك
اول ما الصلصة تتسبك نطفي النار و نضيف ٢ م ك خل و كده الصلصة الخطيرة جاهزة
هننقلها طبق التقديم و نغسل الحلة و نعمل الدقة 🙈
🌸 لعمل الدقة :
٤ م ك زيت من قلي البصل
٢ م ك توم مفروم
شرايح فلفل احمر
اشوحهم مع بعض علي النار و اضيف
م ك كمون و م ك كزبرة
بعد ماريحتهم تطلع نضيف ٢ كوب مياة معيارية ( او ٢ كوب و نص بكوباية الشاي العادية) و اسيبهم ياخدوا غلوة واحدة بس و اطفي و اضيف نص كوب خل و عصير ليمونة كبيرة
نيجي بقي لشطة الزيت الجامدة جدا
🌸 لعمل شطة الزيت :
٥ م ك زيت
٢ م ك شطة بودر
يتشوحوا حبة حلوين مع بعض و نضيف نص كوب صلصة و نيبهم دقيقة او ٢ علي النار وبس كدة
وصحتين وألف عافية😋
لا يفوتكم الكشري ترى الطعم روعه
