العصيدة البحرينية
طريقة عمل العصيدة البحرينية بالصور من مطبخ أخت مبارك
وصفة اكلة عصيدة الطيبين او العصيدة البحرينية بالبيض من الاكلات الشعبية المشهورة في المطبخ البحريني الشعبي القديم
العصيدة من الاطباق البحرينيه التقليديه .. والعصيدة الي عندنا نسويها بالسكر يعني حاليه مو مالحه وتقدم مع البيض وممكن تنوكل من غير بيض
والعصيده هذي مشهورة بها البحرين وممكن بعض الدول الخليجيه والامارات وتنوكل اكثر شي الصبح عالريق خاصة بايام الشتاء وكنت انتظر الشتا يجي عشان اسويها لان حلاتها بالشتا وممكن تنوكل في العصرية والمغربية
والمقادير انا سويت طبعا مقدارين والحين بحط لكم نص المقدار احسن كتجربه
how to make arabic bahraini asida recipe
مقادير ومكونات العصيدة البحرينية :
كوبين دقيق بر منخول
كوب سكر ممكن اضافة ثلاث ارباع كوب سكر اذا ماتحبونها حاليه مره
نص ملعقة صغيرة ( قرفة +زنجبيل+فلفل اسود+ بزار+هيل) طبعا كلهم مطحونين من كلشي ناخذ نص ملعقة صغيرة
ملعقتين سمنه
مقادير البيض المقلي
5 بيضات او اربع حسب الرغبه
بصلة صغيرة مفرومه
والبهارات بزار هيل فلفل اسود ملح من كلشي شوي تقريبا نص ملعقة صغيرة
4 كوب ماء
طريقة عمل العصيدة البحرينية :
نحمص الطحين في مقلاة عالنار شوي
لين ياخذ لون خفيف يعني مدة خمس دقايق
صورة للبهارات المذكورة
بزار هيل فلفل اسود قرفة و نسيت اصور الزنجبيل معليه
ثاني شغله نسويها
نحط السكر عالنار
ونسويه مثل الكراميل شوي نحرقه
ونحاسب اول ما يبتدي نشوفه يتكرمل نخفف عالنار وسط
ونحاسب نخلي بيدنا قماشه اهم شي عشان نمسك القدر
لان حرارة القدر تكون مرتفعه في حرق السكر اكثر من اي شي ثاني
يعني حاسبوا يلسع لان حنا مو جالسين نغلي ماء
وبعد ما نكرمل السكر
يستوي لونه هالشكل
خلاص نطفي النار
ونحاسب نوخر بعيد وايد لين نصب الماء الساخن
لان درجة حرارة السكر تكون مرتفعه جدا لذا حاسبوا رجاءا
تقريبا نصب كوبين ماء ساخن
ونخليهم يغلون لين يبتدي يذوب السكر تماما
ونحط البهارات المذكورة
قرفة زنجبيل هيل فلفل اسود وبزار
وفي ناس تحط الحلبه المطحونه بس انا ماحبها
وناخذ الطحين اللي حمصناه
ونضيف عليه كوبين ماء عادي
ونحركه بسلك البيض
هالطريقه نسويها احسن قبل مانحطها على السكر المحروق
عشان مايتكتل الطحين معانا ونتوهق
هذي طريقة الوالدة الله يحفظها علمتني اياها
ونضيف الطحين على السكر المحروق بهالشكل
واهم شي نكون مسكرين النار
ونحرك بسلك البيض لين يتماسك زين
وبعدين نحطه عالنار ونحرك
ما ياخذ وقت بس مدة خمس دقايق لان حنا محمصين الطحين وخالصين
وحتى وهو عالنار لازم نحركه شوي عشان مايتكتل طبعا
وطبعا لازم تطلع قوتكم كلها في هالوقت
عشان الطحين يبيله تحريك قوي عشان مايتكتل
وهذا شكله بعد مايستوي ونسكر النار
امم لايقاوم صراحه جربوه
ونجهز السمنه هذي مسويتها الوالده الله يحفظها
عجيبه هالسمنة لذيذة وايد
ونعمل البيض
نحمس البصل في الزيت
وبعد ماياخذ لون خفيف
نحط الملح والهيل والفلفل الاسود ونص ملعقة صغيره بزار
ونقلبهم مدة دقيقه
بعدين نضيف عليه البيض ونحركه
وهذا شكل البيض والبصل بعد ما استوى
وهذه الصور النهائية للعصيدة
نحطها بالصحن ونمسحها بالسمنه ونضيف عليها البيض
وجربوها وايد عجيبة العصيدة
ولاتنسوني بدعائكم
وبالهناء والشفاء
