الكرعين بالحمص والزبيب على الطريقة المغربية
وصفة الكرعين بالحمص والزبيب على الطريقة المغربية سهله ولذيذه بالصور trotters recipe من وصفات وعمل مطبخ نجوى
تشهيت نوجد الكرعين بالحمص والزبيب على الطريقة المغربية بعض المناطق كيسميو هاد الطبق بالهركمة ، كاين لي كيديرهوم مع اللوبيا البيضاء…. بزاف ديال الطرق ولكن المذاق واللذة المغربية الاصيلة كتكون حاضرة فيهوم .انشاء الله نشارك معاكوم طريقتي وصدقوني كيجيو بنان بزاف دايبيين و معلكين
مكونات ومقادير عمل الكرعين بالحمص والزبيب :
2كرعين ديال البقر منقيين ومقطعين
كأس شاي مزيج زيت الزيتون و زيت المائدة
ملعقة شاي خرقوم بلدي
ملعقة شاي ملح
زعفران شعرة مرطب فالماء
نصف ملعقة شاي فلفل اسود
ملعقة شاي طحميرة ( بابريكا حلوة)
نصف ملعقة شاي رأس الحانوت
ملعقة شاي سكينجبير
ملعقة شاي قزبور يابس مطحونة
نصف ملعقة شاي سمن
زلافة حمص مفزك ليلة كاملة
نصف زلافة زبيب ( عنب اسود مجفف ) مرطب فالماء
ملعقة كبيرة عسل
نصف ملعقة قرفة
ثلاث فصوص ثوم
طريقة اعداد وتحضير وعمل الكرعين بالحمص والزبيب :
فطنجرة الضغط نحطو الكرعين نضيفو التوابل من غير (الزعفران شعرة و القرفة) نزيدو الزيت ، السمن ، الثوم ونضيفو الماء المغلي حتى نغطيو الكرعين . نحطو الطنجرة على نار مرتفعة حتى تصفر الطنجرة ونقصوها تكون هادئة نخليوها طيب مدة نصف ساعة نضيفو عليها الحمص و الزبيب القرفة والعسل والزعفران شعرة نراقبو كمية الماء المتبقية فالطنجرة نضيفو عند الحاجة ونغلقو عليها مدة نصف ساعة اضافية
بالصحة والراحة
