حشوة الملفوف بالدجاج والجزر للسندوتشات وللسبرنغ رول

حشوة الملفوف بالدجاج والجزر للسندوتشات وللسبرنغ رول

طريقة عمل حشوة الملفوف بالدجاج والجزر للسندوتشات وللسبرنغ رول بالصور من مطبخ عبير العميرة

وصفة الذ حشوة الكرنب والجزر مع الدجاج لذيذة وسهله وسريعه

جرّبوا تحشونها بالسبرينق رول أو التورتيلا أو الساندوتشات وبتحبّونها ان شاء الله 😍

الحشوة تنفع ايضا للمعجنات والفطائر والسمببوسة بس نصغر تقطيع المكونات

مكونات و مقادير حشوة الملفوف بالدجاج والجزر :

صور وصفة ألذ و افضل حشوة الملفوف بالدجاج والجزر للسندوتشات وللسبرنغ رول

زبده
زيت زيتون
بصل
فلفل رومي أحمر بارد
جزر
الكرنب الأبيض والبنفسجي ( ملفوف )
ملح
ماجي مرق الخضار
صدور دجاج ..
بهارات تتبيل الدجاج ( ملح + فلفل أسود وأحمر + بهارات مشكله أو مكعب ماجي مرق الدجاج )
عصير ليمون
فص ثوم مهروس
الصويا الخفيفه
شرائح جبن

طريقة عمل وتحضير حشوة الملفوف بالدجاج والجزر :

* أول شيء يكون عندي تاوه عميقه

أضيف فيها قطعة زبده مع شوي زيت زيتون ثم أنزل بصل شرائح رفيعة

أجلس أقلّبها لين تبدأ تذبل

ثم أضيف عليها فلفل رومي أحمر بارد يكون مقطّع شرائح

واقلب ثواني بس يندمج

ثم أضيف الجزر + الكرنب الأبيض والبنفسجي

نفس الشيء مقطع لشرائح رفيعه والجزر مبشور

ثم أضيف رشّة ملح بسيطه + البهار اللي تفضلونه مع الخضار

بالنسبه لي أضفت شوي من ماجي مرق الخضار

أول ما تبدأ الخضروات تنسجم مع بعض

أشيلها من على النار

وأشتغل على تجهيز صدور الدجاج ..

آخذها مبرّده ثم أسوي فيها فتحات بالسكينه شيء بسيط ما أوصل للنهايه

وأتبّلها بـ / ملح + فلفل أسود وأحمر + بهارات مشكله أو ماجي

+ عصير ليمون مخلوط معه فص ثوم مهروس أحطه من بداية تجهيزي للوصفه عشان يتنكّه مضبوط ثم أصفّيه

وأتبّل فيه الصدور زين 👌🏻


الحين أجيب الصاجه وأخليها تسخن

ثم أنزل صدور الدجاج

وأحسب لها ٣ دقايق على كل وجه اذا كان حجمها وسط ومو عريضه مره ..

ثم لازم أول ما تستوي أغطيها 5 دقايق

ثم أفككها بالشوكه

( مو شرط تنتيف كأن بينك وبينها ثأر 😬 )

تفكيك بسيط شيء يجي عريض وشيء يجي نحيف كذا يكون أطعم من السلق بمراحل ..

الان ترجعون طاوة الخضار على النار

وتنزلون عليه الدجاج

وتضيفون شوي من الصويا الخفيفه

واذا عندكم التتبيله الجاهزه اللي تجي فلفل حار

ولو تحبّون شوي من شطة السومطرا

وتقلبون بشكل سريع

ثم تضيفون شرائح جبن لاتكثرون شيء بسيط ..

حطيت جبن مونتري جاك بالهلابينو عجبني طعمه

و يذوب بسرعه

ونقلب شوي

ثم تطلع عندكم الحشوه اللذيذه 🤤

صور وصفة ألذ و افضل حشوة الملفوف بالدجاج والجزر للسندوتشات وللسبرنغ رول

* الحين أنتم بالخيار :

تحشونها بالسبرينق رول أو التورتيلا أو الساندوتشات

كل وحده وذوقها بالحذف والإضافة في مكونات الحشوة وبهاراتها 👌🏻

* من مميزات الحشوة تتفرزن ❄️

خلوني اجرب معكم الحشوة و احشيها بالسبرينغ رول

صور وصفة ألذ و افضل حشوة الملفوف بالدجاج والجزر للسندوتشات وللسبرنغ رول

حشوة لذيذة جدا جدا

صور وصفة ألذ و افضل حشوة الملفوف بالدجاج والجزر للسندوتشات وللسبرنغ رول

وبالعافيه

عبير العميرة

وصفات و طبخات و أكلات الشيف السعودية المتميزة عبير العميرة .. الوصفات خاصة فقط بأشهي الأكلات الشعبية والمعجنات الشعبية والحلويات الشعبية خصوصا الأكلات والنجدية والقصيمية والحائلية المشهورة والسريعة واللذيذة